“Nunca Mi A Interesá pa Lesa Spierta!”

Esei ta e palabranan di un alumna dje Universidad di Estado di San Jose, California, i cu ta inscribí pa un curso di Estudionan di Medio Ambiente. E ta sigui bisa: “Mi tabata bou dje impresion cu e revista tabata bai predicá mi—‘Bai misa’ of ‘Bira un Testigo di Jehova.’ Sin embargo, pa mi sorpresa ora mi a lesa e edicion aki (8 di januari, 1996, ‘Nos Planeta den Peliger—Hende Por Scap’é?’) el a duna echonan hopi real! E artículonan a contené un diagrama masha informativo di ‘Algun dje Problemanan Ecológico Principal di Mundu,’ cu ta mustra e lugánan riba un mapa caminda tin destruccion di mondi, desperdicio tóxico, contaminacion di atmósfera, scarcedad di awa, mata i animal den peliger di extincion i degradacion di tereno.

“Ainda mi no tin yu, pero tog mi ta preocupá si nan lo tin aire limpi pa hala rosea, parkenan pa hunga aden of awa pa sobrebibí. . . . Mi ta encomendá boso pa e artículonan aki.”

Awor Spierta! tin un circulacion di 18,3 miyon pa cada edicion den 80 idioma, di cua 56 ta ser publicá simultáneamente. Si bo ta deseá di lesa e revista aki riba un base regular, por fabor, tuma contacto cu Testigonan di Jehova den bo área, via telefon of na e Salon di Reino local, of skirbi n’e adres mas cerca di bo den e lista na página 5.