Fa Ngapezoma Ne Yɛ Neazo—Habakɛke
1. Kɛzi yɛ edwɛkɛ ne nee ngapezonli Habakɛke ɛdeɛ ne le ko ɛ?
1 Kɛmɔ ninyɛndane ɛlɛkɔ ɔ nyunlu wɔ ewiade ye anu la ati, bie a yɛbade nganeɛ kɛ Habakɛke, mɔɔ bizale Gyihova kɛ: “Duzu ati a ɛmaa me nye nwu nvonleɛ nee ngyegyelɛ ɛ? Na duzu ati a ɛmaa nzisi nwo adenle a?” (Hab. 1:3, NW; 2 Tem. 3:1, 13) Saa yɛdwenle Habakɛke edwɛkɛ ne nee ye diedi nwo neazo ne anwo a, ɔbahola yeaboa yɛ wɔ mekɛ mɔɔ yɛlɛkendɛ Gyihova ndɛnebualɛ kenle ne la.—2 Pita 3:7.
2. Kɛzi yɛbahile kɛ yɛlɛ diedi ɛnɛ ɛ?
2 Dua Diedi Zo: Kɛ anrɛɛ Habakɛke bamaa ninyɛndane agyegye ye la, ɔhɔle zo ɔmaanle ɔ nye lale ɛkɛ wɔ sunsum nu na ɔyɛle gyima. (Hab. 2:1) Gyihova zele ngapezonli ne kɛ Ye edwɛkɛ ne bara nu wɔ ye mekɛ nloa na “tenlenenli ne balua ye diedi zo anyia ngoane.” (Hab. 2:2-4) Duzu a ɛhye kile maa Kilisienema mɔɔ wɔ awieleɛ mekɛ ne anu la ɛ? Mɔɔ hyia kpalɛ la a le kɛ yɛbanyia anwodozo kɛ awieleɛ ne bara tɛla kɛ yɛbanwu mekɛ mɔɔ ɔbara la. Diedi ka yɛ maa yɛsinza na yɛyɛ ɛzonlenlɛ gyima ne.—Hib. 10:38, 39.
3. Duzu ati a ɔwɔ kɛ yɛkɔ zo yɛfa fɛlɛkolilɛ yɛsonle Gyihova ɛ?
3 Di Fɛlɛko Wɔ Gyihova Anu: Bɛbazɔ yɛ diedi bɛanlea wɔ mekɛ mɔɔ Gɔɔgo mɔɔ vi Meegɔɔgo bateta Gyihova menli la. (Yiz. 38:2, 10-12) Konle fa anwongyelelɛ ba bɛdabɛ mɔɔ bɛdi konim bɔbɔ la anwo zo. Bie a aleɛ nwo bahyia, agyadeɛ bahola aminli yɛɛ ezukoa nwo bayɛ se. Saa yɛkɔ tɛnlabelɛ zɛhae anu a, duzu a yɛbayɛ a? Ɛnee Habakɛke anye la ngyegyelɛ ɛhye mɔ ade, yemɔti ɔzile kpɔkɛ kɛ ɔbahɔ zo yeava fɛlɛkolilɛ yeazonle Gyihova. (Hab. 3:16-19) Eza “fɛlɛkolilɛ ne mɔɔ [Gyihova] fa maa la” baboa yɛ yeamaa yɛagyinla kenle bie sɔnea nloa.—Nih. 8:10; Hib. 12:2.
4. Anyelielɛ boni a yɛbahola yɛanyia ye ɛnɛ nee kenle bie a?
4 Bɛbahɔ zo bɛahilehile menli mɔɔ Gyihova balie bɛ ngoane wɔ ye ndɛnebualɛ kenle ne mɔɔ ɛlɛba la Nyamenle ndenle ne mɔ. (Hab. 2:14) Menli mɔɔ bɛbadwazo bɛ la noko bazukoa Gyihova anwo debie. Kɛkala bɔbɔ, ɔrɛla ye kɛ yɛbava nwolɛ adenle biala yɛaha Gyihova nee ye nwanwane gyima ne mɔ anwo edwɛkɛ!—Edw. 34:1; 71:17.