Bo Sa Sinti Miedu ora Bo Ta Bo So?

Wak e mucha hòmber riba e plachi. Parse ku e tin miedu i e ta sintié su so, no? Abo a yega di sinti asina?— Tur hende sa sinti asina tin biaha. Beibel ta konta di algun amigu di Yehova ku tambe a yega di sinti ku nan tabata nan so anto nan a haña miedu. Un di nan ta Elías. Ban siña algu di dje.

Elías a biba na Israel hopi tempu pasá, promé ku Hesus a nase. Akab, e rei di Israel, no tabata adorá Yehova, e Dios berdadero. Akab ku su kasá Yézabèl, tabata adorá Baal, un dios falsu. P’esei, kasi tur hende na Israel tambe a kuminsá adorá Baal. Reina Yézabèl tabata masha mal hende. E kier a mata tur hende ku ta adorá Yehova. E kier a mata Elías tambe! Bo sa kiko Elías a hasi?—

Elías a kore bai! El a bai skonde den un kueba te leu ayá, na un lugá kaminda no tin niun niun hende ta biba. Dikon bo ta kere ku Elías a kore bai skonde?— Sí, pasobra e tabatin miedu. Pero e no mester a sinti miedu. Bo sa dikon? Pasobra e tabata sa ku Yehova por yud’é. Yehova a yega di mustra Elías kaba kuantu poder e tin. Un biaha, Yehova a manda kandela for di shelu pa kontestá orashon di Elías. Ke men, di mes ku Yehova por a yuda Elías e biaha akí tambe!

Ora Elías tabata den e kueba, Yehova a papia kuné i a puntr’é: ‘Ta kiko bo a bin hasi aki?’ Elías a kontestá: ‘No a sobra niun hende mas ku ta adorá bo. Ta ami so a keda. Mi ta mi so, i mi tin miedu ku nan ta bai mata mi.’ Elías a kere ku nan a mata tur otro hende ku ta adorá Yehova. Pero Yehova a bisa Elías: ‘Nò, no ta asina. Tin 7.000 hende ku ta adorá mi ainda. No tene miedu. Mi tin mas trabou pa bo!’ Bo ta kere ku Elías a keda kontentu di tende loke Yehova a bisa?—

Kiko abo por siña for di loke a pasa ku Elías?— Ku nunka bo no tin nodi di sinti ku bo ta bo so i haña miedu. Bo tin amigu ku ta stima Yehova i ku ta stima abo tambe. Anto kòrda ku Yehova tin masha hopi poder, i semper e ta kla pa yuda bo! Bo no ta kontentu di sa ku Yehova nunka no ta bai laga bo?—