Un Modelo pa Imitá

DJE CORESPONSAL DI SPIERTA! NA CHILE

Giacomo Castelli tin un apartamento na Antofagasta, un stad di rond di 170.000 habitante den nort di Chile. Den juni último, el a observá for di su balcon, un grupo di hende den un parke local. “Loke tabata increibel tabata pa mira cu tienernan tabata hari i pasa bon huntu cu nan mayornan,” el a skirbi den un carta n’e corant El Mercurio. Pa confirmá e bista raro aki, el a baha bai n’e parke.

“Tabatin otro sorpresa ta wardá mi,” e escritor curioso a comentá. “Ora algun dje famianan a terminá nan almuerso, cada un di nan miembronan a cuminsá recogé loke, evidentemente pa casualidad, a cai riba e yerba pa depositá esei den e sacu di sushi di cada un. . . .

“Mi tabata kier a sa ken e personanan ‘straño’ aki tabata,” e escritor a sigui bisa. “Mi a acercá un hobencita hopi bunita cu fácilmente por tabata reina di kico cu e tabata kier i el a contestá mi masha cariñosamente: ‘Nos ta Testigonan di Jehova i nos ta reuniendo den e Stadion Regional pa un asamblea.’” Durante e pausa di merdia, gruponan for dje asamblea di circuito, cu un asistencia di riba 3.000 hende, a bai n’e parke pa come nan almuerso.

“Ami ta masha católico, apostólico i romano,” e escritor a bisa. “Mi ta asistí fielmente n’e santu sacrificio di misa i asta a haci un peregrinacion pa Lourdes na Francia, algun aña pasá.

“Sin embargo, na onor di mi profundo criansa cristian mi tin cu puntra mi mes cu tur onestidad: Kico nan tin cu nos, católiconan, e religion mas grandi na Chile, no tin? Di con e tienernan aki ta parce di ta sinti nan asina bon cu nan mayornan, miéntras cu mi tres yu muhernan ta hui for di mi ora mi djis proponé pa nos sali huntu?

“Di con nos muchanan católico ta violento; ta grita duru i ta hunga ‘Power Rangers’ golpiando otro mucha, . . . miéntras cu e muchanan aki ta pacífico, sanamente alegre i conciente dje medio ambiente? Di con nos, como católico, no por reuní den asambleanan manera nan, sin cai den e comercialismo odioso cu ta rondoná nos lugánan religioso di mas santu manera La Tirana, Andacollo i otronan?”

E escritor, Sr. Castelli, a concluí su carta n’e corant cu e pregunta: “Nos, cu ta considerá nos mes católico i cristian, un dia lo yega di ta manera nan? Cu Dios i La Bírgen yuda nos logra esei.”