Nyamenle Belemgbunlililɛ​—Kɛzi Ɔbaboa Wɔ Ɛ?

Bie a ɛnwunle ye wɔ edwɛkɛ ne mɔɔ lumua la anu kɛ Nyamenle Belemgbunlililɛ ne hyia Gyihova Alasevolɛ. Bie noko a ɛ nye liele kenlebie Nyamenle Belemgbunlililɛ ne anu nyilalɛ bie mɔ mɔɔ bɛhanle nwolɛ edwɛkɛ la anwo. Noko bie a, ɛngola ɛnnwu ye kɛ ɛwɔkɛ ɛhye mɔ bara nu a.

Ɔwɔ kɛ ɛfi nrɛlɛbɛ nu ɛnea boɛ na wɔanlie debie biala mɔɔ ɛkɛde la wɔanli. (Mrɛlɛbulɛ 14:15) Adenle bie azo, ɛbayɛ tete Bɛliamaa ɛdeɛ ne bie. Mekɛ mɔɔ lumua mɔɔ bɛdele Belemgbunlililɛ ne anwo edwɛkpa ne la, Bɛliama ne liele lile, noko ɛnee tɛ kɛmɔ bɛsuzu kɛ ɔle nɔhalɛ la ati ɔ. Emomu, bɛnleanle Ngɛlɛlera ne anu kpalɛ kɛ mɔɔ bɛdele “la le nɔhalɛ a.” (Gyima ne 17:11) Ɛhye kile kɛ, Bɛliama ne vale edwɛkpa ne mɔɔ bɛdele la totole mɔɔ Ngɛlɛlera ne ka la anwo. Mekɛ hɔle bie la, bɛliele bɛlile kɛ edwɛkpa ne gyi Nyamenle Edwɛkɛ ne azo kpundii.

Gyihova Alasevolɛ kulo kɛ ɛdawɔ noko ɛbɔ mɔdenle ɛyɛ zɔ. Ɔlua yɛ Baebolo ɛzukoalɛ ngyehyɛleɛ ne mɔɔ yɛnlie ɛhwee la azo, yɛmaa wɔ adenle kɛ fa mɔɔ Gyihova Alasevolɛ die di wɔ Nyamenle Belemgbunlililɛ ne anwo la toto mɔɔ Baebolo ne kilehile la anwo.

Saa ɛye Belemgbunlililɛ ne anwo debie mɔɔ ɛbazukoa la ɛsie ahane a, Baebolo ne mɔɔ ɛbazukoa la baboa wɔ yeamaa wɔanwu ɛbɛlabɔlɛ nu kpuyia mgbole.

• Nienwu a yɛvi a?

• Ɛbɛlabɔlɛ bodane a le duzu?

• Duzu ati a Nyamenle maa amaneɛnwunlɛ nwo adenle a?

• Yɛwu a yɛkɔ ni?

• Asoo bɛbazɛkye azɛlɛ ye?

• Duzu a maa abusua ɛbɛlabɔlɛ yɛ anyelielɛ a?

Mɔɔ hyia kpalɛ la, ɛsukoa Baebolo ne a ɔbaboa wɔ yeamaa ‘wɔabikye Nyamenle.’ (Gyemise 4:8) Saa ɛbikye Nyamenle kpalɛ a, ɛbanwu kɛzi Nyamenle Belemgbunlililɛ ne baboa wɔ kpalɛ ɛnɛ nee kenlebie la. Gyisɛse hanle ye wɔ asɔneyɛlɛ nu hilele ɔ Ze kɛ: ‘Ɛhye le dahuu ngoane kɛ bɛbanwu wɔ, nɔhalɛ Nyamenle kokye ne, nee mɔɔ ɛzoanle ye la, Gyisɛse Kelaese.’​—Dwɔn 17:3.