Adam Nee Yive Andie Nyamenle

Kenle ko bie mɔɔ Adam ɛnle ɛkɛ la, ɛwɔlɛ bie dendɛle hilele Yive. Ɔbizale kɛ: ‘Asoo amgba Nyamenle se bɛmmadi baka biala ma ne bie ɔ?’ Yive hanle kɛ: ‘Yɛkola yɛdi baka biala ma ne bie, kyesɛ ko ala. Saa yɛdi bie a, yɛbawu.’ Ɛwɔlɛ ne hanle kɛ: ‘Bɛnrɛwu. Saa bɛdi bie a, bɛbayɛ kɛ Nyamenle la.’ Asoo ɔle nɔhalɛ? Kyɛkyɛ, ɛnee ɔlɛbɔ adalɛ. Noko Yive liele ye lile. Yive nleanle bakama ne too ɔ ti akunlu rale zolɛ. Ɔlile bakama ne bie na ɔvale bie ɔmaanle Adam noko. Ɛnee Adam ze kɛ saa bɛandie Nyamenle a bɛbawu. Noko ɔlile bakama ne bie.

Nzinlii, Gyihova nee Adam yɛɛ Yive dendɛle na ɔbizale bɛ deɛmɔti bɛandie ɔ ne la. Yive hanle kɛ ɛwɔlɛ ne a yɛle a, yɛɛ Adam noko hanle kɛ Yive a maanle ɔlile a. Kɛmɔ Adam nee Yevi andie Gyihova la ati, ɔvoanle bɛ ɔvile tola ne anu. Amaa bɛanzia bɛangɔ tola ne anu bieko la, ɔvale anwumabɔvolɛma nee dadeɛ mɔɔ ɛlɛsɔ na ɔpɛnepɛne ɔ nwo la ɔziele tola ne adenle ne anloa.

Gyihova hanle kɛ ɔbahwe ahenle mɔɔ bɛlɛbɛlale Yive la noko anzo. Tɛ ɛwɔlɛ ne a dendɛle hilele Yive a. Gyihova ambɔ ɛwɔlɛ kɛ ɔdendɛ. Anwumabɔvolɛ ɛtane bie a maanle ɛwɔlɛ ne dendɛle a. Ɔyɛle ɛhye ɔvale ɔbɛlɛbɛlale Yive. Bɛfɛlɛ zɔhane anwumabɔvolɛ ne Seetan Abɔnsam. Kenle bie, Gyihova bazɛkye Seetan na ɔnrɛhola ɔnrɛbɛlɛbɛla menli ɔnrɛmaa bɛnrɛyɛ ɛtane bieko.