Hesus A Siña Su Disipelnan Kon pa Hasi Orashon

Tur kos ku e fariseonan tabata hasi, nan tabata hasi pa hala atenshon di otro hende. Ora nan tabata hasi algu bon, nan tabata hasié pa otro hende mira. Nan tabata resa na e lugánan públiko pa tur hende wak nan. Ademas, e fariseonan tabata hasi orashon largu for di kabes. Nan tabata ripití e orashonnan akí den snoa i na skina di e kayanan kaminda hende por a skucha nan. Pues, e hendenan a keda sorprendí ora Hesus a bisa nan: ‘No resa manera e fariseonan ta resa. Nan ta kere ku Dios lo keda impreshoná ora nan usa hopi palabra, pero no ta asina. Hasi orashon ta algu entre abo i Yehova. No keda ripití e mesun kos kada bes. Yehova ke pa bo bis’é kon bo ta sinti.’

Hesus a bisa su disipelnan pa nan hasi orashon asin’akí: “Nos Tata, ku ta den shelu, bo nòmber sea santifiká. Laga bo Reino bini. Laga bo boluntat sosodé na tera, meskos ku den shelu.” Ademas, Hesus a bisa su disipelnan ku nan mester hasi orashon pa nan kuminda di tur dia, pa haña pordon di nan pikánan i pa otro kos personal.

Hesus a bisa: ‘Nunka stòp di hasi orashon. Sigui pidi kos bon na boso Tata, Yehova. Tur mayor ke duna su yu kos bon. Si bo yu pidi bo pan, lo bo dun’é piedra? Si e pidi un piská, lo bo dun’é un kolebra?’

Despues, Hesus a splika kiko e lès ta: ‘Si bo sa di duna bo yunan bon regalo, kuantu mas bo Tata, Yehova, lo duna bo spiritu santu? Ta pidi so bo tin ku pidi.’ Abo ta hasi orashon manera Hesus a siña nos? Kiko bo ta pidi Yehova ora bo hasi orashon?