Duzu Ati A Menli Ka Kɛ Nyamenle Ati Yɛ Se Ɛ?

ASOO magazine ɛhye azo kpuyia ne si ɛ nwo? Ɔsi bie mɔ anwo, noko ɛnɛ menli dɔɔnwo ɛnnwu ye kɛ saa Nyamenle ati yɛ se a—anzɛɛ bɛbu ye kɛ ɔ ti yɛ se. Duzu ati ɔ?

Saa bie mɔ nyia bɛ ti wɔ esiane bie anu a bɛbiza kɛ: “Duzu ati a Nyamenle maa ninyɛne ɛhye mɔ si a? Ɔndwenle nwolɛ ɔ? Anzɛɛ ɔ ti yɛ se ɔ?”

Bie mɔ noko ɛlɛkenga Baebolo ne a edwɛkɛ ɛhye gyegye bɛ na bɛbiza kpuyia ko ne ala. Bɛkenga Nowa nee Azuyilɛ ne anwo edwɛkɛ na bɛbiza kɛ, ‘Duzu ati a Nyamenle mɔɔ lɛ ɛlɔlɛ la hunle menli zɔhane mɔ kɔsɔɔti ɛ? Ɔ ti yɛ se ɔ?’

Ɔyɛ a ɛbiza ɛ nwo kpuyia ɛhye ɔ? Anzɛɛ ɛngola ɛmbua bɛdabɛ mɔɔ bɛsuzu kɛ Nyamenle ati yɛ se la ɔ? Kɛ ɔde ye biala la, suzu kpuyia gyɛne mɔɔ baboa la anwo.

DUZU ATI A YƐKYI ATISESEBƐYƐLƐ A?

Saa yɛka ye sikalɛ a, yɛkyi atisesebɛyɛlɛ ɔluakɛ yɛze mɔɔ le kpalɛ nee ɛtane la. Ɛhye maa yɛyɛ ngakyile bɔkɔɔ yɛfi nane ne mɔ anwo. Yɛ Bɔvolɛ ne bɔle yɛ kɛ “ɔdaye ye ɛsaso la.” (Mɔlebɛbo 1:27) Duzu a ɛhye kile a? Ɔmaa yɛkola yɛda ye subane nee ɛbɛla kpalɛ nwo ngyinlazo ali, na yɛnwu kɛzi ɔbu kpalɛ nee ɛtane la. Suzu ɛhye anwo nea: Saa yɛnyianle kpalɛ nee ɛtane nwo adwenle yɛvile Nyamenle ɛkɛ na yɛkyi atisesebɛyɛlɛ a, asoo yemɔ ɛngile kɛ Nyamenle noko kyi ɔ?

Baebolo ne foa edwɛkɛ ɛhye azo, ɔluakɛ Nyamenle maa yɛ anwodozo wɔ Baebolo ne anu kɛ: “Me ndenle le mgbole yɛɛ me adwenle le kpole tɛla bɛ ɛdeɛ ne mɔ.” (Ayezaya 55:9) Saa yɛbu Nyamenle kɛ ɔ ti yɛ se a, asoo ɔnrɛyɛ edwɛkɛ ngakyile—mɔɔ kile kɛ yɛ ndenle le mgbole tɛla ye ɔ? Nrɛlɛbɛ wɔ nu kɛ yɛkɛkpondɛ nwolɛ edwɛkɛ dɔɔnwo na yɛaha ye zɔ. Bie a ɔnle kɛ yɛka kɛ Nyamenle ati yɛ se, emomu, ɔwɔ kɛ yɛbiza kɛ duzu ati a ye nyɛleɛ bie mɔ maa ɔyɛ kɛ asɛɛ ɔ ti yɛ se a. Amaa yeaboa yɛ la, bɛmaa yɛzuzu mɔɔ “atisesebɛ” amgba kile la anwo.

Saa yɛka kɛ awie ati yɛ se a, ɛnee yɛlɛkile kɛ ɔnlɛ adwenle kpalɛ. Sonla mɔɔ ati yɛ se la a le awie mɔɔ ɔnwu kɛ awie mɔ ɛlɛnwu amaneɛ a ɔ nye die anzɛɛ ɔndwenle bɛ amaneɛnwunlɛ ne anwo la. Yemɔti, selɛ mɔɔ tea ɔ ra nrenya ɔluakɛ ɔkulo kɛ ɔ ra nrenya ne di nyane la ati yɛ se. Noko selɛ mɔɔ tea ɔ ra nrenya ɔfa ɔkile ye debie anzɛɛ ɔbɔ ɔ nwo bane la le selɛ kpalɛ. Menli ɛnda ɛnnwu awie adwenle, saa awie ɛva adwenle ɛtane ɛzuzu wɔ ɛlɛ a ɛbade ɛhye abo.

Bɛmaa yɛzuzu ninyɛne nwiɔ mɔɔ ɔti bie mɔ dwenle kɛ Nyamenle ati yɛ se la anwo—esiane mɔɔ si ɛnɛ nee Baebolo ne anu edwɛkɛ mɔɔ kile kɛ Nyamenle hwenle menli nzo la. Asoo mɔɔ zile la kile kɛ Nyamenle ati yɛ se amgba?