Nrenyia bie lɛ ahyɛlɛdeɛ wɔ ɛlɛka mɔɔ bɛkyekye nwo la anu

Duzu A Baebolo Ne Ka Ye Wɔ Debie Ɛhyɛlɛ Nwo A?

Baebolo ne bua kɛ

Baebolo ne maa yɛ anwosesebɛ kɛ, yɛvi yɛ ɛhulolɛ nu na yɛva adwenle kpalɛ yɛhyɛ debie. Ɔmaa ɔda ali kɛ saa yɛyɛ ye zɔ a menli mɔɔ yɛkyɛ bɛ debie la anye balie na yɛdayɛ noko yɛ nye balie. (Mrɛlɛbulɛ 11:25; Luku 6:38) Gyisɛse hanle kɛ: “Anyelielɛ dɔɔnwo wɔ ɛmaanlɛ nu tɛla ɛlielɛ.”—Gyima ne 20:35.

Mekɛ boni a yɛkyɛ debie a Nyamenle anye die nwo a?

Nvasoɛ wɔ ahyɛlɛdeɛ mɔɔ yɛfi yɛ ɛhulolɛ nu yɛfa yɛmaa la azo. Baebolo ne ka kɛ: “Bɛmaa awie biala ɛyɛ mɔɔ yezuzu nwo wɔ ye ahonle nu la, ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ, ɔluakɛ Nyamenle kulo mɔɔ te ɔ nyunlu kyɛ debie la.”—2 Kɔlentema 9:7.

Ahonle nu mɔɔ yɛfi yɛkyɛ debie la boka “ɛzonlenlɛ” mɔɔ Nyamenle die to nu la anwo. (Gyemise 1:27) Nyamenle anye die bɛdabɛ mɔɔ bɛboa menli mɔɔ hyia moalɛ la anwo na ɔbu ye kɛ bɛlɛfa bɛabɔ ye bosea. (Mrɛlɛbulɛ 19:17) Baebolo ne kilehile kɛ Nyamenle mumua ne badua ahenle mɔɔ vale ahyɛlɛdeɛ ne maanle la kakɛ.—Luku 14:12-14.

Mekɛ boni a yɛkyɛ debie a Nyamenle anye ɛnlie nwo a?

Saa angomedi ti a yɛyɛ a. Neazo bie mɔ ɛne:

Amaa menli anye alie yɛ nwo.—Mateyu 6:2.
Amaa awie mɔ noko ahyɛ yɛ debie.—Luku 14:12-14.
Amaa yɛanyia dahuu ngoane.—Edwɛndolɛ 49:6, 7.

Saa yɛfa yɛboa gyimalilɛ anzɛɛ yɛkanvo subane bie mɔɔ Nyamenle kyi la a. Kɛ neazo la, ɔnrɛyɛ kpalɛ kɛ yɛbava ezukoa yɛamaa awie kɛ ɔva ɔdo kyakya anzɛɛ ɔnlo nyiletane anzɛɛ ɔbo nza. (1 Kɔlentema 6:9, 10; 2 Kɔlentema 7:1) Zɔhane ala a, ɔnle kɛ yɛmaa awie mɔɔ bahola ayɛ gyima anlea ɔ nwo noko ɔngulo kɛ ɔyɛ gyima la ezukoa a.—2 Tɛsalonaekama 3:10.

Saa ɔnrɛmaa yɛnrɛli ɛzonlelilɛ mɔɔ Nyamenle ɛva ɛmaa yɛ la anwo gyima a. Baebolo ne kilehile kɛ ɔwɔ kɛ mbusua tile fa bɛ sua nu amra ngyianlɛdeɛ maa bɛ. (1 Timote 5:8) Ɔnrɛyɛ kpalɛ kɛ abusua tile bie bahyɛ awie mɔ ninyɛne dɔɔnwo wɔ mekɛ mɔɔ ɔyɛ zɔ a ɔbamaa ye abusua ne anwo ahyele bɛ la. Zɔhane ala a, Gyisɛse dendɛle tiale menli mɔɔ hanle kɛ bɛva mɔɔ bɛlɛ ye la amuala bɛyɛ “ahyɛlɛdeɛ mɔɔ bɛyila zo bɛmaa Nyamenle” la ati bɛkpole kɛ bɛbanlea bɛ awovolɛ mɔɔ bɛyɛ mgbanyinli la a.”—Maake 7:9-13.

Mɔɔ Baebolo ne ka ye wɔ debie ɛhyɛlɛ nwo la

Mrɛlɛbulɛ 11:25: “Sonla mɔɔ buke ye ahonle nu fa maa la banyia ɔ nwo, yɛɛ mɔɔ yɛ ahunlunyele la, bɛnwu ye anwunvɔne.”

Mɔɔ ɔkile: Awie mɔɔ die ahyɛlɛdeɛ nee mɔɔ fa maa la amuala nyia zolɛ nvasoɛ.

Mrɛlɛbulɛ 19:17: “Sonla mɔɔ se ehyianvolɛma anwunvɔne la bɔ [Gyihova] bosea, na ɔbadua ye kakɛ wɔ ye nyɛleɛ kpalɛ nwo.”

Mɔɔ ɔkile: Nyamenle bu ɔ nwo kɛ ɔtua bɛdabɛ mɔɔ bɛboa menli mɔɔ hyia moalɛ la kakɛ, na yebɔ ɛwɔkɛ kɛ ɔbamaa bɛ nwolɛ nyilalɛ.

Mateyu 6:2: “Saa bɛfa ahyɛlɛdeɛ bɛamaa a, bɛmmadimoa bɛbɔ ye nolo, kɛ mɔɔ nabalabama ne yɛ . . . amaa menli awula bɛ anyunlunyia la.”

Mɔɔ ɔkile: Ɔnle kɛ yɛkyɛ debie kɛ yɛfa yɛahwe awie mɔ adwenle yeara yɛ nwo zo.

Gyima ne 20:35: “Anyelielɛ dɔɔnwo wɔ ɛmaanlɛ nu tɛla ɛlielɛ.”

Mɔɔ ɔkile: Saa yɛfi yɛ ahonle nu yɛkyɛ debie a, ɔmaa yɛ nye die.

2 Kɔlentema 9:7: “Bɛmaa awie biala ɛyɛ mɔɔ yezuzu nwo wɔ ye ahonle nu la, ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ, ɔluakɛ Nyamenle kulo mɔɔ te ɔ nyunlu kyɛ debie la.”

Mɔɔ ɔkile: Saa yɛfi yɛ ɛhulolɛ nu yɛkyɛ debie a, ɔmaa Nyamenle anye die.