BAEBOLO KPUYIA MƆƆ BƐBUA
Asoo yɛbahola yɛadɛnla aze dahuu?
Debie boni a bahola alie yɛ avi ewule nu a?
Adam, nrenya ne mɔɔ lumua la dɛnlanle aze wɔ ɛvoya dɔɔnwo anu. Noko awieleɛ kolaa ne, ɔyɛle kpanyinli na ɔwule. Ɔvi zɔhane mekɛ ne, menli ɛlua ndenle dɔɔnwo azo ɛkpo kɛ bɛkɛyɛ mgbanyinli. Noko awie biala ɛnle ɛkɛ mɔɔ ɛhola ɛnriandi ewule a. Kɛmɔti ɛ? Adam yɛle kpanyinli na ɔwule ɔluakɛ ɔyɛle Nyamenle anwo anzosesebɛ na ɔyɛle ɛtane. Yɛyɛ mgbanyinli ɔluakɛ yɛnyianle ɛtane nee ewule mɔɔ vi nu ba la, yɛvile Adam ɛkɛ.—Kenga Mɔlebɛbo 5:5; Wulomuma 5:12.
Saa yɛbadɛnla aze dahuu a, yɛhyia awie mɔɔ badua ɛkpɔnedeɛ amaa yɛ la. (Dwobu 33:24, 25) Ɛkpɔnedeɛ a le ezukoa mɔɔ bɛtua bɛdie awie la, na wɔ yɛ afoa nu, ɔwɔ kɛ bɛdie yɛ bɛfi ewule nu. (Adendulɛ 21:29, 30) Gyisɛse duale kakɛ ne wɔ mekɛ mɔɔ ɔwule ɔmanle yɛ la.—Kenga Dwɔn 3:16.
Kɛ ɔkɛyɛ na yɛadɛnla aze dahuu ɛ?
Tɛ awie biala a anwo badɔ ye wɔ anwodolɛ nee kpanyinliyɛlɛ nwo a. Nɔhalɛ nu, menli mɔɔ yɛ Nyamenle anwo anzosesebɛ kɛmɔ Adam yɛle la ɛnrɛnyia ngoane ɛhye bie. Menli mɔɔ bɛva bɛ ɛtane bɛhyɛ bɛ la ala a badɛnla aze dahuu a.—Kenga Ayezaya 33:24; 35:3-6.
Saa bɛbava yɛ ɛtane bɛahyɛ yɛ a ɔwɔ kɛ yɛyɛ nwolɛ debie. Ɔwɔ kɛ yɛnwu Nyamenle ɔlua ye Edwɛkɛ Baebolo ne mɔɔ yɛbazukoa la azo. Ɔmaa yɛnwu kɛzi yɛbanyia asetɛnla kpalɛ yɛɛ ɔkile yɛ kɛzi yɛbanyia Nyamenle anyunlu ɛlolɛ na yɛadɛnla aze dahuu la.—Kenga Dwɔn 17:3; Gyima ne 3:19.