Amor Cristian Durante Desaster na México

UN CORANT di Ciudad di México a informá: “Durante e último 20 dianan, fenómenonan natural—horcan i temblor—a pasa riba costa di México i como resultado a laga atras morto i destruccion.”—El ­Financiero, 17 di october, 1995.

Horcan Opal, na e principio di october, a causa daño serio den e estado mexicano di Campeche, Quintana Roo, i Tabasco. Casi 200 hende a muri, mas cu 150 heridá, 500.000 a sufri pérdida, i miles di cas a ricibí daño of a ser destruí completamente.

Tan pronto cu e oficina di sucursal di Testigo di Jehova na México a tende dje daño, un persona a ser mandá pa informá dje estado di Testigo di Jehova den e sector afectá. Informacion a yega di cu mas cu 2.500 di nan a keda obligá di bandoná nan cas. Otro Testigo di Jehova a ricibí nan den nan cas bondadosamente.

Nan a organisá centro di alivio. Nan a percurá pa cuminda, paña, i placa pa esnan den necesidad. Despues cu awa dje diluvio a baha, Testigo di Jehova a cuminsá reconstruí cas di nan rumannan cristian.

Dia nuebe di october un temblor fuerte alcansando 7.6 riba escala di Richter a causa daño n’e estadonan mexicano di Colima i ­Jalisco. Ocho Salon di Reino di Testigo di Jehova a ricibí daño severo. Diesdos di nan cas a cai den otro, i rond di 65 a ricibí daño. Atrobe, un comité di alivio a ser organisá, i yudansa duná.

Anto, dia 20 di october, un otro temblor a pasa, sagudiendo e estado di Chiapas. Cas di 88 Testigo di Jehova mas a ser destruí, i 38 a ricibí daño severo. Dos Salon di Reino a ser destruí completamente, i cuater otro a ricibí hopi daño. Casi n’e mésun tempu, diluvio resultando di horcan Roxanne a causa daño na cas di rond di 80 Testigo di Jehova den e estado di Veracruz. Cuater cas a ser destruí completamente. Testigo di Jehova a establecé un fondo di alivio i a percurá pa tal víctima lihé.

Aunke algun Testigo di Jehova a sufri di golpi i wesu kibrá, ningun hende a muri den e desasternan natural aki. En total, rond di 24 ton di cuminda i 4 ton di paña a ser mandá pa esnan den necesidad. Hopi observador a expresá admiracion p’e obra di alivio. Un señora den Colima a bisa: “Mi solamente a tende cu Testigo di Jehova ta mashá uní, pero awor mi por mir’é cu mi mes wowo.”

Hopi bes hende a bisa tocante Testigo di Jehova i nan obra di alivio: “Nan realmente ta ruman.” “Nan ta e mihó grupo organisá.” Algun asta a bisa: “Si tur grupo dunando alivio cu a bini pa yuda traha manera Testigo di Jehova, henter e pueblo lo ta limpi caba.”

Awor mas cu 440.000 Testigo di Jehova ta compartí e bon nobo dje Reino di Dios cu nan compatriota mexicano. E amor cu nan a manifestá un pa otro durante e desasternan natural recien aki a duna un testimonio fuerte.—Juan 13:34, 35.