Mgbanyima, Kɛzi Bɛte Nganeɛ Wɔ Awie Mɔ Ɛtetelɛ Nwo Ɛ?

1, 2. Duzu a maangyebakyi zo neavolɛma ɛnwu ye wɔ asafo dɔɔnwo anu a?

MAANGYEBAKYI zo neavolɛ ne ɛlɛfa ayia mɔɔ ɔ nee mgbanyima ne mɔ ɛlɛyɛ la ara awieleɛ. Ɔnleanle mediema ɛhye mɔ mɔɔ bie mɔ bahola ayɛ ɔ ze na bɛyɛ gyima ɛsesebɛ la na ɔnyianle ɛlɔlɛ kpole ɔmaanle bɛ. Noko, ɛnee edwɛkɛ bie mɔɔ anwo hyia la ɛlɛgyegye ye. Ɔbizale bɛ kɛ, “Mediema, duzu a bɛlɛyɛ bɛatete awie mɔ bɛamaa bɛayɛ gyima dɔɔnwo wɔ asafo ne anu a?” Mediema ne mɔ ze kɛ wɔ maangyebakyi zo neavolɛ ne ɛkpɔlalɛ mɔɔ ɛze ɛhɔ la anu ɔmaanle bɛ anwosesebɛ kɛ bɛva mekɛ dɔɔnwo bɛtete awie mɔ. Kpanyinli ko hanle kɛ, “Ekyi bie ala a yɛyɛ ye wɔ nwo a.” Mgbanyima mɔɔ ɛha la liele dole nu.

² Saa ɛle kpanyinli a, bie a kɛ ɛdawɔ noko ɛbabua la ɛne. Maangyebakyi zo neavolɛma ɛnwu kɛ ɔwɔ kɛ mgbanyima dɔɔnwo fa mekɛ dɔɔnwo tete mediema mrenyia ngakula nee mgbanyinli amaa bɛaboa bɛamaa bɛanlea asafo ne. Noko, ɛhye bahola ayɛ se kpalɛ. Duzu ati ɔ?

3. (a) Kɛzi Baebolo ne maa yɛnwu kɛ awie mɔ ɛtetelɛ nwo hyia ɛ, na nzɔne ati a ɔwɔ kɛ yɛ muala yɛ nye die ndetelɛ ɛhye anwo ɛ? (Nea ɔ bo ɛkɛ edwɛkɛ ne.) (b) Duzu ati a awie mɔ ɛtetelɛ bahola ayɛ se amaa mgbanyima bie mɔ ɛ?

³ Kɛ kpanyinli la, ɛze kɛ mediema mrenyia mɔɔ ɛnyia mekɛ wɔatete bɛ la anwo hyia kpalɛ.a Ɛze kɛ bɛhyia mediema mrenyia dɔɔnwo mɔɔ bɛbamaa asafo ne mɔ anwo ayɛ se kɛkala na bɛaboa asafo fofolɛ kenle bie la anwo. (Kenga Ayezaya 60:22.) Baebolo ne se ‘ɛhilehile’ awie mɔ. (Kenga 2 Temɔte 2:2.) Noko ɔbahola yeayɛ se kɛ ɛbanyia mekɛ wɔayɛ zɔ. Ɔwɔ kɛ ɛnea wɔ abusua ne na eza ɛyɛ gyima. Eza ɔwɔ kɛ ɛdi asafo ne ngyianlɛ nee ninyɛne gyɛne mɔɔ hyia la anwo gyima. Kɛmɔ yɛlɛ ninyɛne dɔɔnwo yɛyɛ la ati, bɛmaa yɛzuzu deɛmɔti ɔhyia kɛ bɛnyia mekɛ bɛtete awie mɔ la anwo.

ƆWƆ KƐ BƐTETE BƐ NDƐNDƐ

4. Ɔdwu mekɛ ne bie a mgbanyima ɛntete mediema ndɛ, duzu ati ɔ?

⁴ Duzu ati a mediema mrenyia mɔɔ bɛtete bɛ wɔ asafo ne anu la bahola ayɛ se ɛ? Bie mɔ badwenle kɛ: ‘Asafo ne anu ninyɛne bie mɔ anwo hyia kpalɛ na ɔwɔ kɛ bɛdi nwolɛ gyima ndɛndɛ. Saa meantete awie mɔ ndɛndɛ a, ɔnrɛha asafo ne.’ Asoo ɔle nɔhalɛ? Bie a ɔwɔ kɛ ɛdi ninyɛne bie mɔ anwo gyima ndɛndɛ. Noko, saa bɛantete mediema mrenyia ndɛndɛ a, bɛbagyegye asafo ne.

5, 6. Duzu a yɛbahola yɛazukoa yɛavi kɛzi ɔwɔ kɛ delava nea ye kale la anu a? Kɛzi yɛbahola yɛava ɛhye yɛatoto awie mɔ mɔɔ bɛtete bɛ wɔ asafo ne anu la anwo ɛ?

⁵ Suzu neazo bie anwo. Delava ze kɛ, amaa kale ahyɛ la ɔwɔ kɛ ɔta ɔkakyi ye oil ne. Noko, bie a ɔbade nganeɛ kɛ patulo mɔɔ ɔbava yeagua nu la anwo hyia kpalɛ ɔluakɛ saa ɔwie a kale ne baha adenle nu. Bie a eza ɔbadwenle kɛ kɛmɔ ɔnlɛ alagye la ati amozi ɔbahola yeahakyi oil ne. Ye biala anu, kale ne bahɔ zo ayɛ gyima ekyi. Noko ɛhye bahola ayɛ esiane. Saa delava ne angakyi oil ne wɔ ye mekɛ nloa a, ɔnrɛhyɛ na kale ne azɛkye. Akee ɔbazɛkye mekɛ na eza yeabɔ kakɛ kpole wɔ kale ne boɛyɛlɛ nwo. Nzɔne a yɛsukoa yɛfi nu a?

⁶ Ɔwɔ kɛ mgbanyima di ninyɛne mɔɔ anwo hyia la anwo gyima ndɛndɛ. Bɛanyɛ ye zɔ a, ɔbagyegye asafo ne. Kɛmɔ ɔwɔ kɛ delava fa patulo gua kale nu dahuu la, zɔhane ala a ɔwɔ kɛ mgbanyima noko ‘nwu mɔɔ le kpalɛ la’ a. (Felepaema 1:10) Noko mgbanyima bie mɔ maa ninyɛne bie mɔ kyia bɛ somaa mɔɔ bɛnnyia mekɛ bɛntete awie mɔ a. Ɛhye bayɛ kɛ kale mɔɔ bɛngua oil wɔ nu la. Saa mgbanyima antete mediema mrenyia ndɛndɛ a, bɛnrɛnyia mrenyia mɔɔ bɛtete bɛ mɔɔ bɛbali ninyɛne mɔɔ anwo hyia la anwo gyima a.

7. Kɛzi ɔwɔ kɛ yɛbu mgbanyima mɔɔ nyia mekɛ tete awie mɔ la ɛ?

⁷ Yemɔti mmanyia adwenle ɛlɛ kɛ ndetelɛ nwo ɛngyia kpalɛ. Mgbanyima mɔɔ dwenle asafo ne kenle bie nwo na bɛnyia mekɛ bɛtete awie mɔ la le azonvolɛ mɔɔ bɛze nrɛlɛbɛ na bɛsonle bolɛ bɛmaa bɛ mediema mrenyia nee mraalɛ. (Kenga 1 Pita 4:10.) Kɛzi ɔboa asafo ne ɛ?

FA MEKƐ DI GYIMA KPALƐ

8. (a) Duzu ati a ɔwɔ kɛ mgbanyima tete awie mɔ ɛ? (b) Gyima mɔɔ anwo hyia la boni a mgbanyima mɔɔ bɛlɛsonle wɔ ɛleka mɔɔ bɛhyia moalɛ dɔɔnwo la lɛ ye yɛ a? (Nea ɛlɛka “Gyima Mɔɔ Anwo Hyia Ndɛndɛ.”)

⁸ Ɔwɔ kɛ mgbanyima mɔɔ lɛ anwubielɛ kpalɛ bɔbɔ la bɛlɛ bɛ nwo aze na bɛnwu ye kɛ mekɛ mɔɔ bɛlɛyɛ mgbanyinli la bɛnrɛhola bɛnrɛyɛ dɔɔnwo kɛmɔ bɛyɛ ye kɛkala la. (Maeka 6:8) Eza ɔwɔ kɛ mgbanyima nwu kɛ ‘munzule mekɛ mɔɔ bɛ nye ɛnla la’ bahola amaa yeayɛ se kɛ bɛbali bɛ ɛzonlelilɛ nwo gyima. (Nolobɔvo ne 9:11, 12; Gyemise 4:13, 14) Yemɔti kɛmɔ mgbanyima kulo Gyihova menli na bɛdwenle bɛ nwo la ati, bɛbɔ mɔdenle bɛfa ninyɛne mɔɔ bɛva ɛvolɛ dɔɔnwo bɛzukoa la bɛkilehile mgbavolɛ.​—Kenga Edwɛndolɛ 71:17, 18.

9. Kenle bie edwɛkɛ boni ati a ɔwɔ kɛ bɛtete awie mɔ a?

⁹ Mgbanyima mɔɔ tete awie mɔ la anwo hyia ɔluakɛ bɛ mɔdenlebɔlɛ ne bamaa asafo ne anwo ayɛ se. Bɛ ndetelɛ ne maa mrenyia dɔɔnwo siezie bɛ nwo kɛ bɛbamaa koyɛlɛ ara asafo ne anu na bɛali nɔhalɛ bɛamaa Nyamenle. Ɛhye anwo hyia wɔ awieleɛ mekɛ ɛhye anu, na ɔbaboa kpalɛ wɔ anwongyelelɛ kpole ne mɔɔ ɛlɛba la anu. (Yizikeɛle 38:10-12; Maeka 5:5, 6) Zɔhane ati, mediema mgbanyima, ɔvi ɛnɛ mɔɔ kɔ la, dahuu bɛnyia mekɛ bɛtete awie mɔ.

10. Amaa kpanyinli anyia mekɛ atete awie mɔ la, duzu a ɔwɔ kɛ ɔyɛ a?

¹⁰ Yɛze kɛ kɛkala bɛnlɛ alagye ɔluakɛ bɛlɛdi ninyɛne mɔɔ anwo hyia la anwo gyima wɔ asafo ne anu. Noko ɔwɔ kɛ bɛfa mekɛ mɔɔ bɛfa bɛdi zɔhane ninyɛne ne mɔ anwo gyima la bie bɛtete awie mɔ. (Nolobɔvo ne 3:1) Saa bɛyɛ zɔ a ɛnee bɛlɛfa bɛ mekɛ bɛali gyima kpalɛ na ɔbaboa asafo ne kenle bie.

KPONDƐ MEKƐ KPALƐ

11. (a) Duzu a yɛ anyelielɛ wɔ ndetelɛ nwo nzuzulɛ mɔɔ mgbanyima mɔɔ vi maanle gyɛne zo ɛva ɛmaa la anwo a? (b) Kɛmɔ Mrɛlɛbulɛ 15:22 kile la, duzu ati a ɔwɔ kɛ yɛsuzu mgbanyima gyɛne nzuzulɛ nwo a?

¹¹ Bɛbizale mgbanyima bie mɔ mɔɔ bɛhola bɛtete mediema mrenyia bɛmaa bɛyɛ dɔɔnwo wɔ asafo ne anu la kɛzi bɛyɛle ye la.b Asɛɛ mgbanyima ne mɔ amuala hanle edwɛkɛ ko ne ala ɔnva nwo kɛ asolo bɛ tɛnlabelɛ ne la. Nzɔne a ɛhye kile a? Ɔkile kɛ saa bɛgyinla Baebolo ne azo bɛtete sukoavoma mɔɔ bɛwɔ ‘asafo ne mɔ mɔɔ wɔ ɛleka biala la’ anu a ɔboa bɛ. (1 Kɔlentema 4:17) Yemɔti wɔ edwɛkɛ ɛhye nee mɔɔ doa zo la anu, yɛbazuzu nzuzulɛ mɔɔ mgbanyima ɛhye mɔ vale maanle la bie mɔ anwo. (Mrɛlɛbulɛ 15:22) Bɛbavɛlɛ menli mɔɔ fa ndetelɛ maa la kilehilevolɛma, yɛɛ menli mɔɔ bɛtete bɛ la sukoavoma.

12. Duzu a ɔwɔ kɛ kilehilevolɛ kpondɛ a, na nzɔne ati ɔ?

¹² Mɔɔ limoa, ɔwɔ kɛ kilehilevolɛ ne kpondɛ mekɛ kpalɛ. Nzɔne ati a ɛhye anwo hyia a? Kɛmɔ ɔwɔ kɛ ɛyazonlɛnli siezie azɛlɛ ne kolaa na yealua ma ne la, zɔhane ala a ɔwɔ kɛ kilehilevolɛ noko siezie sukoavo ne ahonle kolaa na yeahola yeahile ye ninyɛne fofolɛ a. Yemɔti kɛ ɔkɛyɛ na kilehilevolɛ ahola akpa mekɛ kpalɛ mɔɔ ɔbava yeatete awie la ɛ? Ɔbahola yeazukoa tete ngapezonli Samoɛle, kilehilevolɛ mɔɔ ɛbe la neazo ne.

13-15. (a) Nzɔne a Gyihova zele Samoɛle kɛ ɔyɛ a? (b) Kɛzi Samoɛle zieziele Sɔɔlo maanle ye gyima fofolɛ ne ɛ? (Nea mɔlebɛbo nvoninli ne.) (d) Nzɔne ati a Samoɛle anwo edwɛkɛ ɛhye baboa mgbanyima ɛnɛ a?

¹³ Kenle ko bie, wɔ ɛvolɛ mɔɔ bo 3,000 mɔɔ ɛze ɛhɔ la, Gyihova zele ngapezonli Samoɛle mɔɔ ɛnyi la kɛ: “Ɛhyema, bekezɛ ala, mebamaa nrenya bie mɔɔ vi Bɛngyaman abusua ekpunli ne anu la ara ɛ nwo ɛke. Kpokpa ye nwole kɛ ɔli belemgbunli ɔzie me menli Yizilayɛma.” (1 Samoɛle 9:15, 16) Samoɛle nwunle kɛ ɔnrɛli Yizilayɛ maanle ne anyunlu bieko na Gyihova kpondɛ kɛ ɔkpa kpanyinli fofolɛ. Yemɔti amaa Samoɛle aziezie nrenyia zɔhane amaa gyima fofolɛ ne la, ɔvale adwenle bie.

¹⁴ Aleɛ hyenle la, Samoɛle yiale Sɔɔlo, na Gyihova zele ngapezonli ne kɛ: “Nrenya ne mɔɔ menganle ye edwɛkɛ la, yemɔ ɛne.” Ɛkɛ ne ala, Samoɛle yɛle mɔɔ wɔ ye adwenle nu la. Ɔkpondɛle mekɛ kpalɛ amaa yeahola ɔ nee Sɔɔlo adendɛ. Samoɛle dole Sɔɔlo nee ye sonvolɛ ne ɛkponle, ɔmaanle bɛdɛnlanle ɛleka kpalɛ na bɛvale nane ne ɛleka kpalɛ ne bɛmaanle bɛ. Samoɛle zele kɛ: “Mɔɔ bɛvale bɛziele wɔ la ɛne. Di.” Bɛlile aleɛ ne bɛwiele la, Samoɛle nee Sɔɔlo hɔle sua nu. Mɔɔ bɛkɔ la, bɛ mu nwiɔ bɛbɔle adawu kpalɛ. Mɔɔ bɛdwule Samoɛle sua nu ɛkɛ la, bɛvole “sua ne ati zo,” na Samoɛle nee Sɔɔlo hɔle zo dendɛle hɔkpulale kɛ bɛhɔlale la. Ye alehyenlɛ nu, Samoɛle kpokpale Sɔɔlo, ɔvole ɔ nvoka anwo, na ɔmaanle ye adehilelɛ dɔɔnwo. Yemɔ anzi, Sɔɔlo hɔle mɔɔ ɛnee yeziezie ɔ nwo yemaa mɔɔ bazi bieko la.​—1 Samoɛle 9:17-27; 10:1.

¹⁵ Samoɛle kpokpale Sɔɔlo ɔmaanle ɔrayɛle maanle bie adekilevolɛ. Ɛhye le ngakyile fi adiema nrenyia mɔɔ bɛtete ye bɛamaa yearayɛ asafo nu kpanyinli anzɛɛ sonvolɛ la anwo. Noko mgbanyima bahola azukoa debie kpalɛ avi kɛzi Samoɛle zieziele Sɔɔlo ahonle la anu. Bɛmaa yɛzuzu nuhua nwiɔ anwo.

KILEHILEVOLƐMA MƆƆ LƐ ƐHULOLƐ NA BƐLE AGƆNWOLƐMA KPALƐ

16. (a) Yizilayɛma hanle kɛ bɛkpondɛ belemgbunli la kɛzi Samoɛle dele nganeɛ ɛ? (b) Gyihova zele Samoɛle kɛ ɔkpokpa Sɔɔlo la kɛzi ɔyɛle ye nyɛleɛ ɛ?

¹⁶ Nyia ɛhulolɛ, mmatwenlehwenle ɛ bo aze. Samoɛle dele kɛ Yizilayɛma kpondɛ sonla belemgbunli la, ɔ rɛle bɔle na ɔdele nganeɛ kɛ bɛkpo ye. (1 Samoɛle 8:4-8) Gyihova zele Samoɛle fane nsa kɛ ɔdie menli ne ɔluakɛ ɛnee Samoɛle ɛmkpondɛ kɛ ɔsie belemgbunli ɔmaa bɛ. (1 Samoɛle 8:7, 9, 22) Ɔnva nwo kɛ ɔdele nganeɛ zɛhae la, ɔ nye ambolo anzɛɛ yeanva nrenyia ne mɔɔ bali ɔ gyakɛ anu kɛ adekilevolɛ la anwo ɛya. Mɔɔ Gyihova zele Samoɛle kɛ ɔkpokpa Sɔɔlo la, yeandwehwenle ɔ bo aze. Ɔvile ye ahonle nu ɔyɛle tieyɛ, tɛ kɛ ɔwɔ kɛ ɔyɛ la ati ɔ, emomu Gyihova mɔɔ ɔkulo ye la ati ɔ.

17. Kɛzi mgbanyima sukoa Samoɛle neazo ne ɛnɛ ɛ, na duzu a maa bɛ nye die a?

¹⁷ Mgbanyima mɔɔ lɛ anwubielɛ la dɔɔnwo wɔ ɛkɛ mɔɔ bɛzukoa Samoɛle na bɛtete awie mɔ wɔ ɛlɔlɛ adenle zo a. (1 Pita 5:2) Mgbanyima ɛhye mɔ mɔɔ lɛ ɛlɔlɛ la fi bɛ ɛhulolɛ nu kilehile awie mɔ na bɛnzulo kɛ bɛbamaa sukoavoma ne anyia nwolɛ adenle mɔɔ bɛlɛ ye wɔ asafo ne anu la bie. Emomu, bɛte nganeɛ kɛ bɛ nee mediema ɛhye mɔ a “ɛlɛyɛ gyima” a na bɛbaboa bɛamaa bɛali asafo ne ngyianlɛ nwo gyima. (2 Kɔlentema 1:24; Hibuluma 13:16) Saa mgbanyima ɛhye mɔ mɔɔ bɛnle angomedi la nwu kɛ sukoavoma ɛhye mɔ ɛlɛbɔ mɔdenle aboa Gyihova menli a, bɛ nye die.​—Gyima ne 20:35.

18, 19. Kɛ ɔkɛyɛ na kpanyinli aziezie sukoavo bie ahonle amaa ndetelɛ ɛ, na nzɔne ati a nwolɛ hyia a?

¹⁸ Yɛ agɔnwolɛ, tɛ kilehilevolɛ ala. Mɔɔ Samoɛle yiale Sɔɔlo la, anrɛɛ ɔbahola yeagua nwole ne ɔ ti zo yeakpokpa ye ɛkɛ ne ala. Anrɛɛ ɔbakpokpa belemgbunli fofolɛ ne mɔɔ belemgbunli ne ɛnze kɛzi ɔbali Nyamenle menli ne anyunlu a. Yemɔti Samoɛle nyianle abotane zieziele Sɔɔlo ahonle maanle ye gyima fofolɛ ne. Kolaa na yeakpokpa Sɔɔlo la, bɛbɔle nu bɛlile debie, bɛdiediale, bɛbɔle adawu bɛhyɛle na ɔmaanle ye ɛleka ɔlale. Samoɛle hendɛle mekɛ kpalɛ na yeakpokpa belemgbunli fofolɛ ne.

¹⁹ Ɛnɛ noko kɛ ɔde la ɛne. Kolaa na kpanyinli bie abɔ ɔ bo kɛ ɔtete adiema nrenyia bie la, ɔwɔ kɛ ɔbɔ mɔdenle kɛ ɔbayɛ sukoavo ne agɔnwo. Kɛmɔ asolo awie biala tɛnlabelɛ nee ye amaamuo la ati, asolo mɔɔ kpanyinli biala bahola ayɛ amaa sukoavo bie anye alie a. Noko, ɔnva nwo ɛleka mɔɔ ɛde nee alagye mɔɔ ɛnlɛ ye la, saa ɛnyia mekɛ ɛmaa sukoavo ne a, ɔbade nganeɛ kɛ ɔ nwo hyia wɔ. (Kenga Wulomuma 12:10.) Nɔhalɛ nu, sukoavoma anye bɛazɔ ɛlɔlɛ nee mekɛ mɔɔ bɛvale bɛboale bɛ la kpalɛ.

20, 21. (a) Nzɔne a ɔwɔ kɛ kilehilevolɛ mɔɔ yɛ deɛ la yɛ a? (b) Duzu a yɛbazuzu nwo wɔ edwɛkɛ mɔɔ doa zo la anu a?

²⁰ Nɔhalɛ nu, kɛ kilehilevolɛ mɔɔ yɛ deɛ la kulo kɛ ɔtete awie mɔ. Noko ɔwɔ kɛ kilehilevolɛ mɔɔ yɛ deɛ la eza kulo ahenle mɔɔ ɔlɛtete ye la. (Fa toto Dwɔn 5:20 anwo.) Nzɔne ati a ɛhye anwo hyia a? Ɔluakɛ saa sukoavo ne te nganeɛ kɛ ɛkulo ye edwɛkɛ amgba a, ɔbanyia ɛhulolɛ kɛ ɔbazukoa wɔ. Yemɔti mgbanyima, bɛbɔ mɔdenle kɛ bɛbayɛ kilehilevolɛma nee agɔnwolɛma kpalɛ.​—Mrɛlɛbulɛ  17:17; Dwɔn 15:15.

²¹ Saa kpanyinli siezie sukoavo ne ahonle wie a, ɔbahola yeabɔ ɔ bo yeatete ye. Ndenle boni mɔ a kpanyinli bahola alua zo a? Yɛbazuzu nwo wɔ edwɛkɛ mɔɔ doa zo la anu.