Bɛmaanle Me Ndwea Ne Mɔ Bisiketi
NICK mɔɔ de Oregon, U.S.A la hɛlɛle kɛ, “Wɔ 2014 mɔlebɛbo, me nee me ndwea ngyikyi nwiɔ hɔle akpɔsa wɔ sua zo. Fane dɔɔnwo ne ala, saa ɛkɔ sua zo a ɛnwu kɛ Alasevolɛ ne mɔ gyigyi bɛ daselɛlilɛ ehwili ne mɔ anwo. Ɛnwu kɛ bɛziezie bɛ nwo kɛnlɛma yɛɛ bɛsele bɛbiza awie biala mɔɔ ɛlɛpɛ nu la ahye.
“Tɛ menli angomekye a bɛda atiakunlukɛnlɛma ali bɛkile bɛ a, bɛlale bie ali bɛhilele me ndwea ne mɔ noko. Kenle ko bie, Elaine mɔɔ ɛnee ɔgyi daselɛlilɛ ehwili ne anwo la maanle me ndwea nwiɔ ne bisiketi. Yemɔ anzi, saa yɛdwu bɛ nwo ɛkɛ ne biala a ndwea ne mɔ makyi kɛ bɛkalie bisiketi.
“Siane ekyi pɛle nu. Ndwea ne mɔ nyianle bisiketi lile yɛɛ me nee Alasevolɛ ne mɔ bɔle adawu ngyikyingyikyi. Noko ɛnee mengulo kɛ mebikye bɛ somaa. Ɛnee mebo ɛvolɛ 70 yɛɛ menze mɔɔ Alasevolɛ ne mɔ die di a. Kɛmɔ ɛnee asɔne asɔne dɔɔnwo ɛmaa me sa ɛzi aze la ati, menyianle adwenle kɛ medame mumua ne mebazukoa Baebolo ne wɔ sua nu.
“Wɔ mekɛ ɛhye anu, menwunle Alasevolɛ gyɛne wɔ sua ne ɛleka ngakyile kɛ bɛgyigyi bɛ ehwili ne mɔ anwo. Ɛnee bɛdabɛ noko bɛte bɛ nyunlu. Ɛnee dahuu bɛfa Baebolo ne bɛbua kpuya biala mɔɔ mebabiza la na ɛhye maanle menyianle bɛ nu anwodozo kpole.
“Kenle ko bie Elaine bizale me kɛ, ‘Ɛze kɛ nane ne mɔ le ahyɛlɛdeɛ mɔɔ vi Nyamenle ɛkɛ ɔ?’ Membuale kɛ, ‘Ɛhɛe, meze ye zɔ!’ Akee Elaine gengale Ayezaya 11:6-9 hilele me. Ɛhye maanle mengakyile me adwenle bɔkɔɔ, noko ɛnee mengulo kɛ medie buluku biala mefi bɛ ɛkɛ.
“Ɛhye anzi, me nee Elaine nee ɔ hu Brent bɔle adawu ngyikyingyikyi mɔɔ yɛ anyelielɛ. Bɛhanle kɛ saa mekulo kɛ menwu mɔɔ kile kɛ awie le Kilisienenli kpalɛ la a, mengenga Mateyu kɔdwu Gyima ne. Ɔti menyɛle ye zɔ. Yeangyɛ, menganle kɛ Brent nee Elaine nee me ɛzukoa Baebolo ne. Ɔle 2016 avinli ɛkɛ ne.
“Ɛnee dapɛne biala me nye la kɛ yɛbazukoa debie na meahɔ debiezukoalɛ wɔ Belemgbunlililɛ Asalo. Me nye liele kɛ ɛnee melɛsukoa nɔhalɛ mɔɔ wɔ Baebolo ne anu la. Ɛvolɛ ko pɛle nu la, bɛzɔnenle me. Kɛkala meli ɛvolɛ 79 na meze kɛ melua nɔhalɛ adenle ne azo. Gyihova ɛyila me kɛ yemaa meraboka ye abusua ne mɔɔ bɛyila bɛ nwo zo bɛmaa ye la anwo la.”