“Miho Bo Consulta Spierta!”

ESEI ta loke e maestra di sicologia di Pasquale, un hóben Testigo di Jehova, kende tabata siguiendo un curso avansá na Bari, Italia, a bis’é ora el a puntr’é pa algun informacion cu e maestra tabatin tocante adiccion na droga. Sin embargo, den pasado e maestra aki tabatin prehuicio contra Testigonan di Jehova. Kico a pon’é cambia su actitud?

Pasquale a splica: “Na fin di un les, e maestra a pidi su studiantenan pa yud’é haña material tocante abusu di mucha, e tópico riba cua e tabata preparando un tésis postdoctoral. Mi a corda riba algun edicion di Spierta! cu a trata cu esaki i tópiconan relacioná cu esei, manera ‘Educacion Sexual—Ken Mester Dun’é?’ (¡Despertad! di 22 di februari, 1992). Sin embargo, ya cu mi tabata conciente dje prehuicio di mi maestra contra e Testigonan, mi a pidi un compañera di klas pa dun’é e revistanan.”

Pasquale ta describí loke a sosodé ora cu, un par di dia despues, el a pidi su maestra pa haña e informacion cu e tabata kier relacioná cu adiccion na droga: “E no a contestá di biaha. Mas bien, el a lanta para i a bin duná mi man. El a bisa cu anteriormente e no kier a aceptá e revistanan di Testigonan di Jehova pasobra el a haña cu nan tabata muchu simpel i infantil. Sin embargo, despues di a lesa nan, el a cambia di idea. El a bisa cu el a haña cu e contenido dje revistanan ta masha útil desde un punto di bista social. El a bisa cu lo e bai usa algun punto for dje Spierta! den su tésis.”

Kico di Pasquale su peticion pa haña informacion tocante adiccion na droga? “Cu muchu gustu lo mi duná bo nan,” e maestra a contestá, “pero mihó bo consultá Spierta! E ta un revista cu ta trata cu tópiconan cu ta bale la pena, i e ta útil, asta n’e nivel académico.”

Spierta! ta trata cu problemanan actual i ta haci lo posibel pa duna yudansa práctico na esnan cu ta enfrentá desafionan grandi of chikitu den bida diario. Si bo ta deseá di sa ki yudansa Bijbel por duna, tuma contacto cu Testigonan di Jehova, kendenan ta distribuí Spierta!, of skirbi n’e adres mas cumbiniente na página 5.