Un Karta di Kuerpo Gobernante

‘Boso mester ta maestro.’ (Heb. 5:12) Imaginá bo! Yehova—e mihó Maestro den universo—ta invitá nos pa siña otro hende tokante dje! Kualke asignashon pa siña hende e bèrdat tokante Yehova—sea den famia, den kongregashon òf den sirbishi di vèlt—ta un bunita privilegio i un responsabilidat serio. Kon nos por tin éksito hasiendo esaki?

Nos ta haña e kontesta den e karta ku apòstel Pablo a skirbi Timoteo: “Sigui dediká bo mes na lesamentu den públiko, na dunamentu di konseho serio i siñansa.” Pablo a bisa tambe: “Hasiendo esei lo bo salba bo mes i tambe esnan ku ta skucha bo.” (1 Tim. 4:13, 16) Sí, e mensahe ku nos ta kompartí ta salba bida. P’esei, ta masha importante pa sigui mehorá bo manera di lesa i di siña hende. I e foyeto akí a ser prepará pa yuda bo hasi esei. Tuma nota di algun rasgo di e foyeto akí.

Na kada página, tin un teksto bíbliko ku ta sea un prinsipio bíbliko relashoná ku e punto di e lès òf un ehèmpel ku ta ilustrá esaki

Yehova ta nos “Gran Instruktor.” (Isa. 30:20, NW) E foyeto akí lo yuda bo mehorá bo lesamentu i bo kapasidat di siña hende. Pero no lubidá nunka ku e Fuente di nos mensahe ta Yehova, i ku é ta hala hende serka dje. (Huan 6:44) P’esei, pidié regularmente pa duna bo su spiritu santu. Usa Beibel mas tantu posibel. Nunka hala atenshon na bo mes, sino na Yehova. Hasi esfuerso pa yuda e hendenan ku ta skucha bo kultivá amor profundo pa Yehova.

Bo a haña e invitashon pa siña otro hende e mensahe di mas importante ku a yega di ser proklamá na mundu. Nos tin sigur ku si bo sigui dependé “di e forsa ku Dios ta suministrá,” lo bo tin éksito.—1 Ped. 4:11.

Boso kompañeronan den e obra di duna siñansa,

Kuerpo Gobernante di Testigunan di Yehova