Kɛzi Bɛgyinla Bokavolɛ Ewule Nloa La

BAEBOLO ne ka ye wienyi kɛ: Ɔwɔ kɛ kunli biala “kulo ɔ ye kɛ ɔdaye ɔ nwo” na yelɛ biala “di ɔ hu eni.” Ɔwɔ kɛ bɛ mu nwiɔ bɛyɛ bɛ gyima kɛ bɛle “nwonane ko.” (Ɛfɛ. 5:33; Mɔl. 2:23, 24) Mekɛ ɛlɛkɔ la ɛnee anwofamaa mɔɔ agyalɛma lɛ maa bɛ nwo la ɛlɛyɛ kpole kɛ bɛ ɛlɔlɛ ne la. Yɛbahola yɛava yɛado mbaka nwiɔ mɔɔ bɛbikye nwo mɔɔ bɛlɛnyi la ndinli ne mɔ anwo. Kunli nee yelɛ nganeɛdelɛ nee bɛ anyelielɛ ka bɛ bɔ nu.

Na saa kunli ne anzɛɛ yelɛ ne wu ɛ? Koyɛlɛ ne mɔɔ debie biala ɛngola ɛnzɛkye ye wɔ mekɛ mɔɔ bɛde ngoane nu la ba awieleɛ. Alɔbɔlɛlilɛ, anwokoonwuyɛlɛ, ɛyavalɛ anzɛɛ fɔlɛlilɛ kola gyegye kunlavolɛ ne kpalɛ. Ɛnee Daniella, mɔɔ yegya ɛvolɛ 58 la ze menli dɔɔnwo mɔɔ bɛ bokavolɛ ɛwu la.a Noko mɔɔ ɔ hu wule la, ɔhanle kɛ: “Ɛnee mende tɛnlabelɛ ɛhye abo fee. Saa bie ɛtɛtole wɔ a ɛnrɛde ɔ bo ɛlɛ.”

NYANE MƆƆ BƐDI YE MEKƐ TENDENLE

Bɛdabɛ mɔɔ bɛyɛ neɛnleanu la bie mɔ ka kɛ saa wɔ bokavolɛ mɔɔ ɛkulo ye kpalɛ la wu a, ɔyɛ nyane ɔtɛla debie biala. Menli dɔɔnwo mɔɔ bɛ nwo sonla ɛwu la ze kɛ ɔle nɔhalɛ zɔ. Millie ahu ɛwu mekɛ tendenle. Noko ɔka kɛzi ɔte nganeɛ kɛ kunlavolɛ raalɛ la anwo edwɛkɛ kɛ: “Mete nganeɛ kɛ mele abubura.” Ɛnee ɔlɛfa yeahile nganeɛ mɔɔ ɔte ɔvi mekɛ mɔɔ ɔ hu wule la anu, ye ɛvolɛ 25 ɛne.

Ɛnee Susan te nganeɛ kɛ ahunlanvolɛ mraalɛ mɔɔ su bɛ hu mɔ mekɛ tendenle la, yɛ maa ɔ bo zo. Nzinlii ɔ hu mɔɔ yegya ye ɛvolɛ 38 la wule. Ɛvolɛ 20 ɛze noko ɔka kɛ: “Mekakye ye alehyenlɛ biala.” Fane dɔɔnwo ne ala, ɔsu ɔluakɛ ɔ nwo dɔ ye.

Baebolo ne ka kɛ nyanelilɛ mɔɔ dɔvolɛ bie ewule fa ba la anu yɛ se na ɔdie mekɛ tendenle na yeavi ɛkɛ. Mekɛ mɔɔ Sɛla wule la, ɔ hu “Ebileham zunle ye.” (Mɔl. 23:1, 2) Ɔnva nwolɛ kɛ ɛnee Ebileham lɛ diedi kɛ bɛbadwazo mɔwuamra la, ɔlile nyane kpole wɔ mekɛ mɔɔ ye kulovolɛ ne wule la. (Hib. 11:17-19) Mɔɔ Gyekɔbo aye Relahyɛle wule la, ɔ rɛle anvi ye ɛkɛ ne ala. Ɔhanle kɛzi ɛnee ɔkulo ye la anwo edwɛkɛ dɔɔnwo ɔhilele ɔ mra ne mɔ.—Mɔl. 44:27; 48:7.

Duzu a yɛsukoa yɛfi Baebolo nu neazo ɛhye mɔ anu a? Ahunlanvolɛ mrenya nee mraalɛ di nyane ɛvolɛ dɔɔnwo. Ɔnle kɛ yɛbu bɛ ɛzunlɛ nee bɛ alɔbɔlɛlilɛ ne kɛ bɛ sinlidɔlɛ, emomu ɔwɔ kɛ yɛte ɔ bo kɛ bɛ kulovolɛ ne mɔɔ ɛwu la a ɛmaa yera ye zɔ a. Bɛhyia yɛ anwunvɔnezelɛ nee yɛ moalɛ mekɛ tendenle.

YƐ YE NGYIKYI NGYIKYI

Yɛnrɛhola yɛnrɛha kɛ kunlavolɛ raalɛ anzɛɛ nrenya ɛbɛlabɔlɛ sia yɛ kɛ mekɛ mɔɔ ɛnee ɔle belazinli la. Kunli ze kɛzi ɔbakyekye ɔ ye arɛle na yeamaa ye anwosesebɛ wɔ mekɛ mɔɔ ɔ rɛle ɛbɔ anzɛɛ ɔ sa nu ɛdo la. Yemɔti saa ɔwu a, ɛnee ɔ ye ɛlɔlɛ nee ye arɛlekyekyelɛ ɛvileka ne noko ɛminli. Zɔhane ala yɛɛ yelɛ noko sukoa kɛzi ɔbabɔ ɔ hu anwo bane na yeamaa ɔ nye alie a. Debie biala ɛnle ɛkɛ mɔɔ kunli bava ado nyɛleɛ nee ɛdendɛlɛ kɛnlɛma mɔɔ ɔ ye dua zo di ye ngyianlɛ nwo gyima la anwo a. Saa yelɛ ne wu a, kunli ne te nganeɛ kɛ ɛhye mɔ ɛra awieleɛ. Yemɔti, menli mɔɔ bɛ bokavolɛ ɛvi nu la bie mɔ ɛnlɛ anyelazo yɛɛ bɛsulo mɔɔ ɔbado bɛ kenlebie la. Baebolo nu ngyinlazo boni a baboa bɛ yeamaa bɛanyia anwobanebɔlɛ nee anzondwolɛ a?

Nyamenle baboa wɔ ngyikyi ngyikyi yeamaa wɔagyinla

“Bɛmmadwenle ɛhyema anwo; ɛhyema ɔdaye ɔ nee ɔ ti anwo adwenleadwenle ɛdeɛ lua.” (Mat. 6:34) Edwɛkɛ ɛhye mɔɔ Gyisɛse hanle la fane nwonane afoa nu ngyianlɛ nwo titile, noko yeboa menli dɔɔnwo mɔɔ bɛ dɔvolɛ bie ɛwu la yemaa bɛgyinla bɛ nyanelilɛ nloa. Mɔɔ siane dɔɔnwo pɛle nu wɔ kunlavolɛ nrenya Charles aye ne ewule nzi la, ɔhanle kɛ: “Ɔzɔho kɛ metɛdi Monique ewule ne anwo nyane kpole, na ɔdwu mekɛ ne bie a ɛnee ɔyɛ se. Noko, menwu kɛ nvonleɛ biala ɛnle nwo kɛ mebali nyane, wɔ mekɛ kpalɛ nu, ɔbavi ɛkɛ bɔkɔɔ.”

Mɔɔ “mekɛ guale nu la,” ɛnee ɔwɔ kɛ Charles gyinla ye nyanelilɛ ne anloa. Kɛzi ɔyɛle ye ɛ? Ɔka kɛ, “Gyihova boale me ɔmanle menlile nwolɛ gyima ngyikyi ngyikyi.” Charles nyanelilɛ ne anvo ɔ nwo zo yɛɛ yeanvi ɛkɛ kenle ko ala. Saa wɔ kulovolɛ bie ɛwu a, bɔ mɔdenle kɛ ɛbagyinla nyanelilɛ ne anloa ngyikyi ngyikyi kenle ko biala. Ɛnze moalɛ anzɛɛ anwosesebɛ mɔɔ ɛbanyia ye kenle ko biala a.

Ɛnee ewule ɛmboka Gyihova alumua bodane nwo. Ɔboka “Abɔnsam gyima” nwo. (1 Dwɔn 3:8; Wulo. 6:23) Seetan ɛmaa menli dɔɔnwo mɔɔ bɛsulo ewule la ɛyɛ ahanra na bɛnlɛ anyelazo biala. (Hib. 2:14, 15) Saa awie te nganeɛ kɛ ɔnrɛhola ɔnrɛnyia anyelielɛ nee ahunlundwolɛ, bɔbɔ wɔ Nyamenle ewiade fofolɛ ne anu a, ɔmaa Seetan anye die kpalɛ. Yemɔti, ɔlua sinlidɔlɛ mɔɔ yɛnyianle yɛvile Adam nee Seetan agyiba ɛhye mɔ anu la ati a, awie kulovolɛ bie wu a ɔdi nwolɛ nyane a. (Wulo. 5:12) Gyihova bali ngyegyelɛ ɛhye mɔɔ Seetan ɛva ɛra la anwo gyima bɔkɔɔ ɔlua ye akodeɛ titile, ewule mɔɔ ɔbaye yeavi ɛkɛ la azo. Bɛdabɛ mɔɔ bɛnzulo ewule kɛmɔ Seetan maa menli sulo la, anu dɔɔnwo anwo menli ɛwu.

Nzenzaleɛ dɔɔnwo bahɔ zo wɔ alesama mbusua mɔɔ bɛbadwazo bɛ bɛara ngoane nu wɔ azɛlɛ ye azo la anu. Dwenle yɛ awovolɛ, yɛ nlenya mɔ nee yɛ mbusuafoɔ ngakyile mɔɔ bɛbara ngoane nu na bɛ nee bɛ mra nee bɛ nlɔnra abɔ nu ali munli la anwo. Bɛbaye mɔɔ kpanyinliyɛlɛ fa ba la bɛavi ɛkɛ. Asoo mgbavolɛ bɛanyia adwenle kpalɛ wɔ mgbanyima nwo adɛla mɔɔ ɛlɛkɔ zo ɛnɛ la ɔ? Ɛnlie ɛnli kɛ ɛhye bayɛ nzenzaleɛ kpalɛ mɔɔ ɔbahɔ zo wɔ alesama mbusua nu ɔ?

Yɛbahola yɛadwenledwenle kpuyia dɔɔnwo mɔɔ yɛbabiza mɔwuamra mɔɔ bɛbadwazo bɛ, le kɛ bɛdabɛ mɔɔ bɛ kulovolɛma wule la anwo. Sadusiima bizale raalɛ bie mɔ ɔ hu mɔɔ lumua, mɔɔ tɔ zo nwiɔ, toonwo mɔɔ tɔ zo nsuu la wule la anwo kpuyia. (Luku 20:27-33) Abusuabɔlɛ boni a bɛadɛnla menli ɛhye mɔ avinli wɔ ewudwazo ne anu a? Yɛnze, yɛɛ nwolɛ ɛngyia kɛ yɛbava ninyɛne mɔɔ yɛnze la yɛagyegye yɛ nwo kɛkala. Mɔɔ ɔhyia kɛ yɛyɛ la a le kɛ yɛbanyia Nyamenle anu anwodozo. Nɔhalɛ ko a le kɛ, debie biala mɔɔ Gyihova bayɛ ye kenlebie la le kpalɛ, yɛkola yɛnea ye ade mɔɔ ɔnle kɛ yɛsulo a.

EWUDWAZO ANYELAZO NE KYEKYE YƐ RƐLE

Baebolo ngilehilelɛ ko mɔɔ anu la ɛkɛ la a le ewudwazo ne. Baebolo kɛlɛtokɛ mɔɔ fane menli mɔɔ bɛdwazole bɛ bɛvile ewule nu wɔ tete ne anwo la maa yɛnwu kɛ “mɔwuamra amuala bade [Gyisɛse ane] wɔ bɛ nla ne mɔ anu, na bɛvi bɛ nla ne mɔ anu bɛbavinde.” (Dwɔn 5:28, 29) Menli mɔɔ bɛbanwu mekɛ zɔhane la bava anyelielɛ ayɛ bɛdabɛ mɔɔ bɛbadwazo bɛ bɛavi ewule nu la akoaba. Noko, yɛnrɛhola yɛnrɛhile kɛzi mɔwuamra mɔɔ bɛbadwazo bɛ anye balie la anu.

Bɛdwazo mɔwuamra a, anyelielɛ kpole mɔɔ bie ɛtɛsile ɛlɛ la bayi azɛlɛ ye. Bɛbadwazo menli mgbe mgbe dɔɔnwo mɔɔ bɛwu la bɛara ngoane nu bieko. (Maake 5:39-42; Yek. 20:13) Menli mɔɔ bɛ kulovolɛ bie ɛwu la dwenledwenle nwanwane deɛ ɛhye mɔɔ ɔbazi kenlebie la anwo a, bɛ rɛle bakyekye.

Asoo debie wɔ ɛkɛ mɔɔ ɔbamaa awie ali nyane wɔ zɔhane mekɛ ne ɔ? Baebolo ne bua kɛ kyɛkyɛ. Ayezaya 25:8 ka kɛ: ‘Gyihova bame ewule bɔkɔɔ.’ Amaneɛnwunlɛ nee nyane mɔɔ ewule fa ba la amuala boka nwo ɔluakɛ ngapezo ne eza ka kɛ: “Awulae Nyamenle ne bakyikyi awie biala anye anwo monle.” Saa ɛlɛdi alɔbɔlɛ kɛkala ɔluakɛ wɔ dɔvolɛ bie ɛwu a, ewudwazo ne le debie mɔɔ ɔwɔ kɛ ɔmaa ɛ nye die a.

Dasanli biala ɛngola ɛnde mɔɔ Nyamenle bayɛ ye wɔ ewiade fofolɛ ne anu la amuala abo bɔkɔɔ. Gyihova se: “Kɛ anwumaneamra si wɔ anwuma tɛla azɛlɛ ye la, zɔhane ala yɛɛ me ndenle le mgbole na me adwenle le kpole tɛla bɛ ɛdeɛ ne mɔ a.” (Aye. 55:9) Gyisɛse ɛwɔkɛ mɔɔ fane ewudwazo ne anwo la maa yɛnyia Gyihova anu diedi kɛmɔ Ebileham nyianle la. Debie mɔɔ ɔhyia kɛ Keleseɛnenli ko biala yɛ ye kɛkala la a le kɛ ɔbayɛ mɔɔ Nyamenle kpondɛ kɛ yɛyɛ la, amaa bɛabu ye nee mɔwuamra mɔɔ bɛbadwazo bɛ la kɛ bɛ nwo “fɛta Nyamenle Belemgbunlililɛ ne.”—Luku 20:35.

MƆƆ MAA YƐNYIA ANYELAZO

Nyia anyelazo, mmamaa ɛzulolɛ ka wɔ. Wɔ sonla nye zo, anyelazo biala ɛnle ɛkɛ. Noko Gyihova maa yɛnyia debie kpalɛ bie anwo anyelazo. Yɛnze adenle mɔɔ Gyihova balua zo ava mɔɔ yɛhyia nwo nee mɔɔ yɛkulo la amaa yɛ ɛdeɛ, noko ɔnle kɛ yɛ adwenle yɛ yɛ nwiɔ nwiɔ. Ɛzoanvolɛ Pɔɔlo hɛlɛle kɛ: “Awie ɛmmaa ɔ nye ɛnla debie mɔɔ ɔ nye gyi nwolɛ la azo. Na nwane bɔbɔ yɛɛ kɛmaa ɔ nye kɛla debie mɔɔ ɔ nye gyi nwolɛ la azo a? Saa yɛmaa yɛ nye da debie mɔɔ yɛ nye ɛngyi nwolɛ la azo a, yɛɛ yɛfa abotane yɛkendɛ ye ɛnyianlɛ a.” (Wulo. 8:24, 25) Nyamenle ɛwɔkɛ ne mɔ anu diedi kpole bamaa wɔagyinla kpundii. Saa ɛnyia abotane ɛgyinla kpundii a, ɛbanwu kenlebie kpalɛ ne mɔɔ Gyihova bamaa “wɔanyia mɔɔ ɛkpondɛ la.” Ɔbamaa “tease abɔdeɛ biala akunlu [a]dwo ɔ nwo.”—Edw. 37:4; 145:16; Luku 21:19.

Fa ɛ nwo to ɛwɔkɛ mɔɔ Gyihova ɛbɔ la azo

Ɔka ekyii Gyisɛse wu la, ye ɛzoanvolɛ ne mɔ adwenle zɛkyele. Gyisɛse luale edwɛkɛ ɛhye azo kyekyele bɛ rɛle: “Bɛmmamaa bɛ rɛle bɔ na bɛdi nyane. Bɛlie Nyamenle bɛli na bɛlie medame noko bɛli.” Ɔhanle kɛ: “Menrɛgyakyi bɛ nrisa; mebara bɛ nwo bieko.” (Dwɔn 14:1-4, 18, 27) Ɛnee ye edwɛkɛ ne bamaa ye ɛdoavolɛma mɔɔ bɛkpokpa bɛ wɔ ewiade amuala la ngyinlazo kpalɛ mɔɔ bamaa bɛanyia anyelazo na bɛagyinla kpundii a. Ɔnle kɛ bɛdabɛ noko mɔɔ bɛ nye la kɛ bɛbanwu bɛ kulovolɛma wɔ ewudwazo ne anu la asa nu to. Gyihova nee ɔ Ra ne ɛnrɛmaa bɛnrɛyɛ ahunlanvolɛ dahuu. Die di kɛ ɛhye le nɔhalɛ edwɛkɛ!

a Tɛ bɛ alumua kpalɛ ɔ.

Bɛkyekye Menli Mɔɔ Debie Ɛdɔ Bɛ Nye Zo La Arɛle

Saa Keleseɛnenli mɔɔ yegya la wu a, menli dɔɔnwo kɔ ye sua nu ɛkɛ kɛ bɛkakyekye ye bokavolɛ ne arɛle na bɛayɛ ye moalɛ. Kɛ neazo la, kunlavolɛ raalɛ anye die nwo kɛ mbusua nee agɔnwolɛma barakpɔla ye. Noko akee, ɔbalie mekɛ na ye nyanelilɛ ne ara awieleɛ, yemɔti ɔbahyia arɛlekyekyelɛ nee moalɛ mekɛ tendenle. Baebolo ne ka kɛ: “Agɔnwolɛma lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenya a.”—Mrɛ. 17:17.

Kɛzi ɛbabiza awie mɔɔ ɔlɛdi alɔbɔlɛ la ahye ɛ? Baebolo ne tu folɛ kɛ: “Ɔwɔ kɛ bɛ muala bɛ adwenle yɛ ko; bɛde bɛ gɔnwo mɔ nyane bo na bɛhulo bɛ nwo ngoko ngoko kɛ bɛle mediema. Bɛnyia ahonle kpalɛ.” (1 Pita 3:8) Bie a ɔbalie mekɛ ekyii na Keleseɛnenli mɔɔ ɔ nwo sonla ɛwu la anye alie. Yemɔti, edwɛkɛ le kɛ “Kɛ ɔde ɛ?” anzɛɛ “Ɔle kpalɛ ɔ” mɔɔ adwenle kpalɛ bɔbɔ a yɛvale yɛhanle la, ɛnle ye adenle zo. Bie a ahenle ne mɔɔ ɛlɛdi alɔbɔlɛ la banyia adwenle kɛ, ‘Ɛnze nyane mɔɔ melɛdi la’ anzɛɛ, ‘Kɛzi ɔkola ɔyɛ kpalɛ ɔmaa me wɔ mekɛ ɛhye anu ɛ?’ Ɔlua ɛhye ati, ɔbayɛ kpalɛ kɛ ɛbaha edwɛkɛ le kɛ “Me nye ɛlie kɛ menwu wɔ a,” anzɛɛ “Saa menwu wɔ wɔ debiezukoalɛ bo a, ɔmaa me anwosesebɛ.”

Ɛbahola wɔado ɛsalɛ wɔavɛlɛ awie mɔɔ ɔ nwo sonla ɛwu la ɛ nee ye ali debie anzɛɛ ahɔ akpɔsa ekyii. Marcos, kunlavolɛ nrenya bie agɔnwo mɔ rakpɔlale ye na bɛkyekyele ɔ rɛle. Duzu adawu a bɛbɔle a? Ɔbɔle amaneɛ kɛ: “Bɛanga me ngyegyelɛ ne anwo edwɛkɛ dɔɔnwo, bɛhanle debie biala mɔɔ maa anwosesebɛ la anwo edwɛkɛ.” Nina mɔɔ ɔle kunlavolɛ la hanle kɛ: “Fane dɔɔnwo ne ala, me gɔnwo mɔ kpalɛ ne ka edwɛkɛ kpalɛ wɔ mekɛ kpalɛ nu. Ɔdwu mekɛ ne bie a bɛnga edwɛkɛ biala—bɛde me nwo ɛkɛ ne ala.”

Saa awie mɔɔ ɔ nwo sonla ɛwu la ɛlɛka ye anwubɛnyunlu ahile wɔ a, fa anyelielɛ nee abotane tie. Koati kɛ ɛbabiza kpuyia mɔɔ kile kɛ ɛlɛyɛ akpɔsemadi la. Mmabua ye ndɛne. Ɔngyia kɛ ɛbadu ye folɛ wɔ kɛzi ɔwɔ kɛ ɔdi nyane nee mekɛ dodo mɔɔ ɔwɔ kɛ ɔfa ɔyɛ zɔ la anwo. Saa ahenle kpondɛ kɛ ɔka ɔ ngome a, mmamaa ɔgyegye wɔ. Ɛbahola wɔazia wɔara mekɛ fofolɛ. Kɔ zo da ɛlɔlɛ ali.—Dwɔn 13:34, 35.

Ɛlɛ Mɔɔ Ɔbazi Kenlebie La Anwo Kpuyia Ɔ?

Ɔnle nvonleɛ kɛ yɛbadwenledwenle kenlebie nwo ɛwɔkɛ ngakyile mɔɔ Gyihova ɛbɔ yɛ la anwo. Ebileham dwenlenle ɛwɔkɛ mɔɔ Nyamenle bɔle kɛ ɔbawo ralɛ nrenya la anwo. Gyihova zile ye adua kɛ ɔzi abotane. Nrenya ɛhye mɔɔ di nɔhalɛ la abɛ nu ambu.—Mɔl. 15:2-5; Hib. 6:10-15.

Mekɛ mɔɔ bɛrabɔle Gyekɔbo amaneɛ kɛ ɔ ra Dwosefi ɛwu la, ɔlile nyane kpole. Ɛvolɛ dɔɔnwo pɛle nu la, ɛnee Gyekɔbo tɛdi ɔ ra ne mɔɔ ɔsuzu kɛ yewu la anwo nyane. Noko, Gyihova yilale nɔhavo Gyekɔbo dɛlale mɔɔ ɔzuzule la. Yeangyɛ, Gyekɔbo nee Dwosefi yiale, ɔlile fɛlɛko kɛ eza ɔnwunle ye nlɔnra la. Gyekɔbo hanle kɛ: “Meanla meandwenle kɛ menwɔnwu ɛ nyunlu, noko nea, Nyamenle ɛmaa menwu ɛ mra noko.”—Mɔl. 37:33-35; 48:11.

Duzu a yɛsukoa yɛfi edwɛkɛ ɛhye mɔ anu a? Mɔɔ lumua, nyia diedi kɛ debie biala ɛnrɛhola ɛnrɛzi Nyamenle Tumivolɛ Bedevinli ne ɛhulolɛdeɛ ɛyɛlɛ adenle. Mɔɔ tɔ zo nwiɔ, saa yɛ nzɛlɛlɛ nee mɔɔ yɛyɛ la nee Gyihova ɛhulolɛdeɛ yɛ ko a, ɔbanlea yɛ ɛnɛ na yeali yɛ ngyianlɛ nee mɔɔ yɛkulo la kɔsɔɔti anwo gyima kenlebie. Pɔɔlo hɛlɛle kɛ: “Anyunlunyia ɛlua asɔne ne nee Kelaese Gyisɛse anwo zo ɛha Nyamenle mɔɔ dua tumi ne mɔɔ yɛ gyima yɛ nu la azo maa ɔbo mɔɔ yɛbiza nee mɔɔ yɛdwenle nwo la azo la, wɔ ɛnɛ nee mekɛ mɔɔ ɛnlɛ awieleɛ! Amen.”—Ɛfɛ. 3:20, 21.