Asoo Ɛlɛnyia Neɛnlea Ngɛlɛlera Ne Anu Dahuu Ne Azo Nvasoɛ?

Asoo alehyenlɛ ne anu tɛkese ne nee nuhua ngilenu ne mɔɔ ba wɔ Neɛnlea Ngɛlɛlera Ne Anu Dahuu anu mɔɔ ɛbazuzu nwo la boka wɔ ngyehyɛleɛ nwo ɔ? Saa ɔnle zɔ a, asoo ɛbahola wɔava wɔaboka wɔ ngyehyɛleɛ nwo ɔ? Menli dɔɔnwo suzu tɛkese ne anwo nwonlomɔ nu. Ɛhye maa bɛkola bɛdwenledwenle nuhua edwɛkɛ ne anwo wɔ mekɛ mɔɔ bɛlɛyɛ bɛ gyima wɔ kenle ne anu la. (Dwh 1:8; Ed 119:97) Kɛ ɔkɛyɛ na wɔanyia tɛkese ne azo nvasoɛ dɔɔnwo ɛ? Kenga Baebolo ne foa mɔɔ bɛyele alehyenlɛ ne anu tɛkese ne bɛvile la amuala amaa wɔade ɔ bo kpalɛ. Bɔ mɔdenle dwenledwenle Baebolo nu edwɛkɛ bie mɔɔ maa ɛte ngyinlazo mɔɔ wɔ tɛkese ne anu la abo la anwo. Akee fa ngyinlazo ne bɔ wɔ ɛbɛla. Saa Nyamenle Edwɛkɛ ne nyia tumi wɔ wɔ kpɔkɛzilɛ nu a, ɔbahile wɔ adenle na wɔanyia zolɛ nvasoɛ kpole.​—Ed 119:105.

Bɛtɛle abusua mɔɔ wɔ ewiade amuala la yɛ alehyenlɛ ne anu tɛkese ne wɔ bɛ nwonlomɔ aleɛlilɛ mekɛ ne anu. Kenlensa ye bɛfa gyimalilɛ ɛhye mɔ bɛgua JW Broadcasting^® azo. Ɛbanwu ye wɔ PROGRAMS AND EVENTS abo. Kenlenzu a ɛnleanle gyimalilɛ ɛhye mɔ bie a? Bie a ɛnee gyimalilɛ ɛhye mɔ bie bahola aboa wɔ kpalɛ. Kɛ neazo la, kɛzi Lɔɔto edwɛkɛ ne bahola aboa wɔ wɔ wɔ kpɔkɛzilɛ nu ɛ?

NEA BƐMMAKULO EWIADE (1DW 2:15) VIDIO NE NA BUA KPUYA ƐHYE MƆ:

• Baebolo ngyinlazo boni a ɛnee alehyenlɛ ne anu tɛkese ne gyi zolɛ a?

• Kɛzi Lɔɔto edwɛkɛ ne maa yɛnwu kɛ esiane wɔ nu kɛ yɛbahulo ewiade ne anzɛɛ ninyɛne mɔɔ wɔ nu la ɛ?​—Gyn 13:12; 14:12; 19:3, 12, 13, 24-26

• Kɛzi yɛbahile kɛ yɛkulo Gyihova na tɛ ewiade ne anzɛɛ ninyɛne mɔɔ wɔ nu la ɛ?