Russia Ɛhɔteta Ukraine
Wɔ February 24, 2022 nwonlomɔ mangyee ne, Russia sogyama hɔtetale Ukraine, ɔnva nwo mɔdenle mɔɔ maanle ngakyile nu mgbanyima bɔle kɛ bɛsi konle ɛhye adenle la. Kɛzi konle ɛhye baha ewiade ne ɛ? Ɔtɛkyɛle biala, Maamgbole Koyɛlɛ Eku ne kɛlɛvolɛ kpanyinli ne mɔɔ bɛfɛlɛ ye António Guterres la hanle kɛ: “Amaneɛ mɔɔ menli banwu ye nee ninyɛne mɔɔ bazɛkye la mɔɔ yɛnrɛhola yɛnrɛva yɛ adwenle yɛnrɛbu. Eza ɔbava Europe nee ewiade amuala banebɔlɛ yeado esiane nu.”
Asoo mɔɔ ɛlɛsisi la kile debie ɔ? Duzu a Baebolo ne ka ye wɔ nwo a?
Gyisɛse Kelaese hanle kɛ mekɛ bie bara mɔɔ “maanle badwazo atia maanle yɛɛ belemgbunlililɛ badwazo atia belemgbunlililɛ” a. (Mateyu 24:7) Kenga edwɛkɛ ne mɔɔ se “Duzu A Bahile Kɛ Yɛwɔ ‘Awieleɛ Mekɛ’ Anzɛɛ ‘Ewiade Awieleɛ Ne’ Anu A?” na ɛbanwu kɛ konle ɛhye mɔ ɛlɛmaa Gyisɛse ngapezo ne ara nu.
Yekile buluku ne mɔɔ wɔ Baebolo ne anu la ka awie bie mɔɔ de “ɛkpɔnwɔ kɔkɔlɛ bie” azo na bɛmaa ye adenle kɛ “ɔye anzodwolɛ ɔvi azɛlɛ ye azo” la anwo edwɛkɛ. Ɛhye gyi ɛkɛ ne maa konle konle. (Yekile 6:4) Kenga edwɛkɛ ne mɔɔ se “Mgbɔnwɔkavoma Nna Ne—Bɛmɛ A Le Nwane Mɔ?” na ɛbanwu kɛzi ngapezo ɛhye fale konle konle mɔɔ kɔ zo ɛnɛ anwo la.
Daneɛle buluku ne hanle akɛsakɛsa mɔɔ bahɔ zo wɔ “sɔlɔ belemgbunli ne” nee “nyiakɛ belemgbunli ne” avinli la anwo edwɛkɛ dole ɛkɛ. (Daneɛle 11:25-45) Nea vidio ne mɔɔ se Ngapezo Mɔɔ Ɛra Nu—Daneɛle Tile 11 na ɛbanwu deɛmɔti yɛkola yɛka kɛ Russia nee maanle mɔɔ bɛgyi ɔ nzi la a le sɔlɔ belemgbunli ne la.a
Eza Yekile ka “Nyamenle, Tumivolɛ Bedevinli ne kenle kpole ne anu konle ne” anwo edwɛkɛ. (Yekile 16:14, 16) Noko tɛ konle mɔɔ maanle maanle ne mɔ ɛlɛko ye ɛnɛ la anwo edwɛkɛ a ɔlɛka a. Amaa wɔanwu kenle bie konle zɔhane anwo edwɛkɛ dɔɔnwo la, kenga “Duzu A Le Amagɛdɔn Konle Ne?”
Duzu ati a yɛbahola yɛanyia anyelazo kɛ ninyɛne bayɛ boɛ kenle bie ɛ?
Baebolo ne ka kɛ Nyamenle bamaa bɛagyakyi “konle wɔ azɛlɛ ye kɔsɔɔti azo.” (Edwɛne 46:9) Kenga “A Real Hope for a Better Tomorrow” amaa wɔanwu ninyɛne mɔɔ Nyamenle ɛha kɛ ɔbayɛ ye kenle bie la.
Gyisɛse hilehilele ye ɛdoavolɛma ne kɛ bɛzɛlɛ bɛmaa Nyamenle Belemgbunlililɛ ne ɛrɛla. (Mateyu 6:9, 10) Belemgbunlililɛ ɛhye le arane mɔɔ wɔ anwuma mɔɔ bamaa bɛayɛ Nyamenle ɛhulolɛdeɛ wɔ azɛlɛ ye azo a. Nyamenle ɛhulolɛdeɛ ne bie a le kɛ ewiade amuala banyia anzodwolɛ. Amaa wɔanwu kɛzi Belemgbunlililɛ ne baboa wɔ la, nea Duzu A Le Nyamenle Belemgbunlililɛ Ne? vidio ne.
Gyihova Alasevolɛ mɔɔ bɛbo 129,000 la a wɔ Ukraine a. Bɛle kɛ Alasevolɛ mɔɔ bɛwɔ maanle ngakyile zo la, bɛngyi afoa biala wɔ maanyɛlɛ nu yɛɛ bɛngɔ konle kɛ mɔɔ Gyisɛse yɛle la. (Dwɔn 18:36) Wɔ ewiade amuala, Gyihova Alasevolɛ ɛlɛbɔ “Belemgbunlililɛ ne anwo edwɛkpa” ne nolo kɛ yemɔ a baye alesama ngyegyelɛ mɔɔ konle boka nwo la avi ɛkɛ a. (Mateyu 24:14) Saa ɛkulo kɛ ɛnwu anyelazo mɔɔ wɔ Baebolo ne anu la anwo edwɛkɛ dɔɔnwo a, ɛ nee yɛ ɛli ngitanwo na yɛbayɛ ngyehyɛleɛ yeamaa awie aboa wɔ.
a Saa ɛkulo kɛ ɛnwu ngapezo ɛhye anwo edwɛkɛ dɔɔnwo a, nea edwɛkɛ ne mɔɔ se “‘Sɔlɔ Belemgbunli Ne’ Wɔ Awieleɛ Mekɛ Ne Anu” yɛɛ “Kɛkala Nwane A Le ‘Sɔlɔ Belemgbunli Ne’?”