NGILEHILELƐ ƐLƐKA 10D
Moalɛ Mɔɔ Maa Yɛgyinla Yɛ Gyakɛ Azo
ƐZUKOALƐDEƐ mɔɔ wɔ Yizikeɛle 37:1-14 anu la kola maa yɛnyia anwosesebɛ mɔɔ yɛbahola yɛava yɛatoto yɛdayɛ mumua ne yɛ tɛnlabelɛ nwo la. Yemɔ a le boni?
Ɔyɛ a, yɛte nganeɛ kɛ ngyegyelɛ nee sɔnea mɔɔ yɛyia la bo yɛ nwo zo, ɔmaa yɛyɛ bɛtɛɛ na ɔyɛ se kɛ yɛbazonle. Noko saa yɛdwenledwenle ɛnyelɛzodeɛnwunlɛ ɛhye anwo a, bie a ɔbamaa yɛanyia anwosesebɛ. Kɛmɔti ɛ? Yɛbahola yɛazukoa debie yɛavi ngapezo ɛhye anu kɛ, Nyamenle ne mɔɔ ɔlɛ tumi mɔɔ ɔdie anwoma ɔgua mbowule mɔɔ ɛwu azo ɔmaa bɛba ngoane nu la, kola maa yɛ anwosesebɛ ɔmaa yɛgyinla yɛ ngyegyelɛ nloa—bɔbɔ nuhua ne mɔɔ sonla nye zo a ɔnlɛ ye sɔbelɛ la.—Kenga Edwɛne 18:29; Fel. 4:13.
Kolaa na yeadwu Yizikeɛle mekɛ zo la, ngapezonli Mosisi hanle kɛ Gyihova lɛ tumi nee ɛhulolɛ kɛ ɔfa ye anwosesebɛ yeaboa ye menli. Mosisi hɛlɛle kɛ: “Nyamenle le ɛvealeka ɔvi tete, ɔ sa wɔ ɛ bo dahuu.” (Dit. 33:27) Ɛhɛe, yɛbahola yɛanyia anwodozo kɛ saa yɛkɔ yɛ Nyamenle ne ɛkɛ wɔ anwongyelelɛ mekɛ nu a, ɔbava ɔ sa yeawula yɛ bo, yeakpogya yɛ zo bɛtɛɛ, na yeaboa yɛ yeamaa yɛagyinla yɛ gyakɛ azo bieko.—Yiz. 37:10.