Viktorianan di Reino—E Lucha pa Establesé e Derecho Legal di Prediká e Bon Notisia

BO TA predikando di kas pa kas i ta tende un sirena ta zona leu ayá. Ora bo kuminsá papia ku e siguiente doño di kas, e zonido di sirena ta yega mas serka. E ruman ku ta kompañá bo su tinu ta kita ora ku un outo di polis kore yega i para na kantu. Un polis ta baha for di e outo i kana bini serka boso. E ta bisa: “Ta boso ta e hendenan ku ta kana papia over di Beibel di kas pa kas? Nos a haña vários keho!” Boso ta kontest’é kortesmente i ta identifiká boso mes komo Testigu di Yehova. Kiko lo pasa ku boso e ora ei?

Esaki ta dependé pa un gran parti di historia. Kon e gobièrnu di e pais kaminda bo ta biba a trata ku Testigunan di Yehova atraves di añanan? Tin un grado di libertat religioso? Si ta asina, esei muy probablemente ta pasobra bo rumannan spiritual atraves di dékadanan a traha duru pa “defendé e bon notisia i establesé e derecho legal di predik’é.” (Flp. 1:7) Sin importá unda bo ta biba, bo por fortalesé bo fe mashá si bo meditá riba e registro di viktorianan legal di Testigunan di Yehova. Den e sekshon akí, nos lo analisá algun kaso di e registro notabel ei. Nos viktorianan ta duna prueba konvinsente ku e Reino ta un realidat, pasobra hamas nos lo por tabatin asina tantu éksito riba nos mes forsa!