Nan Por Siña for di Abeha

“Den añanan reciente, mas i mas ingeniero i diseñador di producto a siña algo cu aparentemente abeha tabata semper sa, esta, cu ora un material, aunque e ta mashá delegá, ta ser duná un forma hexagonal, of forma di tubo di seis skina di was di abeha, e ta hopi mas fuerte cu si nan ta duné otro forma.” —The New York Times, 6 di October di 1991.

NO TA un sorpresa cu hende por beneficiá di estudio cuidadoso di insecto. Job, un homber di fe di antigua, a bisa na un cierto ocasion: “Puntra, por fabor, animal doméstico, i nan lo instruí boso; també, puntra bestia di hala di cielo, i nan lo informa boso. . . . Ken entre tur eseinan no wel sa cu e man mes di Jehova a haci esei?” (Job 12:7-9) Sí, e sabiduría dje Creador ta keda bisto den cosnan tanto común como e forma hexagonal di cel cu bo por mira den was di honing.

Aunque tubo di was ta aproximadamente één derde di un milimeter diki, nan ta mashá fuerte. Realmente, nan por wanta mas cu 30 bez nan mes peso.

Tal forza por ta utilizá di manera práctica, tal como proteccion di aparato contra golpi. E ta ser usá asta pa proteha aparato militar tirá for di avion cu parachute. The New York Times a bisa tocante esei: “Obheto cu tanto peso como jeep ta ser montá riba plataforma cu bloki di forma di tubo di was di abeha bao di nan como proteccion contra golpi dje caimento.”

Producto cu hende ta traha usando tal diseño por ta trahá di hopi material. Esun mas común ta parce di ser papel. Papel trahá di hilo di nylon i resina ta ser usá pa forma tubo di forma di was di abeha cu ta fura curpa di algun avion grandi. Nan ta obtene forza cu mashá poco peso. Pakico? E mayor parti di espacio den tubo asina ta aire, di manera cu tin poco peso. E aire ta duna bon isolacion també.

Realmente, un simple abeha no “sa” tur esei, pasobra nan no tin diploma di ingeniero. No obstante, nan ta haci nan trabao diario cu e sabiduría instintivo cu Jehova Dios, e Creador, a dúnanan.