Asoo Abɔnsam Bahola Ali Alesama Anwo Zo Ɔ?

Baebolo ne bua kɛ

Abɔnsam nee sunsum ɛtane ne mɔ nyia menli nwo zo tumi kpole, ɔti Baebolo ne ka kɛ: “Abɔnsam di ɛtane ewiade ye azo belemgbunli.” (1 Dwɔn 5:19) Baebolo ne ka ndenle ngakyile mɔɔ Abɔnsam dua zo nyia menli nwo zo tumi la anwo edwɛkɛ.

• Mɛlɛbɛla. Baebolo ne maa Kilisienema anwosesebɛ kɛ “bɛho bɛtia abɔnsam mɛlɛbɛla ne mɔ.” (Ɛfɛsɛsema 6:​11, NCV) Adenle ko mɔɔ ɔdua zo ɔbɛlɛbɛla menli la a le kɛ ɔbamaa bɛanyia adwenle kɛ ɔ sa zo ne mɔ le Nyamenle azonvolɛ.​—2 Kɔlentema 11:13-15.

• Sunsum ɛtane nyɛleɛ. Abɔnsam dua menli mɔɔ tendɛ sunsum ɛtane ne mɔ anloa zo nee menli mɔɔ ye ngonyia anzɛɛ menli mɔɔ nea nwɔlɔra nu ka kenle bie edwɛkɛ la azo bɛlɛbɛla menli. (Mɛla ne 18:10-12) Nyiletane ɛnlonlɛ nee sunsum ɛtane nyɛleɛ ngakyile noko maa sunsum ɛtane ne mɔ nyia awie anwo zo tumi.​—Luku 11:24-26.

• Adalɛ ɛzonlenlɛ. Ɛzonlenlɛ mɔɔ kilehile adalɛ ngilehilelɛ la bɛlɛbɛla menli ammaa bɛandie Nyamenle. (1 Kɔlentema 10:20) Baebolo ne fɛlɛ adalɛ diedi ɛhye “mbɔnsam ngilehilelɛ.”​—1 Temɔte 4:1.

• Menli mɔɔ sunsum ɛtane wɔ bɛ nwo. Baebolo ne ka menli mɔɔ ɛnee sunsum ɛtane wɔ bɛ nwo la anwo edwɛkɛ. Ɔdwu mekɛ ne bie a sunsum ɛtane ne mɔ maa menli ɛhye mɔ anye si, bɛyɛ mumule anzɛɛ bɛbodɛboda bɛ nwo.​—Mateyu 12:22; Maake 5:2-5.

Kɛzi yɛbaho yɛatia Abɔnsam mɛlɛbɛla ne mɔ la

Ɔnle kɛ ɛsulo sunsum ɛtane ne mɔ ɔluakɛ, Baebolo ne kile kɛzi ɛbahola wɔaho wɔatia Abɔnsam bɔkɔɔ la:

• Sukoa kɛ ɛbanwu Abɔnsam ndenle ne mɔ amaa wɔanwu “ye ndenle ne mɔ” kpalɛ.​—2 Kɔlentema 2:11.

• Sukoa Baebolo ne na fa mɔɔ ɛbazukoa la bɔ wɔ ɛbɛla. Saa ɛfa Baebolo ngyinlazo ɛbɔ wɔ ɛbɛla a, ɔbabɔ ɛ nwo bane amaa Abɔnsam annyia ɛ nwo zo tumi.​—Ɛfɛsɛsema 6:11-18.

• Fuandi sunsum ɛtane ne mɔ ninyɛne mɔɔ ɛlɛ la gua. (Gyima ne 19:19) Ninyɛne ne bie a le edwɛne, mbuluku, magazine, ngɛlata nee vidio mɔɔ kanvo sunsum ɛtane nyɛleɛ la.