Asoo Gyisɛse Bɔle Ɛtanevolɛ Ne Ɛwɔkɛ Kɛ Ɔbahɔ Anwuma?

Bɛbiza kpuyia ɛhye ɔluakɛ Gyisɛse bɔle ɛtanevolɛ ne mɔɔ ɛnee bɛhenda ye wɔ ɔ nwo ɛkɛ ne la ɛwɔkɛ kɛ kenlebie ɔbahɔ Paladaese. Gyisɛse hanle kɛ: “Mebɔ wɔ ɛwɔkɛ ɛnɛ kɛ, me nee wɔ bahɔ Paladaese.” (Luku 23:43, NW) Yɛ ye nzonlɛ kɛ Gyisɛse angile ɛleka mɔɔ zɔhane Paladaese ne wɔ la. Asoo ɛnee Gyisɛse ɛlɛkile kɛ zɔhane ɛtanevolɛ ne baboka ɔ nwo wɔ anwuma?

Mɔɔ lumua la, maa yɛnlea kɛ zɔhane ɛtanevolɛ ne bahola ahɔ anwuma a. Bɛva nzule nee sunsum nwuanzanwuanza ne bɛzɔne menli mɔɔ bahɔ anwuma la bɛmaa bɛyɛ Gyisɛse ɛdoavolɛma nee Nyamenle amra. (Dwɔn 3:3, 5) Debie bieko mɔɔ bɛyɛ la a le kɛ bɛdi Nyamenle ɛbɛlabɔlɛ ngyinlazo ne azo na bɛda subane mɔɔ le kɛ nɔhalɛlilɛ, munlililɛ nee anwunvɔnezelɛ ali. (1 Kɔlentema 6:9-11) Eza ɔwɔ kɛ bɛdi nɔhalɛ bɛmaa Nyamenle nee Kelaese kɔkpula kɛ bɛbavi azɛlɛ ye azo la. (Luku 22:28-30; 2 Temɔte 2:12) Bɛkola bɛyɛ ninyɛne ɛhye mɔ a yɛɛ bɛbahile kɛ bɛfɛta kɛ bɛdwazo bɛ na bɛfa ɛzonlelilɛ kpole mɔɔ ɛlɛkendɛ bɛ wɔ anwuma, mɔɔ kile kɛ, bɛ nee Kelaese bɛazonle kɛ ɛsɔfoma nee arelemgbunli wɔ alesama anwo zo ɛvolɛ apenle ko la bɛawula bɛ sa nu a.—Yekile 20:6.

Noko akee, ɛtanevolɛ ne mɔɔ bɛhendale ye wɔ Gyisɛse anwo ɛkɛ la bɔle ɛbɛlatane na ɔwule kɛ ɛtanevolɛ la. (Luku 23:32, 39-41) Ɔle nɔhalɛ kɛ, ɔdendɛle ɛbulɛ nu wɔ mekɛ mɔɔ ɔhanle ɔhilele Gyisɛse kɛ: “Saa ɛdi wɔ belemgbunli ne a kakye me” la. (Luku 23:42) Noko, yeanyɛ awie mɔɔ bɛzɔne ye, na bɛva sunsum ne bɛwo ye kɛ Gyisɛse ɛdoavolɛ, yɛɛ yeambɔ ɛbɛla mɔɔ kile kɛ ɔlile nɔhalɛ wɔ ye ngoane mekɛ nu la. Asoo nrɛlɛbɛ wɔ nu kɛ Gyisɛse babɔ ye ɛwɔkɛ kɛ ɔbaboka ɔdaye nee ye ɛdoavolɛma mɔɔ di nɔhalɛ, na bɛgyinlanle bɛ munlililɛ nu la anwo bɛali ebia wɔ anwuma?—Wulomuma 2:6, 7.

Neazo ɛne: Saa awie sɛlɛ wɔ kɛ ɛva ye ɛtane ɛhyɛ ye kɛ ɔwuale wɔ ezukoa la a, bie a ɛnrɛbɔ ye kyaagye biala. Noko asoo ɛbava wɔ gyima anzɛɛ wɔ abusua wɔawula ɔ sa nu? Ɛbava gyima zɛhae wɔamaa menli mɔɔ ɛdie bɛ ɛdi kpalɛ la. Zɔhane ala a, menli mɔɔ bahɔ anwuma la ɔwɔ kɛ nyia debie gyinla zolɛ kile kɛ bɛbali Nyamenle tenlenle ngyinlazo ne azo wɔ mekɛ mɔɔ bɛbali alesama anwo zo tumi la. (Yekile 2:10) Ɔda ali kɛ awieleɛ bɔkɔɔ ne, ɛtanevolɛ ne zɛlɛle Gyisɛse ɛdeɛ, noko yeangile debie biala mɔɔ ɔbagyinla zo yeahɔ anwuma a.

Noko, asoo Gyisɛse hanle kɛ ɔ nee ɛtanevolɛ ne bahɔ anwuma wɔ kenle ko ne ala? Ɔnrɛhola ɔnrɛyɛ boɛ, ɔluakɛ Gyisɛse mumua ne angɔ anwuma wɔ zɔhane kenle ne. Emomu, ɛnee ɔwɔ “azɛlɛ ti anu”—azie zo—kenle nsa. (Mateyu 12:40; Maake 10:34) Bɛdwazole ye bɛvile ewule nu bɔbɔ la, ɔlile kenle 40 kolaa na yeahɔ anwuma. (Gyima ne 1:3, 9) Ɛhye ati, anrɛɛ ɛtanevolɛ ne ɛnrɛhola ɛnrɛboka Gyisɛse anwo bɛnrɛhɔ anwuma wɔ zɔhane kenle ne.

Ɛnee akee, Paladaese boni a ɛtanevolɛ ne bahɔ nu a? Bɛdwazo ye bɛfi ewule nu a, ɔbadɛnla azɛlɛ ye azo Paladaese ne mɔɔ Gyisɛse bali tumi wɔ zolɛ la anu. (Gyima ne 24:15; Yekile 21:3, 4) Saa ɛkpondɛ kɛ ɛnwu zɔhane Paladaese ne nee mɔɔ Nyamenle kpondɛ kɛ ɛyɛ la anwo ninyɛne dɔɔnwo a, ka nwolɛ edwɛkɛ kile Gyihova Alasevolɛ ne mɔ anu ko.