Anyelielɛ Mɔɔ Menyianle Wɔ Gyihova Ɛzonlenlɛ Nu

Ye ɛvolɛ bieko, bɛhanle bɛhilele Bɛtɛle abusua ne kɛ bɛlɛfa milahyinli fofolɛ mɔɔ bɛfa bɛpenlete ninyɛne la bɛahɔ South Africa, ɔti bɛbahyia mediema nwo. Menvale me duma mengɔle, na me nye liele kɛ bɛvale me la. Eza bɛvale Canada Bɛtɛlema nsa bɛbokale nwo. Bɛmɛ a le Dennis Leech, Bill McLellan yɛɛ Ken Nordin. Bɛhanle kɛ saa yɛkɔ a yɛbahyɛ!

Menvɛlɛle me mame wɔ fonu zo na menganle mengilele ye kɛ: “Meka anyelielɛ edwɛkɛ bie meahile wɔ. Melɛkɔ South Africa!” Me mame ɛngulo ɛdendɛlɛ fee noko ɛnee ɔlɛ diedi kpole yɛɛ yenyi wɔ sunsum nu. Yeanga edwɛkɛ dɔɔnwo, noko ɛnee meze kɛ ɔdie ɔto nu. Ɔyɛle me mame nee me papa nyane kɛ melɛkɔ moa ɛdeɛ, noko bɛ nuhua biala anga kɛ memmakɔ.

MENGƆLE SOUTH AFRICA!

Bɛmaanle yɛdayɛ menli nna ne yɛlimoale yɛhɔle Brooklyn Bɛtɛle, na bɛvale siane nsa bɛhilele yɛ kɛzi bɛfa milahyinli bie mɔɔ bɛfa bɛpenlete mbuluku la bɛdi gyima la. Akee yɛhɔvole meli bie mɔɔ ɛlɛkɔ Cape Town mɔɔ wɔ South Africa la. Ɛnee bɔ zo mɔɔ meli ɛvolɛ 20 a. Yɛhɔvale keteke, na yɛdule yɛ bo nɔsolɛ nu yɛvile Cape Town kɛ yɛkɔ Johannesburg. Aleɛbahye ne, keteke ne gyinlanle sua ekyi bie mɔɔ wɔ ɛleka bie mɔɔ le kɛ ɛsɛlɛ mɔɔ bɛfɛlɛ ye Karoo la azo. Ɛnee munlutu ngome yɛɛ ɛkɛ ne dɔ. Yɛdayɛ menli nna ne yɛnleanle nvɛnzɛlɛ ne anu kɛ yɛnea ɛleka mɔɔ yɛluolua la. Kɛzi gyimalillɛ fofolɛ ɛhye bayɛ ɛ? Nzinlii, yɛziale yɛrale ɛleka ɛhye, yɛnwunle kɛ azua ngyikyi ɛhye mɔ azo le kɛnlɛma yɛɛ bɛde anzodwolɛ nu.

Menvale milahyinli mɔɔ bɛfɛlɛ ye Linotype la menyɛle gyima wɔ ɛvolɛ ekyi anu, ɛnee mehyehyɛ ngɛlɛleramgbɔkɛ ne mɔ wɔ zolɛ amaa bɛava bɛapenlete Watchtower nee Awake! magazine ne mɔ. Ɛnee ɔfese ne penlete magazine wɔ Africa aneɛ dɔɔnwo anu na tɛ aneɛ mɔɔ bɛka wɔ South Africa la angomekye. Yɛ nye liele kɛ bɛlɛfa mbuluku ɛpenletelɛ milahyinli ɛhye mɔɔ ɔti yɛvi Canada yɛrale la bɛali gyima kpalɛ la!

Nzinlii, menyɛle gyima wɔ gyimalilɛleka mɔɔ nea mbuluku ɛpenletelɛ, mbuluku mɔɔ bɛfa bɛanwa nee edwɛkɛbohilelɛ gyima ne azo la. Ɛnee menlɛ alagye fee, noko ɛnee me kunlu dwo me nwo.

AGYALƐ NEE GYIMALILƐ FOFOLƐ

Wɔ 1968, mengyale adekpakyelɛnli bie mɔɔ bɛfɛlɛ ye Laura Bowen, mɔɔ ɛnee de bikye Bɛtɛle la. Ɛnee ɔdaye noko ɔbayɛ gyima ɔboa edwɛkɛbohilelɛma mɔɔ wɔ Bɛtɛle la. Mekɛ zɔhane, ɛnee saa bɛgya a, bɛmmaa bɛnda bɛndɛnla Bɛtɛle, ɔti bɛmaanle yɛhɔyɛle adekpakyelɛ titilima. Ɔgyegyele me ekyi. Meyɛ gyima ɛvolɛ bulu wɔ Bɛtɛle, wɔ ɛkɛ ne, ɛnee bɛmaa me aleɛ nee dabelɛ, na kɛkala, kɛ ɔkɛyɛ na ezukoa mɔɔ bɛfa bɛmaa adekpakyelɛ titilima la aza yɛ ɛ? Siane biala, ɛnee bɛmaa yɛ rand 25 (mekɛ zɔhane ɛnee ɔle U.S. $35)​—noko kyesɛ yɛkola yɛfa dɔnehwele dodo mɔɔ bɛkpondɛ la yɛyɛ gyima, yɛyɛ sia kɔkpɔla na yɛfa mbuluku mɔɔ fɛta la yɛmaa. Ɛnee ɔwɔ kɛ yɛfa zɔhane ezukoa ne bie yɛtua yɛ sua kakɛ, yɛtɔ aleɛ, yɛfo kale, yɛtɔ nyile nee ninyɛne gyɛne.

Bɛmaanle yɛ nee ekpunli ekyi bie mɔɔ bikye suakpole Durban, mɔɔ wɔ India Nyevile Kpole ne anloa la hɔyɛle gyima. Ɛnee Indiama dɔɔnwo wɔ ɛkɛ, bɛ nuhua dɔɔnwo le gyimayɛvoma mɔɔ rale South Africa kɛ bɛkayɛ gyima wɔ asikyɛlɛ kɔmpɛlɛ ne anu wɔ 1875 ne anu la abozoamra. Kɛkala bɛyɛ gyima gyɛne, noko bɛangakyi bɛ amaamuo nee bɛ aleɛ. Ɛnee bɛka Nrenleza, ɔti yeammaa yeanyɛ se kɛ yɛbali bɛ daselɛ.

Ɛnee ɔwɔ kɛ adekpakyelɛ titilima fa dɔnehwele 150 yɛ gyima siane biala, ɔti wɔ kenle mɔɔ limoa la, me nee Laura hanle kɛ yɛbava dɔnehwele nsia yɛhɔ daselɛlilɛ. Ɛnee maanle nu dɔ kpalɛ. Ɛnee yɛnlɛ sia kɔkpɔla nee Baebolo ɛzukoalɛ biala mɔɔ yɛbayɛ a, ɔti ɛnee ɔwɔ kɛ yɛfa dɔnehwele nsia yɛyɛ azua nu daselɛlilɛ. Yɛhɔle ekyi la, meneanle me wate ne, na ɛnee bɔ zo mɔɔ yɛnyia mitini 40 a! Mɔɔ rale me ti anu la a le kɛ, kɛ ɔkɛyɛ na yɛahola yɛayɛ gyima ɛhye ɛ?

Yeangyɛ, yɛyɛle ngyehyɛleɛ kpalɛ. Kenle ko biala, yɛfa paano nee subue anzɛɛ kɔfee ekyi yɛsia yɛ nwo. Saa yɛfɛ a, yɛfa yɛ kale ekyi ne yɛsie mbaka mɔɔ bikye ɛkɛ ne la bie abo​—ɔyɛ a India ngakula bie bagyinlegyinla yɛ nwo ɛkɛ na bɛnea yɛ ɔluakɛ yɛle ngakyile. Yeangyɛ yɛnwunle kɛ, saa yɛdi daselɛ dɔnehwele nwiɔ anzɛɛ nsa a, akee mekɛ ne ɛlɛkɔ bɔbɔ a yɛnnwu ye.

Baebolo nu nɔhalɛ ne mɔɔ yɛhanle yɛhilele menli ɛhye mɔɔ bɛkulo nyɛvolɛ la maanle yɛ nye liele kpalɛ! Yɛnwunle kɛ Indiama bu debie, bɛyɛ nyele yɛɛ bɛkulo Nyamenle. Hinduma dɔɔnwo diele edwɛkɛ ne. Ɛnee bɛkulo kɛ bɛsukoa Gyihova, Gyisɛse, Baebolo ne, ewiade fofolɛ mɔɔ anzodwolɛ badɛnla nu yɛɛ anyelazo mɔɔ wɔ ɛkɛ maa mowuamra la anwo debie. Ɛvolɛ ko anzi, yɛnyianle Baebolo sukoavoma 20. Kenle ko biala, yɛ nee mbusua mɔɔ yɛ nee bɛ sukoa debie la anu ko bɔ nu di aleɛ. Yɛ nye liele kpalɛ.

Yeangyɛ, bɛhanle kɛ yɛhɔyɛ maangyebakyi zo neavolɛ gyima wɔ India Nyevile Kpole ne anloa. Dapɛne biala, yɛkɔtɛnla abusua bie mɔɔ wɔ asafo ne mɔɔ yɛhɔkpɔla bɛ la anu la sua nu na yɛ nee nolobɔlɛma yɛ gyima na yɛmaa bɛ anwosesebɛ. Bɛyɛle yɛ kɛ bɛ mbusuafoɔ, na yɛ nee bɛ mra yɛɛ bɛ nyɛmoa bɔbɔ lile nwɔhoa. Ɛvolɛ nwiɔ pɛle nu. Na arɛlevilɛ nu, Bɛtɛle vɛlɛle yɛ. Adiema nrenyia ne mɔɔ vɛlɛle yɛ la hanle kɛ: “Yɛkulo kɛ bɛsia bɛba Bɛtɛle.” Menganle kɛ: “Yɛ nye die ɛleka mɔɔ yɛwɔ la.” Noko nɔhalɛ nu, ɛnee yɛlɛ ɛhulolɛ kɛ yɛbahɔ ɛleka biala mɔɔ bɛbaha kɛ yɛhɔ la.

YƐZIALE YƐHƆLE BƐTƐLE

Mɔɔ mengɔdwule Bɛtɛle la, menyɛle gyima wɔ Service Department, na me nee mediema mɔɔ bɛnyi sunsum nu na bɛlɛ anwubielɛ la yɛle gyima. Zɔhane mekɛ ne, ɛnee saa maangyebakyi zo neavolɛ kɔkpɔla asafo biala a, ɔfa bɛ nwo amaneɛbɔlɛ ɔkɔmaa Bɛtɛle na Service Department ne ahɛlɛ asafo ne kɛlata. Ɛnee bɛkɛlɛ kɛlata ne kɛ, bɛfa bɛamaa mediema ne mɔ anwosesebɛ na bɛava adehilelɛ biala mɔɔ bɛhyia nwo la bɛamaa bɛ. Ɛnee ɔwɔ kɛ kɛlɛhɛlɛvolɛma ne yɛ gyima ɛsesebɛ kile ngɛlɛta mɔɔ maangyebakyi zo neavolɛma ne bava ara la abo fi Xhosa, Zulu, nee aneɛ gyɛne nu kɔ Nrenleza nu na eza bɛahile bie abo bɛavi Nrenleza nu bɛahɔ Africa aneɛ ngakyile nu. Edwɛkɛbohilelɛma ɛhye mɔ mɔɔ yɛ gyima ɛsesebɛ la maanle menwunle ngyegyelɛ mɔɔ yɛ mediema abibilema ɛlɛyia la na ɛhye maanle me nye liele bɛ nwo kpalɛ.

Wɔ zɔhane mekɛ ne, ɛnee arane ne ɛmmaa adenle kɛ alɔfolɛ nee abibilema babɔ nu ayɛ ninyɛne. Ɛnee asolo ɛleka mɔɔ alɔfolɛ de yɛɛ asolo ɛleka mɔɔ abibilema de. Ɛnee yɛ mediema mɔɔ bɛle abibilema la ka bɛdabɛ mumua ne bɛ aneɛ, bɛfa bɛ aneɛ bɛdi daselɛ yɛɛ yemɔ ala a bɛfa bɛyɛ debiezukoalɛ a.

Kɛmɔ ɛnee menli mɔɔ ka Nrenleza la azɛlɛsinli nu ala a meyɛ gyima la ati, ɛnee menze abibilema dɔɔnwo. Noko kɛkala, menyia nwolɛ adenle kɛ mebazukoa abibilema nee bɛ amaamuo nwo debie. Menwunle kɛ ɛnee yɛ mediema ne mɔ ɛlɛyia ngyegyelɛ ɔlua bɛ ɛkɛ ne amaamuo nee ɛzonlenlɛ nu diedi ti. Bɛlale akɛnrasesebɛ ali. Bɛdwazole bɛtiale amaamuo mɔɔ ɛngyi Ngɛlɛlera ne azo yɛɛ bɛanva bɛ nwo bɛanwulowula amaamuo mɔɔ sunsum evinli nyɛleɛ wɔ nu la anu ɔnva nwo kɛ bɛ mbusuafoɔ nee bɛ namule ne azo amra dwazole tiale bɛ la! Ɛnee menli mɔɔ wɔ namunamu ne mɔ azo la di ehyia kpalɛ. Bɛ nuhua dɔɔnwo angɔ sukulu noko bɛbu Baebolo ne kpalɛ.

Menyianle nwolɛ adenle memboale memaanle yɛlile ɛzonlenlɛ nwo fanwodi mɔɔ yɛlɛ nee afoa biala mɔɔ yɛngyi la anwo edwɛkɛ wɔ kɔɔto. Saa ɛnwu kɛzi mɔɔ Alasevolɛ ngakula mɔɔ kɛmɔ bɛanva bɛ nwo bɛanwula sukulu asɔneyɛlɛ nee edwɛnedolɛ nu la ati bɛvoa bɛ bɛvi sukulu nu la ɛlɛda nɔhalɛlilɛ nee akanrasesebɛ ali la a, ɔmaa wɔ diedi nu mia kpalɛ.

Mediema mɔɔ wɔ Africa maanle ekyi bie mɔɔ ɛnee bɛfɛlɛ ye Swaziland anu la noko yiale ngyegyelɛ fofolɛ. Mɔɔ Belemgbunli Sobhuza II wule la, ɛnee ɔwɔ kɛ maanlema ne kɔsɔɔti di ɛzɛne nwo amaamuo bie azo. Ɔwɔ kɛ mrenyia kpa bɛ enrinli ne na mraalɛ pepɛ bɛ enrinli ne azo maa ɔyɛ nzinrenzinra. Kɛmɔ mediema ne mɔ anva bɛ nwo anwula nyɛleɛ ɛhye mɔɔ bɛyɛ bɛmaa mowuamra anu la ati, bɛyɛle bɛ kpɔdekpɔde. Nɔhalɛ mɔɔ bɛlile bɛmaanle Gyihova la maanle yɛlile fɛlɛko kpole! Yɛzukoale nɔhalɛlilɛ nee abotanezilɛ nwo ninyɛne dɔɔnwo yɛvile yɛ mediema mɔɔ wɔ Africa la ɛkɛ na yemɔ maanle yɛ diedi nu miale.

MENZIALE MENGƆNYƐLE GYIMA WƆ ƐLEKA MƆƆ BƐPENLETE MBULUKU LA

Wɔ 1981, bɛhanle kɛ menzia mengɔyɛ gyima wɔ ɛleka mɔɔ bɛpenlete mbuluku la amaa meaboa meamaa bɛava kɔmpita bɛayɛ gyima ne. Ɛnee ɔle anyelielɛ mekɛ! Ɛnee adenle mɔɔ bɛdua zo bɛpenlete mbuluku la ɛlɛkakyi. Awie mɔɔ tɔne milahyinli fofolɛ ɛhye mɔɔ bɛfa bɛpenlete mbuluku la maanle ɔfese ne ko kɛ yɛzɔ yɛnlea mɔɔ yeanlie yɛ ɛhwee a. Ɛhye maanle yɛyele milahyinli dɛba ngɔnla mɔɔ ɛnee yɛlɛ la yɛvile ɛkɛ na yɛvale fofolɛ nnu yɛziele ɔ gyakɛ anu. Eza bɛvale milahyinli gyɛne mɔɔ bɛfa bɛpenlete mbuluku la bɛrabokale nwo. Ɛnee akee gyima ne ɛlɛtia kpalɛ!

Kɔmpita boale maanle yɛvale MEPS, Multilanguage Electronic Publishing System, mɔɔ boa maa yɛhyehyɛ edwɛkɛ ne wɔ ngɛlata zo la yɛlile gyima. Ɔvi mekɛ mɔɔ yɛdayɛ menli nna mɔɔ yɛvi Canada Bɛtɛle la rale South Africa la, ɛlɛtɔlɔneke ninyɛne ɛnyia anyuhɔlɛ kpalɛ! (Aye. 60:17) Ɔkadwu mekɛ ɛhye la, ɛnee yɛ muala yɛgya adekpakyelɛma mɔɔ bɔ mɔdenle na bɛnyi sunsum nu la. Ɛnee me nee Bill tɛbɔ Bɛtɛle yɛɛ Ken nee Dennis ɛwo ngakula na bɛde bɛbikye yɛ.

Ɛnee gyima ne ɛlɛyɛ kpole wɔ ɔfese ɛkɛ. Ɛnee bɛlɛkile mbuluku bo bɛahɔ aneɛ dɔɔnwo anu na bɛapenlete, yɛɛ ɔwɔ kɛ bɛfa bie bɛnwa mediema mɔɔ wɔ maanle gyɛne zo la. Ɔti ɔwɔ kɛ bɛsisi Bɛtɛle azua fofolɛ. Mediema ne mɔ zile bie wɔ ɛleka kɛnlɛma bie mɔɔ wɔ Johannesburg adɔleɛ la, na bɛyilale zo wɔ 1987. Me nye liele kɛ menyɛle zɔhane gyima ne bie na membokale South Africa Ɔfese Kɔmatii ne anwo la.

GYIMALILƐ FOFOLƐ BIEKO!

Wɔ 2001, bɛvɛlɛle me kɛ membamboka United States Ɔfese Kɔmatii fofolɛ ne mɔɔ bɛde la anwo, na ɔzinle yɛ nwo kpole. Ɔyɛle yɛ nyane kɛ yɛlɛgyakyi yɛ gyima nee yɛ gɔnwo mɔ wɔ South Africa la, noko yɛ nye liele kɛ yɛlɛkɔ yɛahɔboka United States Bɛtɛle abusua ne anwo la.

Noko ɛnee Laura mame mɔɔ ɛyɛ kpanyinli mɔɔ yɛlɛgyakyi ye ɛkɛ yɛahɔ la gyegye yɛ. Saa yɛkɔ New York a, yɛnrɛhola yɛnrɛnlea ye kpalɛ, noko Laura amediema mraalɛ nsa ne hanle kɛ bɛbanlea ye. Bɛhanle kɛ, “Yɛmɛ yɛnrɛhola yɛnrɛyɛ dahuu ɛzonlenlɛ gyima ne bie, noko saa yɛnea yɛ mame a, ɔbaboa bɛ yeamaa bɛahɔ zo bɛayɛ bɛ gyima ne.” Yɛ nye sɔ mɔɔ bɛyɛle la kpalɛ.

Zɔhane ala a me diema ne nee ɔ ye mɔɔ de Toronto mɔɔ wɔ Canada la hanle kɛ bɛbanlea me mame mɔɔ ɛyɛ kunlavolɛ la a. Mekɛ zɔhane, ɛnee bɛ nee ye ɛdɛnla ɛvolɛ mɔɔ bo 20. Mɔɔ yɛhɔdwule New York la, yeangyɛ biala yɛɛ me mame wule a, noko yɛ nye sɔ kɛzi bɛnleanle ye too ɔhɔle ewule nu la. Saa ɛlɛ mbusuafoɔ mɔɔ lɛ ɛhulolɛ kɛ bɛbayɛ nzenzaleɛ wɔ bɛ ɛbɛlabɔlɛ nu amaa bɛali ɛzonlelilɛ bie mɔ mɔɔ ɛnla aze la anwo gyima a, ɔle nyilalɛ kpole!

Gyima mɔɔ menyɛle wɔ United States wɔ ɛvolɛ ekyi anu la a le mbuluku ɛyɛlɛ, na kɛkala bɔbɔ mɔɔ bɛdua adwuliso ninyɛne zo a bɛyɛ a yɛɛ ye ɛyɛlɛ ɛnyɛ se dɔɔnwo. Kenlensa ye, melɛyɛ gyima wɔ Purchasing Department, gyimalilɛleka ne mɔɔ bɛtotɔ ninyɛne bɛmaa Bɛtɛle la. Ɔyɛ me anyelielɛ kɛ meva ɛvolɛ mɔɔ bo 20 meyɛ gyima wɔ Bɛtɛle kpole ɛhye anu la. Kɛkala Bɛtɛle abusua ne anu amra mɔɔ de sua nu ɛke la le kɛyɛ 5,000, yɛɛ mediema mɔɔ fi sua nu baboa la le kɛyɛ 2,000!

Wɔ ɛvolɛ 60 mɔɔ ɛpɛ nu la anu, meandwenle nwolɛ ɛlɛ kɛ ɛke a mebadɛnla a. Laura ɛboa me wɔ ɛvolɛ ɛhye mɔ amuala anu. Yɛ nye ɛlie kpalɛ wɔ ɛbɛlabɔlɛ nu! Yɛ nye sɔ gyimalilɛ ngakyile mɔɔ yɛnyianle nee mediema mɔɔ yɛ nee bɛ yɛle gyima la kpalɛ. Mediema ɛhye mɔ bie wɔ Bɛtɛle ngakyile mɔɔ ɔfese ne zoanle yɛ maanle yɛhɔkpɔlale bɛ la anu. Kɛkala mɔɔ mebo ɛvolɛ 80 la, bɛde me gyima ne azo ɔluakɛ mediema mgbavolɛ dɔɔnwo mɔɔ bɔ mɔdenle mɔɔ bahola ayɛ gyima ne la wɔ ɛkɛ.

Edwɛndolɛnli ne hanle kɛ: “Anyelielɛ a le maanle ne mɔɔ ye Nyamenle a le Gyihova” la. (Edw. 33:12) Ɔle nɔhalɛ bɔkɔɔ! Ɔyɛ me anyelielɛ kɛ, me nee Gyihova menli ne mɔɔ anye die la ɛbɔ nu ɛzonle la.