Bɛdule Bɛ Nwo Bɛmanle—Wɔ Mexico

ƆYƐ yɛ fɛ kɛ yɛnwu kɛ Alasevolɛ ngakula dɔɔnwo ɛlɛyɛ dɔɔnwo wɔ Keleseɛne ɛzonlenlɛ gyima ne anu la. (Mat. 6:22) Duzu nzenzaleɛ a bɛyɛ a? Duzu ngyegyelɛ a bɛyia? Amaa yɛanwu ye la, maa yɛnlea bɛdabɛ mɔɔ bɛlɛsonle wɔ Mexico la anwo edwɛkɛ ekyi.

“ƐNEE ƆWƆ KƐ YƐYƐ NZENZALEƐ”

Dustin nee Jassa mɔɔ bɛvi United States la gyale wɔ January 2007. Yeangyɛ, bɛnyianle debie mɔɔ ɛnee bɛlɛkpondɛ ye ɛsesebɛ la—bɛdɔle ɛlɛne na bɛvale bɛlile gyima asɛɛ ɛvolɛ ko. Ɛnee bɛfa bɛ ɛlɛne ne bɛsie ɛleka kɛnlɛma bie mɔɔ zua Astoria, Oregon, U.S.A., suakpole ne mɔɔ ɛhoayelɛ nee awoka mɔɔ ezukɔtweaba tɔ gua zo ɛbɛnra ye ɛyia wɔ Pacific Nyevile ne anloa la. Dustin ka kɛ, “Ɛleka biala mɔɔ ɛbado ɛ nye la, ye kɛnlɛma ne yɛ azibɛnwo!” Agyalɛma ne dele nganeɛ kɛ bɛtete ninyɛne zo, bɛva bɛ nwo bɛdo Gyihova anwo zo. Bɛnyianle adwenle kɛ ‘yeanyɛ boɛ fee la, yɛlɛ ɛlɛne mɔɔ ye kpole le asɛɛ mita 8, yɛfa yɛ mekɛ ne foa yɛyɛ gyima, yɛkɔ debiezukoalɛ wɔ asafo mɔɔ bɛka aneɛ gyɛne la anu yɛɛ ɔvi mekɛ mɔɔ kɔ mekɛ la yɛyɛ adekpakyelɛ boavolɛ gyima ne bie.’ Mekɛ ekyi pɛle nu la, bɛnwunle kɛ bɛlɛbɛlɛbɛla bɛ nwo. Dustin ka kɛ, “kɛ anrɛɛ yɛbaboa asafo ne la ɛnee yɛfa yɛ mekɛ dɔɔnwo yɛsiezie yɛ ɛlɛne ne. Yɛnwunle kɛ saa yɛkulo kɛ yɛfa Gyihova yɛdumua a, ɛnee ɔwɔ kɛ yɛyɛ nzenzaleɛ.”

Jassa toa zo kɛ: “Kolaa na meagya la, ɛnee mede Mexico, na ɛnee mewɔ asafo bie mɔɔ bɛka Nrelenza la anu. Ɛnee me nye die ɛkɛ yemɔti ɛnee mekulo kɛ mesia mekɔ ɛkɛ.” Dustin nee Jassa bɔle ɔ bo kɛ bɛkenga mediema mɔɔ bɛdule bɛhɔle ɛleka mɔɔ moalɛ nwo hyia la anwubielɛ. Ɛhye mɔɔ bɛyɛle wɔ bɛ abusua ɛzonlenlɛ ne anu la manle bɛnyianle ɛhulolɛ kɛ bɛbahɔzonle wɔ maanle gyɛne zo. (Dwɔn 4:35) Dustin ka kɛ: “Ɛnee yɛkpondɛ kɛ yɛnyia anyelielɛ ɛhye bie.” Mekɛ mɔɔ bɛ gɔnwo mɔ hanle hilele bɛ kɛ ekpunli fofolɛ bie mɔɔ wɔ Mexico hyia moalɛ la, Dustin nee Jassa zile kpɔkɛ kɛ bɛbahɔ ɛkɛ. Bɛgyakyile bɛ gyima ne, bɛdɔnenle bɛ ɛlɛne ne na bɛdule bɛhɔle Mexico.

‘ƆLE DEBIE KPALƐ MƆƆ YƐYƐLE A’

Dustin nee Jassa dɛnlanle suakpole Tecomán mɔɔ ɔdaye noko ɔbikye Pacific Nyevile ne kɛyɛ mayɛle 2,700 anzɛɛ (km 4,345) mɔɔ wɔ Astoria sɔlɔ la azo. Dustin ka kɛ: “Yɛto yɛ nye a, kɛ anrɛɛ yɛbanwu awoka na yɛade anwoma fɛlɛko la, domunli mbaka nee wuluwulu ala a wɔ ɛkɛ a.” Bɛdwule ɛkɛ ne la, ɛnee bɛnnyia gyima. Kɛmɔ ɛnee bɛ ezukoa nwo ɛra edwɛkɛ la ati, bɛlile awule nee aluba fane nwiɔ kenle ko biala wɔ dapɛne dɔɔnwo anu. Jassa ka kɛ: “Ninyɛne nu yɛle se kpalɛ la yɛ Baebolo sukoavoma bɔle ɔ bo kɛ bɛmaa yɛ amango, konwo, kpakpa yɛɛ domunli!” Yeangyɛ, agyalɛma ne nyianle gyima wɔ sukulu bie mɔɔ bɛkile Intanɛte nwo debie wɔ nu la anu wɔ Taiwan. Kɛkala, ezukoa mɔɔ bɛdie la kola di bɛ ngyianlɛ nwo gyima.

Kɛzi Dustin nee Jassa te nganeɛ wɔ bɛ asetɛnla fofolɛ ɛhye anwo ɛ? Bɛka kɛ: “Ɛhye a le debie kpalɛ mɔɔ yɛhola yɛyɛ a. Agɔnwolɛvalɛ mɔɔ yɛ nee Gyihova lɛ nee mɔɔ yɛ nee yɛ nwo lɛ la anu ɛmia kpalɛ. Kenle ko biala yɛyɛ ninyɛne dɔɔnwo yɛbɔ nu—yɛkɔ daselɛlilɛ, yɛsuzu kɛzi yɛbaboa yɛ Baebolo sukoavoma la anwo, yɛsiezie yɛ nwo na yɛahɔ debiezukoalɛ. Bieko, yɛ nwo ɛdɔ yɛ ɛvi ninyɛne bie mɔ mɔɔ ɛnee yɛte nganeɛ kɛ ɔle ngyegyelɛ la anwo.” Bɛtoa zo kɛ: “Kɛkala yɛde ninyɛne mɔɔ alumua ne yɛande ɔ bo la abo kpalɛ—kɛzi ɛwɔkɛ mɔɔ wɔ Edwɛndolɛ 34:8 le nɔhalɛ la, ‘Bɛzɔ Gyihova bɛnlea na bɛkɛnwu kɛ ɔle kpalɛ.’”

GYIMAYƐVOMA DƆƆNWO MƆƆ TU BƐ NWO MAA LA—DUZU A KA BƐ A?

Mediema mrenya nee mraalɛ mɔɔ bɛgya nee mɔɔ bɛtɛgyale na bɛbo ɛvolɛ 20 anzɛɛ 30 mɔɔ bɛbo 2,900 la ɛdu bɛ nwo ɛmaa ɛlɛsonle wɔ Mexico maanzinli bie mɔ mɔɔ bɛhyia Belemgbunlililɛ ne edwɛkpakavolɛma dɔɔnwo anwo la anu. Duzu ati a Alasevolɛ ne mɔ ɛlɛyɛ gyima ɛsesebɛ ɛhye a? Mekɛ mɔɔ bɛbizalɛ bɛ nuhua bie mɔ kpuyia ɛhye la, bɛmanle ngilenu nsa. Yemɔ a le boni?

Ɔkile kɛ yɛkulo Gyihova nee menli. Leticia nyianle ɛvolɛ 18 la yɛɛ bɛzɔnenle ye a. Ɔka kɛ: “Mekɛ mɔɔ menyilale me nwo zo memanle Gyihova la, mendele ɔ bo kɛ ɛnee ɔwɔ kɛ mefa me ahonle nee me ɛkɛla kɔsɔɔti mesonle ye. Zɔhane ati, amaa meavi ahonle muala nu meahile kɛ mekulo Gyihova la, ɛnee mekulo kɛ mefa me mekɛ nee me anwosesebɛ dɔɔnwo mesonle ye.” (Mak. 12:30) Mekɛ mɔɔ Hermilo mɔɔ kɛkala ɛgya Leticia la nyianle ɛvolɛ 20 nee ekyi la ɔdule ɔhɔle ɛleka mɔɔ ɛnee bɛhyia Belemgbunlililɛ edwɛkpakavolɛma dɔɔnwo la. Ɔka kɛ: “Menwunle kɛ saa meboa menli wɔ sunsum nu a, yemɔ le adenle kpalɛ mɔɔ kile kɛ mekulo me gɔnwo mɔ a.” (Mak. 12:31) Yemɔti, ɔgyakyile bange gyima mɔɔ ɛnee ɔyɛ ye wɔ suakpole Monterrey azo la, na ɔhɔle sua ekyi bie azo.

Ɔmaa yɛnyia nɔhalɛ anyelielɛ. Mekɛ mɔɔ bɛzɔnenle Leticia la yeangyɛ ɔ nee adiema raalɛ adekpakyelɛ ko hɔle sua bie mɔɔ ɔte ɔ nwo la azo hɔbɔle edwɛkpa ne nolo siane ko. Leticia ka kɛ: “Ɔzinle me nwo. Kɛzi menli ne diele Belemgbunlililɛ ne anwo edwɛkɛ ne mɔɔ yɛhanle yɛhilele bɛ la manle me nye liele kpole. Siane ne hɔle awieleɛ la, menganle ye me ti anu kɛ, ‘Ɛhye a mekulo kɛ meyɛ ye wɔ ɛbɛlabɔlɛ nu a!’” Essly le adiema raalɛ mɔɔ yenyia ɛvolɛ 20 nee ekyi mɔɔ ɔtɛgyale, ɔdaye noko, anyelielɛ mɔɔ ɔnwunle ye wɔ gyima ɛhye anu la a hanle ye manle ɔnyianle ɛhulolɛ kɛ ɔbahɔzonle ɛleka mɔɔ bɛhyia moalɛ kpole la a. Mekɛ mɔɔ ɛnee ɔkɔ sukunwiɔ la, ɔnwunle Alasevolɛ dɔɔnwo mɔɔ bɔ mɔdenle mɔɔ bɛhɔzonlenle ɛleka mɔɔ moalɛ nwo hyia kpole la. Ɔka kɛ, “Mediema ne mɔ anyunlu ɛzelekɛ ɛzelekɛ ne manle menyianle ɛhulolɛ kɛ mebayɛ mɔɔ bɛyɛle la bie.” Mediema mraalɛ dɔɔnwo ɛyɛ mɔɔ Essly yɛle la bie. Nɔhalɛ nu, mediema mraalɛ mɔɔ bɛ bo 680 mɔɔ bɛtɛgyale la, ɛlɛsonle wɔ ɛleka mɔɔ bɛhyia moalɛ kpole wɔ Mexico la. Nea neazo kɛnlɛma mɔɔ bɛyɛ bɛmaa ngakula nee mgbanyinli kɔsɔɔti a!

Ɔmaa yɛnyia asetɛnla kpalɛ nee ahunlundwolɛ. Mekɛ mɔɔ Essly wiele sukunwiɔ la, bɛmanle ye adenle kɛ ɔbahola yeahɔ sukunsa mɔɔ ɔnrɛdua ɛhwee. Ɔtipɛnema dule ye folɛ kɛ ɔlie ɔdo nu amaa yeanyia “asetɛnla kpalɛ”—ɔbanyia amodinli, gyima, kale, na yeadudu adenle. Noko akee, yeanli bɛ folɛdulɛ ne azo. Essly ka kɛ: “Me gɔnwo mɔ Keleseɛnema dɔɔnwo lile ninyɛne ɛhye mɔ anzi, na mɔɔ menwunle ye la a le kɛ bɛanva ɛzonlenlɛ nu bodane bɛanzie bɛ nye zo. Eza menwunle kɛ mekɛ mɔɔ bɛlɛfa bɛ nwo bɛawula ewiade ne anu dɔɔnwo la, bɛyia ngyegyelɛ na awieleɛ kolaa ne bɛ abɛ nu bu. Ɛnee mekulo kɛ mefa me mgbavolɛ nu mekɛ ne mesonle Gyihova kpalɛ.”

Essly nyianle sukulu ndetelɛ ekyi bokale nwo amaa yeanyia gyima mɔɔ ɔbava yeanlea ɔ nwo wɔ adekpakyelɛ gyima ne anu, yɛɛ nzinlii ɔhɔle ɛleka mɔɔ ɛnee bɛhyia Belemgbunlililɛ ne nolobɔlɛma dɔɔnwo anwo la. Ɔzukoale Otomima nee Tlapanecoma aneɛ ne mɔɔ bɛka ye wɔ ɛleka mɔɔ ɔhɔle la bɔbɔ. Ɛnɛ, saa ɔkakye ɛvolɛ nsa mɔɔ ɔvale ɔhanle edwɛkɛ ne wɔ ɛleka ɛhye mɔɔ ɔte ɔ nwo la a, ɔka kɛ: “Ɛleka mɔɔ moalɛ nwo hyia mɔɔ bɛsonle la, ɛmaa menyia asetɛnla kpalɛ nee ahunlundwolɛ. Mɔɔ tɛla ye kɔsɔɔti la, agɔnwolɛvalɛ mɔɔ me nee Gyihova lɛ la anu ɛmia kpalɛ.” Phillip nee Racquel agyalɛma mɔɔ bɛbo ɛvolɛ 30 mɔɔ bɛvi United States la die ɛhye to nu. “Ewiade ne ɛlɛkakyi ndɛndɛ na menli dɔɔnwo te nganeɛ kɛ ninyɛne ɛngɔ ye boɛ. Noko akee, ɛleka mɔɔ yɛnwu kɛ menli dɔɔnwo tie Baebolo ne anu edwɛkɛ ne la maa yɛnwu kɛ yɛ ɛbɛlabɔlɛ gyi bodane kpalɛ zo. Ahunlundwolɛ boni a tɛla ɛhye a!”

KƐZI BƐDI NGYEGYELƐ NWO GYIMA LA

Nɔhalɛ nu, ɛleka mɔɔ bɛhyia Belemgbunlililɛ nolobɔlɛma mɔɔ yɛbazonle la lɛ ye ngyegyelɛ. Nuhua ko a le kɛzi ɛbanlea ɛ nwo la. Saa ɛbahola wɔayɛ ɛhye a, kyesɛ ɛnyia ɛhulolɛ kɛ ɛbayɛ nzenzaleɛ. Verónica, adekpakyelɛnli mɔɔ lɛ anwubielɛ kpalɛ la ka kɛ: “Ɛleka ko mɔɔ menzonlenle la, ɛnee meto aleɛ mɔɔ ɔnlie mekɛ dɔɔnwo na eza ye bolɛ ɛnyɛ se la metɔne ye. Ɛleka fofolɛ noko, ɛnee metɔne adɛladeɛ yɛɛ mepepɛ enrinli. Kɛkala, mesiezie sua nu na eza mekile awovolɛ fofolɛ kɛzi bɛ nee bɛ mra bɛali adwelie la.”

Kɛzi ɛ nee sua mɔɔ te ɔ nwo azo menli badɛnla na wɔali bɛ amaamuo nee bɛ maandeɛ zo la ɛnla aze. Ɛhye bie a dole Phillip nee Racquel wɔ mekɛ mɔɔ ɛnee bɛlɛsonle wɔ azɛlɛsinli bie mɔɔ bɛka Nahuatl aneɛ wɔ nu la anu a. Phillip ka kɛ, “ɛnee bɛ amaamuo le ngakyile bɔkɔɔ.” Duzu a boale bɛ manle bɛyɛle nzenzaleɛ a? “Yɛvale yɛ adwenle yɛziele debie kpalɛ mɔɔ Nahuatl menli ne yɛle la azo—koyɛlɛ mɔɔ wɔ bɛ mbusua avinli, kɛzi bɛdi nɔhalɛ bɛmaa bɛ nwo, nee ahunlunyele mɔɔ bɛkile la.” Racquel toa zo kɛ: “Yɛzukoale ninyɛne dɔɔnwo yɛvile sua ne azo amra nee yɛ mediema mɔɔ yɛ nee bɛ zonlenle wɔ maanzinli zɔhane anu la ɛkɛ.”

KƐZI ƐBAZIEZIE Ɛ NWO LA

Saa ɛkulo kɛ ɛkɔsonle ɛleka mɔɔ bɛhyia moalɛ la a, duzu a ɛbahola wɔayɛ ye kɛkala wɔava wɔaziezie ɛ nwo a? Mediema mɔɔ lɛ anwubielɛ wɔ gyima ɛhye anu la ka kɛ: Kolaa na wɔadu ɛ bo la, sukoa kɛ ɛbatete ninyɛne zo na maa ɛ kunlu ɛdwo mɔɔ ɛlɛ ye la anwo. (Fel. 4:11, 12) Duzu bieko a ɛbahola wɔayɛ a? Leticia se: “Ɛnee mekoati gyima mɔɔ ɔbamaa meadɛnla ɛleka ko meahyɛ la ɛyɛlɛ. Ɛnee mekulo kɛ mekola metu mekɔ ɛleka biala mekɛ biala.” Hermilo ka kɛ: “Menzukoale aleɛ ɛdonlɛ, ninyɛne ɛkpolɛ, nee ninyɛne zo ɛdolɛ.” Verónica noko ka kɛ: “Mekɛ mɔɔ ɛnee me nee me mediema nee me awovolɛ de la, menzieziele sua nu yɛɛ menzukoale aleɛ mɔɔ ɔnlɛ bolɛ na ɔmaa anwosesebɛ la ɛdonlɛ. Eza menzukoale kɛzi bɛsie ezukoa la.”

Levi nee Amelia mɔɔ bɛgya ɛvolɛ mɔtwɛ na bɛde United States la ka kɛzi ninyɛne fɔɔnwo bie mɔɔ bɛyɛ nwolɛ asɔne la boale bɛ manle bɛzieziele bɛ nwo bɛhɔzonlenle Mexico la. Levi se: “Yɛsesenle ezukoa mɔɔ yɛbahyia nwo ɛvolɛ ko wɔ maanle gyɛne zo la na yɛzɛlɛle Gyihova kɛ ɔboa yɛ ɔmaa yɛnyia zɔhane ezukoa ne.” Siane ekyi bie anzi, bɛnyianle ezukoa zɔhane yemɔti bɛanzɛkye mekɛ na bɛdule bɛhɔle. Levi ka kɛ: “Gyihova ɛbua yɛ asɔne fɔɔnwo ne mɔɔ yɛyɛle la, akee yedo kɛ yɛbayɛ yɛ afoa nu ɛdeɛ.” Amelia toa zo kɛ: “Yɛzuzule kɛ yɛbali ɛvolɛ ko ala, noko yɛli ɛvolɛ nsuu wɔ ɛke, na yɛtɛyɛle yɛ adwenle kɛ yɛfi ɛke! Ɛke mɔɔ yɛde la maa yɛnwu kɛ Gyihova a le yɛ boavolɛ a. Dahuu yɛdi ye kpalɛyɛlɛ ne anwo daselɛ.”

Adam nee Jennifer, agyalɛma bie mɔɔ bɛvi United States na bɛlɛsonle wɔ Mexico asafo bie mɔɔ bɛka Nrelenza anu la nyianle bɛ nzɛlɛlɛ ne noko anwo mualɛ. Bɛka kɛ: “Mmakendɛ kɛ tɛnlabelɛ ne bayɛ kpalɛ bɔkɔɔ. Yɛ ɛhulolɛ mɔɔ ɛlɛ kɛ ɛbahɔzonle maanle gyɛne zo la anwo asɔne, na yɛ wɔ asɔne ne anwo gyima. Tete ninyɛne zo, kɛlɛ ɔfese ne mɔɔ wɔ maanle ne mɔɔ ɛkulo kɛ ɛkɔsonle ɛkɛ anu la, na mekɛ mɔɔ wɔsese ye bolɛ wɔwie la tu ɛ bo!”a Saa ɛyɛ zɔ a, ɛ nye balie na wɔanyia nyilalɛ dɔɔnwo.