MGBAVOLƐ NEE MBƐLƐRA BIZA KƐ
Ɔwɔ Kɛ Meyɛ Tattoo Ɔ?
Nzɔne ati a ɔyɛ me kɛnlɛma ɛ?
Kakula nrenyia bie mɔɔ bɛfɛlɛ ye Ryan la ka kɛ, “Menwu ye kɛ tattoo bie mɔ le ngɛnlɛma.”
Adwenle mɔɔ ɔti awie kulo kɛ ɔyɛ tattoo la bahola aha kɛzi ɔte nganeɛ wɔ nwo la. Kɛ neazo la, bɛlɛra bie mɔɔ bɛfɛlɛ ye Jillian la ka kɛ: “Kakula raalɛ bie mɔɔ me nee ye hɔle sukulu la ɛ mame wule. Ɔti mekɛ mɔɔ ɔyɛle kpanyinli la, ɔyɛle ye mame duma tattoo ɔguale ɔ kɔme anzi. Medwenle kɛ tattoo bie zɛhae le kpalɛ.”
Ɔnva nwo adwenle mɔɔ ɛlɛ ye la, ɔwɔ kɛ ɛdwenle nwo kpalɛ kolaa na wɔayɛ debie mɔɔ ɛkyikyi a ɔngɔ la wɔ ɛ nwo! Saa ɛlɛdwenle nwo kɛ ɛyɛ tattoo a, kpuya boni mɔ a ɔwɔ kɛ ɛsuzu nwo a? Baebolo ngyinlazo boni mɔ a baboa wɔ yeamaa wɔazi kpɔkɛ kpalɛ ɛ?
Kpuya boni mɔ a ɔwɔ kɛ ɛbiza a?
Kpɔkɛdelɛ nwo ngyegyelɛ boni a wɔ nu a? Mayo Clinic wɛbsaete ne ka kɛ, “Tattoo maa nganlɛ ba nwonane ne anwo, ɛhye kile kɛ ewule ngakyile nee ninyɛne gyɛne bahola ava bɛ nwo alie nu. Ɔdwu mekɛ ne bie a azenra gua ɛleka mɔɔ tattoo ne wɔ la. Eza debie kola fifi tattoo ne abo zo ne.” Wɛbsaete ne doale zo kɛ: “Saa bɛvale milahyinli mɔɔ mogya nu ewule ngɛkɛba wɔ nwo la a bɛyɛle wɔ tattoo ne a, ɛbahola wɔanyia mogya nu ewule ne bie.”
Kɛzi ɔka adwenle mɔɔ menli lɛ ye wɔ ɛ nwo la ɛ? Saa ɛkulo o anzɛɛ ɛngulo o, wɔ anwoziezielɛ ka dɔɔnwo fale ɛ nwo. Ɔmaa bɛnwu wɔ kɛ wɔnyi anzɛɛ ɛtɛyinli, bɛkola bɛdie wɔ bɛdi anzɛɛ bɛngola bɛnlie wɔ bɛnli. Bɛlɛra ko mɔɔ bɛfɛlɛ ye Samantha la ka kɛ, “Mekɛ biala mɔɔ mebanwu awie mɔɔ tattoo wɔ ɔ nwo la, mebu ye kɛ ɔle awie mɔɔ kulo nza nee anyelielɛ mgbane mbgane.”
Melanie mɔɔ ɛnyia ɛvolɛ 18 la lɛ adwenle fofolɛ. Ɔka kɛ, “Wɔ me afoa nu, tattoo ɛmmaa bɛnnwu wɔ sonlaholɛ. Ɔzɔho kɛ menli mɔɔ yɛ tattoo la ɛngulo kɛ bɛnwu kɛzi bɛde la, ɔti bɛfa tattoo ne bɛkeda kɛzi bɛde la azo.”
Ɛ nye balie nwo dahuu ɔ? Mekɛ ɛlɛkɔ la, belaneyɛlɛ anzɛɛ kpanyinliyɛlɛ bamaa tattoo ne adɛlɛ na yeayɛ ɛtane. Kpavolɛ bie mɔɔ bɛfɛlɛ ye Joseph la ka kɛ, “Meze awie mɔɔ yɛle tattoo la ye ɛvolɛ dɔɔnwo ɛne, noko kɛkala ɔnle kɛnlɛma fee.”
Allen mɔɔ ɛnyia ɛvolɛ 21 la ka kɛ, “Tattoo yɛ dɛba na ɔkpa nwo. Debie mɔɔ hyia awie ɛnɛ la bahola ayɛ mɔɔ nvasoɛ ɛnle zo wɔ mekɛ bie anzi.”
Mɔɔ Allen hanle la le nɔhalɛ. Nɔhalɛ nu, mekɛ mɔɔ menli ɛlɛnyi la bɛ adwenle, mɔɔ bɛkulo nee bɛ nganeɛdelɛ kakyi—noko bɛ tattoo ne ɛngakyi. Kakula raalɛ bie mɔɔ bɛfɛlɛ ye Teresa la ka kɛ, “Tattoo mɔɔ mebayɛ mɔɔ bahakye me ngoaseade bie la le debie mɔɔ menrɛhulo kɛ mebava meaboka ninyɛne mɔɔ nzinlii ɔbayɛ me nyane la anwo a.
Baebolo ngyinlazo boni mɔ a fale nwo a?
Awie mɔɔ ɛnyi la suzu ninyɛne nwo kɔ moa kolaa na yeazi kpɔkɛ. (Mrɛlɛbulɛ 21:5; Hibuluma 5:14) Ɔti, suzu Baebolo ngyinlazo mɔɔ doa zo mɔɔ fale tattoo nwo la anwo.
Kɔlɔsaema 3:20: “Ngakula, bɛdie bɛ awovolɛma edwɛkɛ wɔ debie biala anu, ɔboalekɛ yemɔ a Nyamenle anye die nwolɛ a.”
Saa ɛ nee wɔ awovolɛ de sua nu na wɔandie bɛ adehilelɛ a, boni a vi nu bara a?
1 Pita 3:3, 4: “Bɛmmafa ninyɛne mɔɔ le kɛ bɛ ti ɛyɛlɛ, mgbɔba, agudeɛ anzɛɛ ndanlɛ ngɛnlɛma ɛhedalɛ bɛsiezie bɛ nwo kɛ bɛfa bɛamaa bɛ nwo ayɛ fɛ. Bɛmaa bɛ nyamenlezo anwofɛlɛko ne mɔɔ wɔ bɛ nu la ɛvinde. Nyamenlezo anwofɛlɛko ɛhye vea bɛ ahonle ne mɔ anu, na yemɔ a le bɛ bɛtɛɛyɛlɛ nee bɛ koonwuyɛlɛ subane ne.”
Duzu ati a ɛnea a Baebolo ne si ‘anwofɛlɛko ɛhye mɔɔ vea ahonle nu’ la azo a?
1 Temɔte 2:9: ‘Mraalɛ noko ɛsiezie bɛ nwo kɛnlɛma wɔ adenle mɔɔ kile kɛ bɛze deɛ na nyiane wɔ bɛ nye zo la azo.’
Duzu a edwɛkɛ “nyiane wɔ bɛ nye zo” kile a? Duzu ati a ‘nyiane mɔɔ yɛmaa yɛara yɛ nye zo’ la hyia kpalɛ tɛla tattoo bie ɛ?
Wulomuma 12:1: “Bɛva bɛ sonlabaka ne mɔ bɛbɔ azu mɔɔ anwo te na ɔsɔ ɛnyelɛ la bɛmaa Nyamenle. Ɛhye a le sunsum nu ɛzonlenlɛ kpalɛ mɔɔ ɔwɔ kɛ bɛfa bɛsonle ye a.”
Duzu ati a mɔɔ ɛfa ɛ nwonane ne ɛyɛ la anwo hyia Nyamenle ɛ?
Ɔlua ninyɛne mɔɔ yɛzuzu nwo la ati, menli dɔɔnwo ɛbɔ kpɔkɛ kɛ bɛnrɛyɛ tattoo. Nɔhalɛ nu, bɛnwu debie mɔɔ anwo hyia tɛla tattoo la. Teresa, mɔɔ yɛha ɔ nwo edwɛkɛ la ka kɛ: “Saa ɛ nye die edwɛkɛ bie anwo anzɛɛ ɛkulo awie edwɛkɛ a, yɛ mɔɔ edwɛkɛ ne ka la anzɛɛ ka kile ahenle kɛ ɛkulo ye edwɛkɛ. Kɛ anrɛɛ ɛbayɛ tattoo la, fa mɔɔ ɛdie ɛdi la bɔ wɔ ɛbɛla.”