E Puesto di Papa—Cristo a Fundé?

“ENTRE Pedro, e promé obispo di Roma, i e papa actual, Juan Pablo II, tin un cadena largu di pontífice supremo—realmente, mas cu 260.” Esei ta loke frère católico Anthony Foy a bisa den The Southern Cross, un periódico simanal pe parti sur di Africa. El a sigi: “Cu confianza nos por siñala na tal cadena continuo di papa ora nos ta ser pidí prueba di cu Jesucristo a funda e Iglesia católico.”

Nan por bisa cu confianza cu tal cadena largu di papa a cuminza cu apóstol Pedro? Segun teología católico, cuater papa, Lino, Anacleto, Clemento I, i Evaristo, tabata sucesor di Pedro te na aña 100 EC. E Bijbel sí ta menciona un hende cristian yamá Lino cu a biba den Roma. (2 Timoteo 4:21) Sin embargo, no tin nada pa sugeri cu Lino, of un otro hende, tabata un papa sucesor di Pedro. Apóstol Juan cu a skirbi cinco buki di e Bijbel durante e último diez aña dje promé siglo, no a haci ningun mencion di homber anterior yamá sucesor di Pedro. Realmente, si Pedro tabatin sucesor, lógicamente esun escogí no tabatin cu ser Juan mes?

En cuanto e pretension di cu Pedro tabata e promé obispo di Roma, no tin ningun prueba cu e sikiera a bishita Roma. Realmente, Pedro mes a bisa cu el a skirbi su promé carta den Babilonia. (1 Pedro 5:13) No tin fundeshi pe argumento católico di cu Pedro a usa “Babilonia” como un referencia simbólico na Roma. Babilonia mes a existi den e tempo di Pedro. Además, Babilonia tabatin un comunidad hudío basta grandi. Siendo cu Jesús a asigna Pedro pa concentra su predicamento den hudío circuncidá, ta henteramente razonabel pa kere cu Pedro a bishita Babilonia pe haci esei.—Galatio 2:9.

Ripara, també, cu Pedro a menciona su mes solamente como un apóstol di Cristo. (2 Pedro 1:1) No tin ningun mencion di dje den e Bijbel como “Pader Santo,” “Pontífice Supremo,” of “papa” (di latín, papa, un nomber di cariño pa “tata”). Mas bien, Pedro a sigi humildemente e palabra di Jesús den Mateo 23:9, 10: “Además, no yama ningun hende boso tata riba tera, pasobra uno so ta boso Tata, Esun celestial. Ni no sea yamá ‘lider,’ pasobra uno so ta boso Lider, e Cristo.” Pedro no a acepta veneracion. Ora centurión romano Cornelio “a cai na su pia i a rindi homenahe na dje . . . , Pedro a hizé, bisando: ‘Lanta; ami mes també ta hende.’”—Echo 10:25, 26.

Pastor Foy ta admiti tocante e pretendido 260 papa: “Varios no tabata digno di nan puesto halto.” Den un esfuerzo pa hustifica esei, e New Catholic Encyclopedia ta bisa: “Loke tabata importante pe propósito di gobernacion tabata e puesto, i no e carácter personal di papa individual. Personalmente, tal bez e papa tabata un santo, of mediano, of asta un mal hende.” Pero, bo ta kere cu Cristo a usa hende asina como representante di dje?

En todo caso, e argumento di cu Jesús mes a funda e puesto di papa, simplemente no tin apoyo dje Bijbel. Segun e Encyclopedia of Religion, asta escolástico católico moderno ta admiti cu “no tin prueba bíblico directo di cu Jesús a establece e puesto di papa como un puesto permanente den e iglesia.”