Sie Ɛ Nwo Dii Na Nyia Gyihova Anu Anwodozo YƐ 2021 ƐVOLƐDWƐKƐ NE:

1. Kpuya boni a Belemgbunli Devidi bizale mɔɔ yɛ nuhua bie mɔ bahola abiza bie a?

YƐ MUALA yɛkulo kɛ yɛnyia asetɛnla mɔɔ anzodwolɛ wɔ nu. Yɛ nuhua biala ɛngulo kɛ adwenleadwenle tɔ ɔ nwo. Noko akee, ɔdwu mekɛ ne bie a ɔba ye zɔ. Nɔhalɛ nu, bie a Gyihova azonvolɛ bie mɔ babiza kpuya mɔɔ Belemgbunli Devidi bizale Gyihova la bie: “Mendwenledwenle, na menli nyane me ahonle nu alehyenlɛ biala mengɔdwu kenlenzu?”​—Edw. 13:2.

2. Duzu a yɛbazuzu nwo wɔ edwɛkɛ ɛhye anu a?

² Yɛnrɛhola yɛnrɛye adwenleadwenle yɛnrɛvi yɛ ɛbɛlabɔlɛ nu bɔkɔɔ, noko yɛbahola yɛade zo. Wɔ edwɛkɛ ɛhye anu, yɛbalimoa yɛazuzu ninyɛne bie mɔ mɔɔ kola maa adwenleadwenle tɔ yɛ nwo la anwo. Akee yɛbazuzu ninyɛne nsia mɔɔ yɛbahola yɛayɛ amaa yɛazie yɛ nwo dii wɔ mekɛ mɔɔ yɛlɛyia ngyegyelɛ la anwo.

DUZU A KOLA MAA ADWENLEADWENLE TƆ YƐ NWO A?

3. Ninyɛne boni a kola maa adwenleadwenle tɔ yɛ nwo a, na duzu a yɛbahola yɛayɛ ye wɔ nwolɛ a?

³ Bie a yɛnrɛhola yɛnrɛyɛ ninyɛne bie mɔ mɔɔ maa adwenleadwenle tɔ yɛ nwo la anwo ɛhwee. Kɛ neazo la, yɛnrɛhola yɛnrɛyɛ kɛzi aleɛ, adɛladeɛ nee sua bolɛ bahɔ anwuma ɛvolɛ biala la anwo ɛhwee; yɛɛ yɛnrɛhola yɛnrɛhile fane dodo mɔɔ yɛ gɔnwo mɔ gyimayɛvoma anzɛɛ sukuluma babɔ mɔdenle kɛ bɛmaa yɛabɔ adalɛ anzɛɛ yɛabɔ ɛbɛlatane la. Eza yɛnrɛhola yɛnrɛzi menli adenle kɛ bɛmmadi ɛtane wɔ yɛ kpalɛ ne azo. Yɛyia ngyegyelɛ ɛhye mɔ ɔluakɛ yɛde menli mɔɔ bɛnva Baebolo ngyinlazo bɛmbɔ bɛ ɛbɛla la avinli. Seetan, ewiade ɛhye nyamenle ne ze ye kɛ “mekɛ ɛhye anu adwenleadwenle” bahola amaa menli bie mɔ agyakyi Gyihova ɛzonlenlɛ. (Mat. 13:22; 1 Dwɔn 5:19) Ɔti ɔnyɛ nwanwane kɛ ninyɛne mɔɔ maa adwenleadwenle tɔ yɛ nwo la ɛbu ewiade ɛhye anu la!

4. Saa yɛfa yɛ adwenle yɛsie yɛ ngyegyelɛ ne mɔ azo a, duzu a bahola azi a?

⁴ Saa yɛfa yɛ adwenle yɛsie yɛ ngyegyelɛ ne mɔ azo a, ɔbamaa adwenleadwenle adɔ yɛ nwo. Kɛ neazo la, bie a yɛbadwenle kɛ yɛnrɛnyia ezukoa mɔɔ yɛbava yɛatotɔ ninyɛne mɔɔ yɛhyia nwo la anzɛɛ yɛ nwo bado yɛ mɔɔ yɛnrɛhola gyima yɛ anzɛɛ bie bɔbɔ a yɛ gyima bavi yɛ sa. Eza bie a ɔbagyegye yɛ kɛ saa yɛyia sɔnea a, yɛnrɛhola yɛnrɛli nɔhalɛ yɛnrɛmaa Nyamenle. Ɔnrɛhyɛ Seetan bamaa menli mɔɔ bɛgyi ɔ nzi la ateta Nyamenle menli, ɔti bie a ɔbayɛ yɛ adwenleadwenle kɛ saa ɔba ye zɛhae a, duzu a yɛbayɛ a. Bie a yɛbabiza kɛ, ‘Asoo ɔle nvonleɛ kɛ mebadwenledwenle ninyɛne ɛhye mɔ anwo ɔ?’

5. Mɔɔ Gyisɛse hanle kɛ, “Bɛmmadwenledwenle” la, duzu a ɛnee ɔlɛkile a?

⁵ Yɛze kɛ Gyisɛse zele ye ɛdoavolɛma ne kɛ: “Bɛmmadwenledwenle.” (Mat. 6:25) Asoo ɛnee ɔlɛkile kɛ yɛmmadwenle debie biala anwo ɔ? Kyɛkyɛ! Kakye kɛ, adwenleadwenle dɔle Gyihova nɔhalɛ azonvolɛ bie mɔ anwo wɔ tete ne, noko Gyihova amkpo bɛ.b (1 Arl. 19:4; Edw. 6:3) Ɛnee Gyisɛse ɛlɛkyekye yɛ rɛle. Ɛnee ɔngulo kɛ ninyɛne mɔɔ yɛhyia nwo wɔ ɛbɛlabɔlɛ nu la anwo adwenleadwenle tɔ yɛ nwo na ɛzonlenlɛ mɔɔ yɛlɛfa yɛamaa Nyamenle la anwo ba edwɛkɛ. Ɔti, saa adwenleadwenle tɔ yɛ nwo a, duzu a yɛbahola yɛayɛ a?​—Nea ɛlɛka “Kɛzi Ɛbayɛ Ye La.”

NINYƐNE NSIA MƆƆ BABOA YƐ YEAMAA YƐAZIE YƐ NWO DII LA

6. Kɛ mɔɔ Felepaema 4:6, 7 kile la, duzu a bahola amaa yɛazie yɛ nwo dii a?

⁶ (1) Yɛ asɔne dahuu. Kilisienema mɔɔ ɛlɛyia ngyegyelɛ la bahola ayɛ asɔne azɛlɛ Gyihova moalɛ. (1 Pita 5:7) Ɔbabua wɔ asɔneyɛlɛ ne na yeamaa wɔanyia “Nyamenle anzodwolɛ ne mɔɔ bo [sonla] ndelebɛbo muala azo la.” (Kenga Felepaema 4:6, 7.) Gyihova balua ye sunsum nwuanzanwuanza ne azo yeamaa wɔanyia anzodwolɛ.​—Gal. 5:22.

7. Saa yɛlɛyɛ asɔne a, duzu a ɔwɔ kɛ yɛkakye a?

⁷ Saa ɛlɛyɛ asɔne a, ka kɛzi ɛte nganeɛ la kɔsɔɔti kile Gyihova. Ka ngyegyelɛ fɔɔnwo ne kile ye na maa ɔnwu kɛzi ɛte nganeɛ wɔ nwolɛ la. Saa nwolɛ sɔbelɛ bie wɔ ɛkɛ a, sɛlɛ ye maa ɔmaa wɔ nrɛlɛbɛ mɔɔ ɛbava wɔanwu ye nee anwosesebɛ mɔɔ ɛbava wɔali nwolɛ gyima la. Saa ɛnrɛhola ɛnrɛyɛ ngyegyelɛ ne anwo ɛhwee a, sɛlɛ Gyihova kɛ ɔboa wɔ amaa wɔandwenledwenle nwolɛ somaa. Saa ɛka ninyɛne fɔɔnwo bie mɔ anwo edwɛkɛ wɔ wɔ asɔneyɛlɛ nu na Gyihova bua a, ɛbanwu ye. Saa wɔannyia wɔ asɔneyɛlɛ ne anwo mualɛ ɛkɛ ne ala a, mmamaa ɛ sa nu to. Tɛ wɔ ngyegyelɛ fɔɔnwo ne ala a Gyihova kulo kɛ ɛka ɛkile ye a, emomu eza ɔkulo kɛ ɛkɔ zo ɛyɛ asɔne.​—Luku 11:8-10.

8. Ninyɛne boni mɔ a yɛbahola yɛayɛ nwolɛ asɔne a?

⁸ Saa ɛlɛfuandi wɔ adwenleadwenle wɔagua Gyihova anwo zo wɔ asɔneyɛlɛ nu a, bɔ mɔdenle kɛ eza ɛbayɛ ye mo. Saa yɛlɛyia ngyegyelɛ dɔɔnwo bɔbɔ a, ɔbayɛ kpalɛ kɛ yɛbadwenledwenle ninyɛne mgbalɛ mɔɔ yɛnyia ye la anwo. Saa ɔyɛ na ɛnnyia edwɛkɛ agbɔkɛ kpalɛ mɔɔ ɛbava wɔala kɛzi ɛte nganeɛ la ali bɔbɔ a, kakye kɛ Gyihova bua asɔneyɛlɛ sikalɛ mɔɔ le kɛ, ‘Mesɛlɛ wɔ boa me!’ la.​—2 Ek. 18:31; Wlo. 8:26.

9. Saa yɛ ahonle tu a, duzu a ɔwɔ kɛ yɛyɛ a?

⁹ (2) Fa ɛ nwo to Gyihova nrɛlɛbɛ ne azo na tɛ wɔ nrɛlɛbɛ zo. Wɔ ngapezonli Ayezaya mekɛ zo, ɛnee Dwudama sulo kɛ Aseleama barateta bɛ. Kɛmɔ ɛnee bɛ nye zo ɛda bɛ na bɛngulo kɛ Aseleama di bɛ nwo zo la ati, bɛzɛlɛle Yigyibitima mɔɔ ɛnzonle Gyihova la kɛ bɛraboa bɛ. (Aye. 30:1, 2) Gyihova bɔle bɛ kɔkɔ kɛ Yigyibitima mɔɔ bɛva bɛ nwo bɛdo bɛ nwo zo la ɛnrɛboa bɛ. (Aye. 30:7, 12, 13) Gyihova luale Ayezaya anwo zo ɔmaanle menli ne nwunle kɛzi bɛbanyia banebɔlɛ kpalɛ la. Ɔhanle kɛ: ‘Saa bɛsie bɛ nwo dii na bɛnyia anwodozo wɔ Gyihova anu a, bɛbanyia anwosesebɛ.’​—Aye. 30:15b.

10. Tɛnlabelɛ boni mɔ a yɛkɔ nu a ɔwɔ kɛ yɛkile kɛ yɛfa yɛ nwo yɛto Gyihova anwo zo a?

¹⁰ Mekɛ boni a ɔwɔ kɛ yɛfa yɛ nwo yɛto Gyihova anwo zo a? Neazo bie mɔ ɛne. Fa ye kɛ wɔnyia gyima bie mɔɔ bɛbadua wɔ kakɛ kpole noko ɔbalie wɔ mekɛ dɔɔnwo yɛɛ ɔbaha ɛzonlenlɛ mɔɔ ɛfa ɛmaa Gyihova la. Anzɛɛ fa ye kɛ awie mɔɔ ɛ nee ye yɛ gyima la ɛnyia ɛ nwo ɛhulolɛ, noko ɔnle Gyihova sonvolɛ mɔɔ bɛzɔne ye a. Anzɛɛ fa ye kɛ wɔ busuanli bie mɔɔ ɛkulo ye edwɛkɛ la se, “Me nee wɔ Nyamenle ne kpa ko” a, duzu a ɛbayɛ a? Wɔ edwɛkɛ ɛhye ko biala anu, bie a ɔbayɛ se kɛ ɛbazi kpɔkɛ kpalɛ, noko Gyihova bamaa wɔ nuhua ko biala anwo adehilelɛ mɔɔ ɛhyia nwo la. (Mat. 6:33; 10:37; 1 Kɔl. 7:39) Edwɛkɛ ne a le kɛ, Asoo ɛbalie adehilelɛ zɔhane wɔado nu na wɔava wɔali gyima?

11. Saa yɛyia dwazotia a, Baebolo ne anu edwɛkɛ boni mɔ a baboa yɛ yeamaa yɛazie yɛ nwo dii a?

¹¹ (3) Sukoa debie fi menli mɔɔ yɛle neazo kpalɛ nee menli mɔɔ bɛanyɛ neazo kpalɛ la ɛkɛ. Edwɛkɛ dɔɔnwo mɔɔ maa yɛnwu kɛzi ɔhyia kɛ yɛbazie yɛ nwo dii na yɛava yɛ nwo yɛado Gyihova anwo zo la wɔ Baebolo ne anu. Mekɛ mɔɔ ɛlɛsukoa edwɛkɛ ɛhye mɔ la, anrɛɛ yɛ mɔɔ boale Nyamenle azonvolɛ ɔmaanle bɛziele bɛ nwo dii wɔ mekɛ mɔɔ bɛyiale dwazotia mɔɔ anu yɛ se la nzonlɛ. Kɛ neazo la, mɔɔ Dwuuma kɔɔto kpole ne hanle kɛ ɛzoanvolɛ ne mɔ ɛgyakyi edwɛkɛhanlɛ ne la, bɛammaa bɛ ahonle andu. Emomu, bɛvale akɛnrasesebɛ bɛhanle kɛ: “Ɔwɔ kɛ yɛtie Nyamenle kɛ tumivolɛ na tɛ menli ɔ.” (Gyi. 5:29) Mɔɔ bɛbole ɛzoanvolɛ ne mɔ bɔbɔ la anzi, ɛzulolɛ anga bɛ. Duzu ati ɔ? Ɔluakɛ ɛnee bɛze kɛ Gyihova gyi bɛ nzi. Ɔ nye liele mɔɔ bɛyɛle la anwo. Ɔti bɛhɔle zo bɛbɔle edwɛkpa ne nolo. (Gyi. 5:40-42) Zɔhane ala a mɔɔ ɔka ekyi bɛku ɛdoavolɛ Sitivin la, ɔziele ɔ nwo dii na ɔ nyunlu yɛle kɛ “anwumabɔvolɛ nyunlu” a. (Gyi. 6:12-15) Duzu ati ɔ? Ɔluakɛ ɛnee ɔze ye wienyi kɛ ɔlɛ Gyihova anyunlu ɛlolɛ.

12. Kɛ mɔɔ 1 Pita 3:14 yɛɛ 4:14 kile la, saa bɛlɛkpɔ yɛ bɔbɔ a, duzu ati a yɛ nye bahola alie a?

¹² Ɛzoanvolɛ ne mɔ nwunle ye wienyi kɛ Gyihova gyi bɛ nzi. Ɔmaanle bɛ tumi mɔɔ ɛnee bɛfa bɛyɛ nwanwane ninyɛne. (Gyi. 5:12-16; 6:8) Noko ɔnyɛ ye zɔ ɛnɛ. Noko Gyihova ɛlua ye Edwɛkɛ ne azo ɛmaa yɛnwu ye kɛ, saa tenleneyɛlɛ ti yɛnwu amaneɛ bɔbɔ a, ɔdie yɛ ɔto nu yɛɛ ye sunsum ne wɔ yɛ nwo zo. (Kenga 1 Pita 3:14; 4:14.) Ɔti ɔnle kɛ yɛdwenledwenle mɔɔ saa yɛyia ɛkpɔlɛ kenle bie a, yɛbayɛ la anwo, emomu ɔwɔ kɛ yɛbɔ mɔdenle kɛ yɛbamaa Gyihova anu anwodozo mɔɔ yɛlɛ kɛ ɔbaboa yɛ na yealie yɛ la ayɛ kpole. Kɛ mɔɔ alimoa ɛdoavolɛ ne mɔ yɛle la, ɔwɔ kɛ yɛdie Gyisɛse ɛwɔkɛ ɛhye yɛdi: “Mebamaa bɛ nrɛlɛbɛ meamaa bɛanwu mɔɔ bɛbaha mɔɔ bɛ kpɔvolɛma ɛnrɛhola ɛnrɛha nwolɛ ɛhwee a.” Gyisɛse bɔle yɛ ɛwɔkɛ kɛ: “Saa bɛgyinla kpundii a, bɛbabɔ bɛ ngoane nwo bane.” (Luku 21:12-19) Eza mmamaa ɛ rɛle fi kɛ Gyihova kakye ye nɔhalɛ azonvolɛ mɔɔ bɛwu la anwo edwɛkɛ biala. Ɛhye ati ɔbadwazo bɛ.

13. Saa yɛsuzu bɛdabɛ mɔɔ bɛanzie bɛ nwo dii na eza bɛannyia Gyihova anu anwodozo la edwɛkɛ ne anwo a, kɛzi ɔbaboa yɛ ɛ?

¹³ Yɛbahola yɛazukoa debie yɛavi bɛdabɛ mɔɔ bɛanzie bɛ nwo dii na eza bɛannyia Gyihova anu anwodozo la anwubielɛ ne mɔ anu. Saa yɛsukoa neazo ɛtane ɛhye mɔ anwo debie a, ɔnrɛmaa yɛnrɛyɛ bɛ nvonleɛ ne bie. Kɛ neazo la, wɔ Dwuda Belemgbunli Esa tumililɛ ne mɔlebɛbo, sogyama dɔɔnwo bie rale ɔ nwo zo, noko ɔvale ɔ nwo ɔdole Gyihova anwo zo na Gyihova maanle ɔlile konim. (2 Ek. 14:9-12) Noko nzinlii, Yizilayɛ Belemgbunli Beeyahya nee ye sogyama ekyi vale konle radoale Esa, kɛ anrɛɛ ɔbava ɔ nwo yeado Gyihova anwo zo yeamaa yealie ye ngoane kɛ mɔɔ ɔlimoale ɔyɛle la, ɔhɔduale ezukoa ɔmaanle Selea sogyama kɛ bɛraboa ye. (2 Ek. 16:1-3) Mɔɔ ɔka ekyi ɔwu la, ɔ nwo dole ye kpole bie noko yeanva ɔ nwo yeando Gyihova anwo kɛ ɔboa ye.​—2 Ek. 16:12.

14. Duzu a yɛsukoa yɛfi Esa nvonleɛ ne anu a?

¹⁴ Mɔlebɛbo ne, Esa vale ɔ nwo dole Gyihova anwo zo wɔ mekɛ mɔɔ ɔlɛyia ngyegyelɛ la. Noko nzinlii, yeamkpondɛ moalɛ yeanvi ye Nyamenle ne ɛkɛ, emomu ɛnee ɔkulo kɛ ɔdaye mumua ne ɔdi ninyɛne nwo gyima. Ɛnea ye ɛkɛ ne ala a ɛbaha kɛ adwenle mɔɔ Esa nyianle hɔkpondɛle moalɛ vile Seleama ɛkɛ kɛ ɔko yeatia Yizilayɛma la yɛle gyima. Noko anzodwolɛ mɔɔ bɛnyianle la angyɛ. Gyihova luale ngapezonli bie anwo zo hanle hilele ye kɛ: “Kɛmɔ ɛvale ɛ nwo ɛdole Selea belemgbunli ne anwo zo na wɔanva ɛ nwo wɔando Gyihova wɔ Nyamenle ne anwo zo la ati, Selea belemgbunli ɛlɔnema ne ɛvi ɛ sa.” (2 Ek. 16:7) Ɔwɔ kɛ yɛnea boɛ na yɛanlie yɛ nwo yɛanli somaa kɛ yɛdayɛ mumua ne yɛbahola yɛali ninyɛne nwo gyima na yɛkpo kɛ yɛbakpondɛ adehilelɛ yɛavi Gyihova ɛkɛ wɔ ye Edwɛkɛ ne anu. Saa yɛyia tɛnlabelɛ bie mɔɔ ɔwɔ kɛ yɛdi nwolɛ gyima ndɛndɛ bɔbɔ la a, ɔwɔ kɛ yɛsie yɛ nwo dii na yɛfa yɛ nwo yɛto Gyihova anwo zo, na ɔbaboa yɛ yeamaa yɛali nwolɛ gyima kpalɛ.

15. Saa yɛlɛkenga Baebolo ne a, duzu a ɔwɔ kɛ yɛyɛ a?

¹⁵ (4) Kye Baebolo nu edwɛkɛ bie mɔ gua ɛ ti anu. Saa ɛnwu Baebolo nu edwɛkɛ bie mɔɔ maa ɛnwu kɛzi ɔhyia kɛ ɛsie ɛ nwo dii na ɛfa ɛ nwo ɛto Gyihova anwo zo la a, bɔ mɔdenle kɛ ɛbahye wɔagua ɛ ti anu. Bie a ɛbanwu ye kɛ saa ɛkenga ye kpole anzɛɛ ɛkɛlɛ na ɛsia ɛneɛnlea nuhua fane dɔɔnwo a ɔbaboa. Bɛhanle bɛhilele Dwɔhyua kɛ ɔgenga Mɛla buluku ne dahuu na ɔdwenledwenle nwolɛ amaa yeayɛ ye ninyɛne nrɛlɛbɛ nu. Eza mɔɔ ɔbagenga ye wɔ Mɛla buluku ne anu la ɛnrɛmaa ye ahonle ɛnrɛdu, emomu ɔbamaa yeanyia akɛnrasesebɛ yeali Nyamenle menli ne anyunlu. (Dwɔh. 1:8, 9) Edwɛkɛ dɔɔnwo wɔ Baebolo ne anu mɔɔ ɔbahola yeaboa yɛ yeamaa yɛazie yɛ nwo dii wɔ tɛnlabelɛ mɔɔ bie a anrɛɛ ɔbamaa adwenleadwenle adɔ yɛ nwo anzɛɛ yɛ ahonle adu la anu.​—Edw. 27:1-3; Mrɛ. 3:25, 26.

16. Kɛzi Gyihova dua asafo ne azo maa yɛsie yɛ nwo dii na yɛnyia ye nu anwodozo ɛ?

¹⁶ (5) Ɛ nee Nyamenle menli ɛdu. Gyihova dua yɛ mediema nwo zo ɔboa yɛ ɔmaa yɛsie yɛ nwo dii na yɛnyia ye nu anwodozo. Wɔ yɛ debiezukoalɛ ne mɔ abo, yɛnyia gyimalilɛ mɔɔ kɔ zo wɔ bama ne azo, mualɛ mɔɔ yɛ mediema maa yɛɛ adwelie mɔɔ yɛ nee bɛ di la azo nvasoɛ. (Hib. 10:24, 25) Saa yɛka debie mɔɔ ɛlɛgyegye yɛ la anwo edwɛkɛ yɛkile yɛ gɔnwo mɔ mɔɔ wɔ asafo ne anu mɔɔ yɛdie bɛ yɛdi la a, ɔmaa yɛ anwosesebɛ. Saa yɛ gɔnwo bie ka “edwɛkɛ kpalɛ” kile yɛ a, ɔkola ɔye yɛ adwenleadwenle ne ɔfi yɛ nwo zo.​—Mrɛ. 12:25.

17. Kɛ mɔɔ Hibuluma 6:19 kile la, kɛzi Belemgbunlililɛ anyelazo ne kola maa yɛ anwosesebɛ wɔ mekɛ mɔɔ yɛlɛyia tɛnlabelɛ mɔɔ anu yɛ se la ɛ?

¹⁷ (6) Sɔ wɔ anyelazo ne anu kpundii. Yɛ Belemgbunlililɛ anyelazo ne le kɛ “sɛkɛ maa yɛ ɛkɛla,” na saa yɛlɛyia tɛnlabelɛ mɔɔ anu yɛ se anzɛɛ ɔmaa adwenleadwenle tɔ yɛ nwo la a, ɔmaa yɛgyinla yɛ gyakɛ azo. (Kenga Hibuluma 6:19.) Dwenledwenle ɛwɔkɛ mɔɔ Gyihova ɛbɔ yɛ kɛ kenle bie adwenleadwenle bavi ɛkɛ la anwo. (Aye. 65:17) Pɛ ye nvoninli kɛ ɛwɔ ewiade fofolɛ mɔɔ anzodwolɛ wɔ nu mɔɔ debie biala ɛnle ɛkɛ mɔɔ bamaa adwenleadwenle adɔ ɛ nwo la anu. (Maeka 4:4) Saa ɛka ewiade fofolɛ ne anwo edwɛkɛ ɛkile awie mɔ noko a, ɔbamaa wɔ anyelazo ne anu amia. Yɛ biala mɔɔ ɛbahola la wɔ edwɛkɛhanlɛ nee ɛdoavolɛyɛlɛ gyima ne anu. Saa ɛyɛ zɔ a, ‘ɛbanyia anyelazo ne anu anwodozo bɔkɔɔ wɔahɔ awieleɛ.’​—Hib. 6:11.

18. Ngyegyelɛ boni a yɛbahola yɛayia kenle bie a, na duzu a yɛbahola yɛayɛ wɔ nwo a?

¹⁸ Kɛmɔ ewiade ɛhye ɛlɛkɔ ye awieleɛ la ati, yɛbahola yɛayia ngyegyelɛ dɔɔnwo mɔɔ bamaa adwenleadwenle adɔ yɛ nwo a. Yɛ 2021 ɛvolɛdwɛkɛ ne bahola aboa yɛ yeamaa yɛagyinla ngyegyelɛ ɛhye mɔ anloa na yɛazie yɛ nwo dii, tɛ yɛdayɛ yɛ anwosesebɛ a bamaa yɛahola yɛayɛ zɔ a, emomu saa yɛnyia Gyihova anu anwodozo a. Wɔ ɛvolɛ ɛhye anu, bɛmaa yɛva yɛ nyɛleɛ yɛhile kɛ yɛlɛ Gyihova ɛwɔkɛ ɛhye anu diedi: “Saa bɛsie bɛ nwo dii na bɛnyia anwodozo a, bɛbanyia anwosesebɛ.”​—Aye. 30:15