Un Karta di Kuerpo Gobernante

Kerido Publikadó di Reino:

Imaginá ku bo ta un di e apòstelnan pará riba Seru di Oleifi. Hesus ta aparesé boso dilanti. Anto djis promé ku e subi bai shelu, e ta bisa: “Boso lo risibí poder ora spiritu santu baha riba boso. I boso lo ta mi testigunan na Herúsalèm, na henter Hudea i Samaria, i te na e partinan di mas leu di tera.” (Echo. 1:8) Kon lo bo a reakshoná?

Kisas lo bo a sinti ku loke Hesus a pidi boso hasi tabata imposibel. Kisas lo bo a puntra bo mes, ‘Kon un grupo chikitu di disipel lo por prediká “te na e partinan di mas leu di tera”?’ Kisas lo bo a kòrda e spièrtamentu ku Hesus a duna riba e anochi promé ku su morto: “Un esklabo no ta mas ku su doño. Si nan a persiguí mi, nan lo persiguí boso tambe; si nan a kumpli ku mi palabra, nan lo kumpli ku di boso tambe. Ma nan lo hasi tur e kosnan akí kontra boso pa motibu di mi nòmber, pasobra nan no konosé esun ku a manda mi.” (Huan 15:20, 21) Miéntras ku bo ta pensa riba e palabranan ei, kisas lo bo a puntra bo mes, ‘Kon ami por duna testimonio kabal apesar di oposishon i persekushon?’

Awe, nos ta den un situashon similar. Komo Testigunan di Yehova, nos mester prediká “te na e partinan di mas leu di tera;” sí, na “hende di tur nashon.” (Mat. 28:19, 20) Kon nos por kumpli ku e trabou akí apesar di oposishon?

E buki Echonan ta un relato emoshonante ku ta mustra kon e apòstelnan i nan rumannan di promé siglo a logra kumpli ku nan asignashon ku yudansa di Yehova. E publikashon ku bo ta lesando aworakí lo yuda bo analisá e buki Echonan i mira kon entusiasmá e kristiannan tabata pa wak e trabou di prediká krese asina lihé. Lo bo keda asombrá pa mira kuantu similaridat tin entre e kristiannan di promé siglo i nos awe. Lo bo ripará ku no ta djis e trabou ku nos a ser asigná kuné ta similar, sino tambe e manera ku nos trabou ta organisá. Segun ku bo ta meditá riba e relatonan akí, lo bo bira asta mas konvensí ku Yehova Dios ta sigui dirigí e parti di su organisashon ku ta aki riba tera.

Nos ta pidi Yehova pa segun ku boso ta analisá e buki Echonan, boso haña mas konfiansa ku Yehova lo yuda boso i ku lo e duna boso su spiritu santu pa haña e forsa nesesario pa sigui perseverá. Ora bo apliká e lèsnan ku tin den e buki akí, lo bo ta mas determiná pa sigui duna “testimonio kabal tokante e Reino di Dios” i yuda otro hende siña konosé Yehova i haña e speransa di biba pa semper.​—Echo. 28:23; 1 Tim. 4:16.