Ɛbahola Wɔaboka Menli Mɔɔ Banyia Ngoane La Anwo

Baebolo ne ka kɛ awieleɛ ne bahile ɛzɛkyelɛ: “Anwongyelelɛ mɔɔ bara mekɛ zɔhane anu la, ye ɛzulolɛ, sumunli kɛ ewiade bɔle ɔ bo dedee mɔɔ yeradwu ɛnɛ la, bie ɛtɛsile ɛlɛ, . . . Yede mekɛ ne azo, saa tɛ ye zɔhane a anrɛɛ sonla ko bɔbɔ ɛnrɛha.” (Mateyu 24:21, 22) Noko Nyamenle bɔ ɛwɔkɛ kɛ menli dɔɔnwo banyia ngoane: “Ewiade ne . . . bapɛ nu aze, na sonla ne mɔɔ yɛ Nyamenle ɛhulolɛdeɛ la de aze dahuu.”​—1 Dwɔn 2:17.

Saa ɛkulo kɛ ɛnyia ngoane na ‘ɛtɛnla aze dahuu’ a, duzu a ɔwɔ kɛ ɛyɛ a? Asoo ɔwɔ kɛ ɛboɔboa agyadeɛ nloa ɛsie? Kyɛkyɛ. Baebolo ne tu yɛ folɛ kɛ yɛva ninyɛne mɔɔ hyia kpalɛ la yɛzie yɛ nye zo. Yɛkenga kɛ: “Na saa bɛbazɛkye ewiade ye amuala wɔ adenle zɛhae anu a, ɛnee bɛdabɛ bɛnea a duzu menli a ɔwɔ kɛ bɛyɛ a? Ɔwɔ kɛ bɛyɛ menli mɔɔ bɛ ɛbɛla nwo te saanwu na bɛtu bɛ nwo bɛmaa Nyamenle, wɔ mekɛ mɔɔ bɛlɛkendɛ na bɛ nye la kɛ Nyamenle Kenle ne bara ndɛndɛ la.” (2 Pita 3:10-12) Edwɛkɛ ɛhye maa yɛnwu kɛ “ewiade ye amuala” mɔɔ bɛbazɛkye ye la a le menli mɔɔ di tumi wɔ ewiade ɛtane ɛhye anu nee menli kɔsɔɔti mɔɔ kulo tumililɛ ɛhye tɛla Nyamenle ɛdeɛ ne la. Ɔda ali kɛ, saa yɛboɔboa agyadeɛ nloa bɔbɔ a, ɔnrɛhola ɔnrɛlie yɛ ngoane.

Nɔhalɛ nu, saa yɛbanyia ngoane a ɔwɔ kɛ yɛtu yɛ nwo yɛmaa Gyihova Nyamenle na yɛsukoa subane nee nyɛleɛ mɔɔ sɔ ɔ nye la. (Zɛfanaya 2:3) Kɛ anrɛɛ yɛbali menli dɔɔnwo ne anzi na yɛabu yɛ nye yɛagua sɛkɛlɛneɛ mɔɔ kile kɛ yɛde mekɛ mɔɔ anwo hyia anu azo la, ɔwɔ kɛ ‘yɛ nye da kɛ Gyihova Kenle ne bara ndɛndɛ.’ Gyihova Alasevolɛ bahola alua Baebolo ne azo ahile wɔ kɛzi ɛbahola wɔanyia ngoane wɔ kenle ɛhye mɔɔ ɛlɛba la anu.