“Eureka Drama” Ne Manle Menli Dɔɔnwo Nwunle Baebolo Nu Nɔhalɛ Ne

“EUREKA!” Zɔhane edwɛkɛkpɔkɛ ne kile kɛ “Menwu ye!” Wɔ ɛvoya 19 ne anu, ɛnee menli ɛlɛpele akpondɛ nvutuke wɔ California, U.S.A., saa bɛnwu bie a ɛnee bɛdea nu bɛha edwɛkɛkpɔkɛ ɛhye. Noko, ɛnee Charles Taze Russell nee ɔ gɔnwo mɔ Baebolo Sukoavoma ɛnwu debie mɔɔ sonle bolɛ tɛla nvutuke la​—Baebolo nu nɔhalɛ ne. Ɛnee bɛ nwo pele bɛ kɛ bɛbabɔ ye nolo.

Wɔ wawaa mekɛ nu, wɔ 1914, menli dɔɔnwo mɔɔ bɛwɔ azuamgbole zo la nleanle “Photo-Drama of Creation” ne mɔɔ le dɔnehwele mɔtwɛ sini mɔɔ International Bible Students Association (I.B.S.A.) ne yɛle la. Bɛluale nvoninli mɔɔ bɛyɛ ye kɔla na bɛkeha bɛ nwo, ɛdendɛlɛ mɔɔ yɛ anyelielɛ nee edwɛne mɔɔ le bɛtɛɛ la azo bɛmanle menli mɔɔ nleanle sini ɛhye la dele Baebolo nu edwɛkɛ mɔɔ bie a le kɛzi bɛbɔle ninyɛne, alesama tetedwɛkɛ kɔkpula Gyisɛse Kelaese Ɛvolɛ Apenle Ko Tumililɛ ne awieleɛ la abo.​—Yek. 20:4.a

Na bɛdabɛ mɔɔ ɛnee bɛwɔ namunamu zo la noko ɛ? Amaa awie biala mɔɔ kpondɛ nɔhalɛ ne anyia bie anlea la, wɔ August 1914, I.B.S.A. ne yɛle “Eureka Drama” ne mɔɔ ɔle “Photo-Drama” ne foa ekyi la. Bɛyɛle ye ngakyile nsa, ko biala wɔ aneɛ ngakyile nu mɔɔ ɛbahola wɔanlea mɔɔ ɛkulo a: Edwɛkɛ mɔɔ bɛhye nee edwɛne ne kɔsɔɔti wɔ “Eureka X” ne azo. Ɛnee ɛdendɛlɛ mɔɔ bɛhye nee nvoninli ngɛnlɛma mɔɔ kakyihakyi la wɔ “Eureka Y” ne azo. Yɛɛ bɛyɛle “Eureka Family Drama” ne kɛ bɛbanlea ye wɔ azua nu, bɛvale ɛdendɛlɛ nee ɛzonlenlɛ nu edwɛne a bɛyɛle a. Eza ɛbahola wɔanyia gramafuu nee milahyinli mɔɔ bɛfa bɛye sini mɔɔ ye bolɛ ɛnyɛ se la noko.

Ɛnee Baebolo Sukoavoma ne ɛngyia milahyinli gyɛne biala na bɛahola bɛaye sini ɛhye mɔɔ bɛnlie ezukoa la wɔ namunamu zo bɛabɔ Belemgbunlililɛ edwɛkɛ ne nolo wɔ azɛlɛsinli fofolɛ nu. Ɛnee bɛkola bɛbɔ “Eureka X” ne mɔɔ ɛdendɛlɛ ala a wɔ zo la alehyenlɛ nu anzɛɛ nɔsolɛ nu. Bɛkola bɛfa kabade kɛnlaneɛ noko bɛye “Eureka Y” sini ne. Finnish Ɛzinzalɛ Arane ne bɔle amaneɛ kɛ, “Asɛɛ yɛkola yɛye sini ɛhye wɔ ɛleka biala.” Ɛnee ɛhye le nɔhalɛ bɔkɔɔ!

Kɛ anrɛɛ bɛbahaye nwɔhoalilɛ ɛleka mgbole la, Baebolo Sukoavoma ne yɛle ye wɔ ɛleka mɔɔ bɛnlie ezukoa le kɛ sukulu azua, kɔɔto azua, keteke agyinlaleɛ, nee azua mɔɔ bɛ asalo le mgbole la anu. Bɛyele dɔɔnwo wɔ ɛdanlɛ fufule mɔɔ bɛva bɛhenda bane nwo la azo wɔ alie nwo. Anthony Hambuch hɛlɛle kɛ: “Ɛyazonlɛma yɛle bama ekyi wɔ bɛ ɛya nu bɛmanle menli dɛnlanle mbaka azinli zo nleanle bie wɔ ɛkɛ.” Ɛnee mediema mɔɔ ye “Eureka” ne la, fa bɛ baage, bɛ milahyinli, bɛ ɛkpa, nee ninyɛne mɔɔ bɛfa bɛto aleɛ la gua “ehwili” mɔɔ ɛkpɔnwɔ twe la anu.

Menli mɔɔ nleanle “Eureka” ne la bie mɔ anwo anzo yɛɛ bie mɔ noko anwo zonle. Wɔ United States, menli 400 nleanle sini ne wɔ sua bie mɔɔ menli 150 a wɔ zo la azo. Bie mɔ diale mayɛlɛ nnu (km 8) hɔnleanle “Eureka Drama” ne. Wɔ Sweden, Charlotte Ahlberg agɔnwo mɔ mɔɔ yiale nu wɔ ye sua nu nleanle bie la “anye liele kpole.” Menli kɛyɛ 1,500 nleanle sini ne wɔ namule bie mɔɔ bɛtu nvutuke wɔ zo wɔ Australia la azo. Ɛzinzalɛ Arane ko bɔle amaneɛ kɛ wɔ sukunwiɔ nee kɔlegyi nu, “kilehilevolɛma nee sukuluma anye die sini ne nee yɛ edwɛne ne mɔɔ bɛhye la anwo kpalɛ.” Ɛnee bɛnea “Eureka Drama” ne wɔ ɛleka dɔɔnwo.

NƆHALƐ MA NE ƐGUALƐ

“Eureka Drama” ne boale Baebolo Sukoavoma mɔɔ ɛnee bɛsoa bɛ bɛmaa bɛkɔte ekpunli fofolɛ la kpalɛ. Yɛnrɛhola yɛnrɛzi menli dodo mɔɔ nleanle “Eureka Drama” ne la pi. Menli dɔɔnwo kpalɛ nleanle “Drama” ne. Noko, wɔ 1915, ɛnee “Drama” ekpunli 86 ne anu 14 pɛ a dahuu fa mgbondabulɛ ba a. Ɛnee yɛdi nyane kɛ yɛ mgbonda ɛbulɛ ne ɛnli munli la, noko saa yɛka ye kɔsɔɔti yɛbɔ nu a, menli mɔɔ bo mgbe ko la a nleanle “Drama” ne wɔ ɛvolɛ ne anu a. Menli kɛyɛ 30,000 liele Baebolo nwo mbuluku.

“Eureka Drama” ne ɛnle debie mɔɔ bɛkakye ye kpalɛ wɔ tetedwɛkɛ nu ɛdeɛ, noko ɔvi Australia kɔdwu Argentina, South Africa kɔdwu British Isles, India yɛɛ Caribbean, menli mgbe dɔɔnwo nleanle drama ɛhye. Bɛ nuhua dɔɔnwo nwunle Baebolo nu nɔhalɛ ne mɔɔ sonle bolɛ tɛla nvutuke la na bɛdeanle nu kɛ “Eureka!”