Bodane Boni Mɔ A Wɔva Wɔzie Ɛ Nye Zo Wɔ Ɛzonlenlɛ Ɛvolɛ Fofolɛ Ne Anu A?

Sunsum nu bodane a le debie biala mɔɔ yɛbɔ mɔdenle yɛdwu nwo amaa yɛahola yɛazonle Gyihova kpalɛ yɛamaa ɔ nye alie la. Kɛmɔ ɔboa yɛ ɔmaa yɛnyi wɔ nɔhalɛ ne anu la ati, ɔle adenle kpalɛ mɔɔ yɛdua zo yɛfa yɛ mekɛ nee yɛ anwosesebɛ yɛyɛ gyima a. (1Ti 4:15) Duzu ati a ɔwɔ kɛ yɛkɔ zo yɛneɛnlea yɛ sunsum nu bodane ngakyile ne mɔ anu a? Ɔluakɛ yɛ tɛnlabelɛ ne bahola ahakyi. Bie a yɛnrɛhola yɛnrɛdwu bodane bie mɔɔ yɛvale yɛziele yɛ nye zo la anwo anzɛɛ bie a yɛdwu nwo ɔti ɔwɔ kɛ yɛfa fofolɛ yɛsie yɛ nye zo.

Ɛzonlenlɛ ɛvolɛ fofolɛ mɔlebɛbo a le mekɛ kpalɛ mɔɔ ɔwɔ kɛ yɛfa yɛneɛnlea yɛ bodane nu a. Bɛzuzu edwɛkɛ ɛhye anwo wɔ bɛ abusua ɛzonlenlɛ bo na bɛnlea bodane mɔɔ bɛbahola bɛava bɛazie bɛ nye zo kɛ abusua nee mɔɔ bɛ nuhua ko biala bahola ava azie ɔ nye zo la.

Ngyehyɛleɛ boni a ɛbahola wɔayɛ amaa wɔadwu sunsum nu bodane ɛhye mɔ anwo na wɔanyia anyuhɔlɛ wɔ nu a?