ଦରଦାମ୍ ବଢ଼ି ଚାଲିଛି
ଯେତିକି ଅଛି ସେତିକିରେ ଖୁସି ରୁହନ୍ତୁ
ଯେଉଁ ଲୋକମାନେ ସନ୍ତୁଷ୍ଟ ରହନ୍ତି, ସେମାନେ ଜୀବନରେ ଖୁସି ରହନ୍ତି । ଆଉ ଯେବେ ସେମାନଙ୍କ ପରିସ୍ଥିତି ବଦଳିଯାଏ, ତେବେ ସେମାନେ ସହଜରେ ପରିବର୍ତ୍ତନ କରିପାରନ୍ତି ଯାହାଦ୍ୱାରା ସେମାନେ ଯେତିକି ରୋଜଗାର କରନ୍ତି, ତାʼଠାରୁ ଅଧିକ ଖର୍ଚ୍ଚ କରନ୍ତି ନାହିଁ ।
ଏପରି କରିବା କାହିଁକି ଜରୁରୀ ?
ମନୋବିଜ୍ଞାନୀ ଜେସିକା କଲର କହନ୍ତି: ଯେଉଁମାନେ ଜୀବନରେ ସନ୍ତୁଷ୍ଟ ରହନ୍ତି, ସେମାନେ ପ୍ରାୟ ଭଲ ଭାବନ୍ତି ଆଉ ଖୁସିରେ ରହନ୍ତି । ସେମାନେ ସାଧାରଣତଃ ଅନ୍ୟମାନଙ୍କୁ ଈର୍ଷା କରନ୍ତି ନାହିଁ । ତେଣୁ ଏହା ଆଶ୍ଚର୍ଯ୍ୟର କଥା ନୁହେଁ ଯେ ଏପରି ଲୋକ କମ୍ ଚିନ୍ତାରେ ଏବଂ ବେଶୀ ଖୁସିରେ ଦେଖାଯାʼନ୍ତି । ଆଉ ଏହା ଦେଖିବାକୁ ମିଳେ ଯେ ଯେଉଁ ଲୋକମାନେ ସବୁଠୁ ଅଧିକ ଖୁସି ଥାʼନ୍ତି, ସେମାନଙ୍କ ମଧ୍ୟରୁ କିଛି ଲୋକଙ୍କ ପାଖରେ କମ୍ ପଇସା କିମ୍ବା ଜିନିଷଗୁଡ଼ିକ ଥାଏ । କାରଣ ସେମାନେ ଏପରି ଜିନିଷଗୁଡ଼ିକୁ ମହତ୍ତ୍ୱ ଦିଅନ୍ତି ଯାହା ପଇସାରୁ କିଣାଯାଇପାରିବ ନାହିଁ । ଯେପରି, ପରିବାର ଓ ସାଙ୍ଗମାନଙ୍କ ସହ ଖୁସିର ସମୟ ବିତାଇବା ।
ଆପଣ ଏହା କିପରି କରିପାରିବେ ?
ତୁଳନା କରନ୍ତୁ ନାହିଁ । ଅନ୍ୟମାନଙ୍କୁ ଦେଖି ଭାବନ୍ତୁ ନାହିଁ ଯେ ତାଙ୍କ ପାଖରେ ବହୁତ ଜିନିଷ ଅଛି, କିନ୍ତୁ ମୋ ପାଖରେ ତ କିଛି ବି ନାହିଁ । ଏପରି ତୁଳନା କଲେ ଆପଣ ଦୁଃଖି ହୋଇପାରନ୍ତି । ଏପରିକି ଆପଣ ତାଙ୍କୁ ଈର୍ଷା ବି କରିବାକୁ ଲାଗିପାରନ୍ତି । କେବଳ ଏତିକି ନୁହେଁ, ଆପଣ ଯେପରି ଭାବୁଥିବେ ବାସ୍ତବ ସେପରି ନ ଥିବ । କିଛି ଲୋକଙ୍କୁ ଦେଖି ଆମକୁ ଲାଗିପାରେ ଯେ ସେମାନେ କେତେ ଧନୀ, ତାଙ୍କ ପାଖରେ ସବୁକିଛି ଅଛି । କିନ୍ତୁ ପ୍ରକୃତରେ ହୁଏତ ସେମାନେ ଋଣରେ ବୁଡ଼ିଥିବେ । ଆଫ୍ରିକାର ଗୋଟିଏ ଦେଶ ସେନେଗାଲରେ ରହୁଥିବା ନିକୋଲ କହନ୍ତି, “ମୁଁ ଦେଖିଛି ଯେ ଖୁସି ରହିବା ପାଇଁ ଅଧିକ ଜିନିଷ ଆବଶ୍ୟକ ନାହିଁ । ଯଦିଓ ମୋ ପାଖରେ ଅନ୍ୟମାନଙ୍କଠାରୁ କମ୍ ଥିବ, ତଥାପି ଯଦି ମୁଁ ସନ୍ତୁଷ୍ଟ ରହେ, ତାହେଲେ ମୁଁ ଖୁସିରେ ରହିପାରିବି ।”
ଏହା ଲାଗୁ କରି ଦେଖନ୍ତୁ: ଏପରି ବିଜ୍ଞାପନ କିମ୍ବା ସୋସିଆଲ୍ ମିଡିଆ ପୋଷ୍ଟ ଦେଖନ୍ତୁ ନାହିଁ ଯେଉଁଥିରେ ଦେଖାଯାଏ ଯେ ଅନ୍ୟମାନେ କେତେ ଧନୀ ଏବଂ ସେମାନଙ୍କ ପାଖରେ ବିଳାସପୂର୍ଣ୍ଣ ଜୀବନ ବିତାଇବା ପାଇଁ ସବୁକିଛି ଅଛି ।
କୃତଜ୍ଞ ରୁହନ୍ତୁ । ଆପଣଙ୍କ ପାଖରେ ଯାହା ଅଛି, ତାʼପାଇଁ କୃତଜ୍ଞ ରହନ୍ତୁ । ଯେଉଁମାନେ ଏପରି କରନ୍ତି ସେମାନେ ଅଧିକ ସନ୍ତୁଷ୍ଟ ରହନ୍ତି । ସେମାନେ ଏହା ଭାବନ୍ତି ନାହିଁ, ‘ମୋତେ ଏହା ବି ଦରକାର ଆଉ ତାହା ବି’ କିମ୍ବା ‘ଏହା ତ ମୁଁ ପାଇବାର ଯୋଗ୍ୟ ।’ ହୈତିରେ ରହୁଥିବା ରବର୍ଟନ୍ କହନ୍ତି, “ମୁଁ ସମୟ କାଢ଼ି ଭାବେ ଯେ ଅନ୍ୟମାନେ କିପରି ମୋତେ ଓ ମୋ ପରିବାରକୁ ସାହାଯ୍ୟ କଲେ । ଏଥିରୁ ମୁଁ ସେମାନଙ୍କୁ ହୃଦୟରୁ ଧନ୍ୟବାଦ ଜଣାଇପାରେ । ମୁଁ ମୋର ଆଠ ବର୍ଷର ପୁଅକୁ ବି ଶିଖାଏ ଯେ ଯେବେ ତାକୁ କାହାରିଠାରୁ କିଛି ମିଳେ, ତେବେ ସେ ତାଙ୍କୁ ଧନ୍ୟବାଦ ନିଶ୍ଚୟ କହୁ ।”
ଏହା ଲାଗୁ କରି ଦେଖନ୍ତୁ: ପ୍ରତିଦିନ ଲେଖନ୍ତୁ ଯେ ଆପଣ କେଉଁ ଜିନିଷଗୁଡ଼ିକ ପାଇଁ କୃତଜ୍ଞ । ଯେପରି ଭଲ ସ୍ୱାସ୍ଥ୍ୟ, ଆପଣଙ୍କ ପରିବାର, ସାଙ୍ଗ କିମ୍ବା ଅସ୍ତ ହେଉଥିବା ସୂର୍ଯ୍ୟର ସୁନ୍ଦର ଦୃଶ୍ୟ ।
ଆମ ପାଖରେ ଯେତେ ଅଛି ସେତିକିରେ ଖୁସି ରହିବା ବେଳେବେଳେ ଆମ ପାଇଁ କଷ୍ଟ ହୋଇପାରେ । ତଥାପି ଆମକୁ ସନ୍ତୁଷ୍ଟ ରହିବା ପାଇଁ ପୂରା ଚେଷ୍ଟା କରିବା ଉଚିତ୍ । ଯଦି ଆମେ ସନ୍ତୁଷ୍ଟ ରହିବା ପାଇଁ ଶିଖିବା ତେବେ ଆମେ ଖୁସିରେ ରହିବା । ଏହା ଆଉ ଏକ ଜିନିଷ ଯାହା ପଇସାରୁ କିଣା ଯାଇପାରିବ ନାହିଁ ।