Kpuya Mɔɔ Vi Kengavolɛma Ɛkɛ

Mɔɔ Seetan zele Yive kɛ saa ɔdi kpalɛ nee ɛtane ɛnwunlɛ baka ne ma ne bie a ɔnrɛwu la, ɛnee ɔlɛka ɛkɛla mɔɔ ɛnwu ɛlɛ ngilehilelɛ mɔɔ ɛbu zo ɛnɛ la anwo edwɛkɛ ɔ?

Kyɛkyɛ. Abɔnsam anga angile Yive kɛ saa ɔdi kpalɛ nee ɛtane ɛnwunlɛ baka ne ma ne bie a ɔbawu noko debie wɔ ye nu (mɔɔ ɛnɛ bie mɔ fɛlɛ ye kɛ ɛkɛla la) mɔɔ ɔbahɔzo yeadɛnla aze wɔ ɛleka bie a. Emomu, Seetan luale ɛwɔlɛ ne anwo zo zele Yive kɛ, saa ɔdi baka ne ma ne bie a, ‘ɔnrɛwu’ fee. Ɛnee ɔlɛkile kɛ, ɔbahɔ zo yeadɛnla aze, ɔ nye alie azɛlɛ ye azo wɔ mekɛ mɔɔ Nyamenle ɛnli ɔ nwo zo tumi a.​—Gyn. 2:17; 3:3-5.

Saa ɛkɛla mɔɔ ɛnwu ɛlɛ ngilehilelɛ ne abo ɛnvi Yidɛn a, ɛnee kenlenzu a ɔbɔle ɔ bo a? Yɛnrɛhola yɛnrɛzi ye pi. Yɛze kɛ bɛzɛkyele adalɛ ɛzonlenlɛ kɔsɔɔti wɔ Nowa mekɛ zo Azuyilɛ ne anu. Kɛ mɔɔ Nowa nee ye abusua ne mɔɔ bɛle nɔhalɛ azonvolɛ la ala a nyianle ngoane wɔ Azuyilɛ ne anu la ati, ɛnee bɛ nuhua biala ɛnrɛmaa adalɛ ngilehilelɛ ɛnrɛdɛlɛ.

Yemɔti, ɔbayɛ kɛ ɛkɛla mɔɔ ɛnwu ɛlɛ ngilehilelɛ ne mɔɔ ɛbu la bɔle ɔ bo wɔ Azuyilɛ ne anzi. Mɔɔ Nyamenle maanle menli mɔɔ wɔ Babɛle aneɛ ne yɛle ngakyile ngakyile na bɛbɔle asande bɛhɔle “azɛlɛ ne azo ɛleka biala” la, ɔda ali kɛ ɛnee bɛlɛ ɛkɛla mɔɔ ɛnwu ɛlɛ ngilehilelɛ ne anwo adwenle. (Gyn. 11:8, 9) Ɔnva nwo mekɛ mɔɔ zɔhane adalɛ ngilehilelɛ ne bɔle ɔ bo la, yɛbahola yɛalie yɛali kɛ Seetan Abɔnsam, “adalɛ kɔsɔɔti bɛ ze” ne a gyi ɔ nzi a, na ɔ nye liele kɛ adalɛ ɛhye ɛlɛtɛlɛ ewiade ɛleka biala la.​—Dwɔn 8:44.