Capítulo 64

Un les den dunamento di pordón

TA parce cu Jesús tabata den e cas den Capernaum ainda cu su disípelnan. E tabata conbersa cu nan tocante con pa trata cu dificultad entre rumanan, p’sei Pedro a puntra: “Señor, cuanto bez mi ruman tin cu peca contra mi i mi tin cu pordoné?” Siendo cu maestro religioso hudío a propone di duna pordón te na tres bez, Pedro probablemente a considera cu ta mashá generoso pa sugeri “te siete bez?”

Pero henter e idea di tene cuenta asina ta incorrecto. Jesús a corrigi Pedro: “Mi ta bisábo, no te siete bez, sino te na setentisiete bez.” El a mustra cu límite no mester ta poní pe cantidad di bez pa Pedro pordoná su ruman.

Pa impresiona den su disípelnan nan obligacion di pordona, Jesús a cóntanan un comparacion. Esei tabata tocante un rey cu kier a regla cuenta cu su esclabonan. Un esclabo tabata hibá dilanti dje cu tabatin un debe enorme di 60.000.000 denario. No tin ningun manera pe posiblemente pagué. Pues, manera Jesús a splica, e rey a duna ordu pa bendé i su esposa i yiunan i paga e debe.

E ora ei e sclabo a cai na pia di su doño i a roga: “Tene pacenshi cu mi i lo mi pagábo tur cos.”

Sintiendo duele di dje, e doño den misericordia a cancela e debe enorme dje esclabo. Pero, asina cu el a haci esei, segun Jesús, anto e sclabo a bai i a haya un otro esclabo cu a debé 100 denario so. E homber a coge e otro esclabo pa garganta i a cuminza choké, bisando: “Paga tur loke bo ta debe.”

Pero e otro esclabo no tabatin e cen. Pues, el a cai na pia dje esclabo cu el a debe, i a roga: “Tene pacenshi cu mi i lo mi pagábo.” Distinto di su doño, e sclabo ta sin misericordia, i a laga pe otro esclabo ser tirá den prisón.

Wel, segun Jesús, e otro esclabonan cu a mira loke a pasa a bai i bisa e doño. Rabiá el a yama e sclabo. El a bisa: “Mal esclabo, mi a cancela tur e debe ei pa bo, ora bo a rogámi. Abo, en buelta, no tin cu tene misericordia dje otro esclabo, mescos cu ami també a tene misericordia di bo?” Provocá na rabia, e doño a entrega e sclabo sin misericordia na carcelero te cu e paga tur loke e debe.

Anto Jesús a conclui: “Di igual manera mi Tata den cielo lo trata cu boso també si boso no ta pordona cada un su ruman desde boso curazón.”

Ki un les excelente den dunamento di pordón! Compará cu e debe grandi di picá cu Dios a pordonános, cualkier ofensa cu un ruman cristian por comete contra nos ta chikito en berdad. Además, Jehova Dios ta pordonános miles di bez. Hopi bez nos no sa mes cu nos a peca contra dje. P’sei, nos no por pordona nos ruman algun bez, aunque nos tin un motibo legítimo pa kehé? No lubida, manera Jesús a siña den e Sermón di Monte, Dios ta “pordonános nos debe, mescos cu nos també ta pordona nos debedor.” Mateo 18:21-35; 6:12; Colosense 3:13.

▪ Kico a conmove Pedro pa haci pregunta tocante pordonamento di su ruman, i pakico e por a considera generoso e sugerencia di pordonamento di hende siete bez?

▪ Di ki manera e reaccion dje rey ne pidimento di misericordia dje esclabo ta distinto dje reaccion dje esclabo na pidimento di un otro esclabo?

▪ Kico nos ta siña for dje comparacion di Jesús?