ଚିନ୍ତାର ସାମନା କିପରି କରିବା ?

ଆମକୁ କେଉଁ କାରଣଗୁଡ଼ିକ ଯୋଗୁଁ ଚିନ୍ତା ହୋଇପାରେ ?

ସ୍ୱାସ୍ଥ୍ୟ ସମ୍ବନ୍ଧୀୟ ଗୋଟିଏ ଜଣାଶୁଣା କେନ୍ଦ୍ର, ମାୟୋ କ୍ଲିନିକର କହିବା ଅନୁଯାୟୀ, “ଆଜିକାଲି କ୍ଷଣିକ ଭିତରେ ହିଁ ଲୋକମାନଙ୍କ ଜୀବନ ବଦଳିଯାଏ, ତେଣୁ କାଲିକୁ କʼଣ ହେବ ତାହା ସେମାନେ ଜାଣିପାରନ୍ତି ନାହିଁ । ଦେଖିବାକୁ ଗଲେ ଲୋକମାନେ ଆଜି, ଆଗ ଅପେକ୍ଷା ଅଧିକ ଚିନ୍ତାଗ୍ରସ୍ତ ଅଛନ୍ତି ।” ଧ୍ୟାନ ଦିଅନ୍ତୁ ଯେ ସେମାନେ କେଉଁ କାରଣଗୁଡ଼ିକ ଯୋଗୁଁ ଚିନ୍ତିତ ରହନ୍ତି:

ଛାଡ଼ପତ୍ର
ପ୍ରିୟଜନମାନଙ୍କ ମୃତ୍ୟୁ
ଗମ୍ଭୀର ରୋଗ
ଭୟଙ୍କର ଦୁର୍ଘଟଣା
ଅପରାଧ
ବ୍ୟସ୍ତ ବହୁଳ ଜୀବନ
ପ୍ରାକୃତିକ ବା ମନୁଷ୍ୟକୃତ ବିପର୍ଯ୍ୟୟ
ସ୍କୁଲ କିମ୍ବା କାମ ଜାଗାରେ ଚାପ
ଚାକିରି କିମ୍ବା ଟଙ୍କା ପଇସାକୁ ନେଇ ଚିନ୍ତା

ଯେବେ ଚାକିରି ଚାଲିଯାଏ

ଆମେରିକନ ସାଇକୋଲୋଜିକଲ ଏସୋସିଏସନ ନାମକ ଏକ ସଂଗଠନ କହେ, “ଜଣେ ବ୍ୟକ୍ତିର ଚାକିରି ଚାଲିଗଲେ, ସତେ ଯେପରି ତାʼ ଉପରେ ପାହାଡ଼ ଭଳି ସମସ୍ୟାଗୁଡ଼ିକ ଘେରି ହୋଇଯାଏ । ଏହାଯୋଗୁଁ ତାʼ ସ୍ୱାସ୍ଥ୍ୟ ଓ ତାʼ ବୈବାହିକ ଜୀବନରେ ଖରାପ ପ୍ରଭାବ ପଡ଼ିଥାଏ । ସେ ଅତ୍ୟଧିକ ଚିନ୍ତିତ ଓ ନିରାଶ ହୋଇଯାଏ । ଏପରିକି ସେ ଆତ୍ମହତ୍ୟା କରିବା ବିଷୟରେ ବି ଭାବିବାକୁ ଲାଗେ । ସତରେ, ଚାକିରି ଚାଲିଗଲେ ଜଣେ ମଣିଷର ଜୀବନ ଓଲଟ ପାଲଟ ହୋଇଯାଏ ।”

ଯେବେ ପିଲାମାନେ ଚିନ୍ତାରେ ଥାʼନ୍ତି

ପିଲାମାନେ ବି ଅନେକ କଥା ପାଇଁ ଚିନ୍ତା କରନ୍ତି । ଉଦାହରଣ ପାଇଁ, ତାଙ୍କୁ ସ୍କୁଲରେ ହଇରାଣ କରାଯାଏ, ତାଙ୍କୁ ଘରେ ଯେତିକି ପ୍ରେମ ମିଳିବା କଥା ସେତିକି ପ୍ରେମ ମିଳେନି, ମାରପିଟ୍‌ କରାଯାଏ, ତାଙ୍କ ଭାବନାକୁ ଆଘାତ ପହଞ୍ଚାଯାଏ କିମ୍ବା ତାଙ୍କର ଯୌନ ଶୋଷଣ କରାଯାଏ । ଅନେକ ପିଲାଙ୍କୁ ଭଲ ନମ୍ବର ରଖି ପାସ୍‌ ହେବା ବିଷୟରେ ବହୁତ ଚିନ୍ତା ଲାଗି ରହେ । ତାʼସହିତ ଯଦି ବାପାମାଆଙ୍କର ଛାଡ଼ପତ୍ର ହୁଏ, ତାହେଲେ ଏହା ପିଲାମାନଙ୍କ ଉପରେ ବହୁତ ଖରାପ ପ୍ରଭାବ ପକାଇଥାଏ । ଚିନ୍ତିତ ରହୁଥିବା ପିଲାମାନଙ୍କୁ ଖରାପ ସ୍ୱପ୍ନ ଆସେ, ସେମାନେ ନିଜ ପାଠ ପଢ଼ାରେ ଧ୍ୟାନ ଦେଇପାରନ୍ତି ନାହିଁ, ନିରାଶ ହୋଇଯାʼନ୍ତି କିମ୍ବା ଅନ୍ୟମାନଙ୍କ ସହିତ ମିଳାମିଶା କରିବା କମ୍‌ କରିଦିଅନ୍ତି । କିଛି ପିଲା ନିଜ ଭାବନାକୁ ବି କାବୁ କରିପାରନ୍ତି ନାହିଁ । ଏହି କାରଣଗୁଡ଼ିକ ଯୋଗୁଁ ଯଦି କୌଣସି ପିଲା ଚିନ୍ତାରେ ଅଛି, ତାହେଲେ ତାକୁ ତୁରନ୍ତ ସାହାଯ୍ୟ କରନ୍ତୁ ।