Nyamenle A Limoale Vale Bɛ Nwo Enililɛ Nwo Mɛla Maanle A
Mɔɔ ɔka ekyi Yizilayɛ maanle ne kɔ Ɛwɔkɛ Azɛlɛ ne azo wɔ kɛyɛ ɛvoya 35 mɔɔ ɛpɛ nu la, Nyamenle hanle kɛ ɔbabɔ bɛ nwo bane yeavi Yigyibiti “ewule ɛzulolɛ” ne mɔ, mɔɔ bɛdabɛ bɛze la anwo. (Mɛla ne 7:15) Adenle ko mɔɔ ɔluale zo ɔyɛle zɔ la a le kɛ ɔvale bɛ nwo enililɛ nee kɛ ɔkɛyɛ na bɛnnyia ewule la anwo mɛla fɔɔnwo ɔmaanle bɛ. Kɛ neazo la:
Mɛla mɔɔ ɔvale ɔmaanle maanle ne la anu a le kɛ bɛbabia bɛ nwo na bɛakpo bɛ adɛladeɛ.—Sɛlɛvolɛma 15:4-27.
Mɔɔ fane bakazo mɔɔ bɛbahɔ anwo la, Nyamenle hanle kɛ: “Ɔwɔ kɛ bɛyɛ ɛleka wɔ azokoɛleɛ ne mɔɔ bɛkɔ bakazo ɛkɛ ne a. Ɔwɔ kɛ bɛnyia amgbɔma ko bɛboka bɛ konle ninyɛne ne anwo, amaa saa bɛfinde kɛ bɛkazɔho bɛ gyakɛ a bɛava bɛawɔ, bɛwie a, bɛahakyi bɛ nwo bɛadua ye.”—Mɛla ne 23:12, 13.
Bɛmaanle menli mɔɔ ɛnyia ewule nzane la dɛnlanle bane ne anzi kɔkpula kɛ bɛbade kpɔkɛ. Kolaa na menli mɔɔ ewule bie ɛha bɛ na bɛde kpɔkɛ azia ara la, ɔwɔ kɛ bɛkpo bɛ adɛladeɛ na bɛfa nzule bɛbia bɛ nwo kolaa na “bɛ nwo ade.”—Sɛlɛvolɛma 14:8, 9.
Bɛye awie biala mɔɔ bazɔ funli nu la bɛfi menli nu.— Sɛlɛvolɛma 5:2, 3; Ɛdianlɛ 19:16.
Nyamenle limoale vale ayileyɛlɛ nee bɛ nwo enililɛ nwo adehilelɛ mɔɔ wɔ mɛla ne anu la maanle Yizilayɛma.
Wɔ ɛleka bie mɔ, ɛnee bɛ nwo enililɛ nwo adwenle mɔɔ ɛndenrɛ la ɛlie duma. Kɛ neazo la:
Ɛnee bɛfa bɔla bɛgua awɔdenle ne mɔ anu. Nzule nee aleɛ mɔɔ ɛnle kpalɛ yɛɛ ewula vale ewule dɔɔnwo rale na ɛnee ɔmaa mbɔdɔma ta wu.
Dɔketama mɔɔ dɛnlanle aze wɔ tete ne la ɛnee ɛnlɛ ewule ngɛkɛba nwo adwenle dɔɔnwo. Yigyibitima vale ninyɛne le kɛ kekelebetile mogya, anloma ebinli, kile funli, miene yɛɛ paano mɔɔ ɛbɔ adubue la lile gyima wɔ ayileyɛlɛ nu. Ɛnee eza bɛta bɛfa sonla nee nane ebinli bɛyɛ nyile.
Wɔ tete Yigyibiti, ewule ngɛkɛba mɔɔ wɔ Azule Naele ne nee nzule gyɛne anu la maanle bɛ nwo dole bɛ. Yɛɛ ahunlundulɛ nee ewule ngakyile mɔɔ aleɛ mɔɔ ɛnle kpalɛ fa ba la hunle ngakula dɔɔnwo.
Noko kɛ mɔɔ Yizilayɛma vale ngyinlazo mɔɔ wɔ Nyamenle Mɛla ne anu la yɛle gyima la ati, bɛnyianle kpɔkɛdelɛ kpalɛ.