Kɛzi Yɛbamaa Yɛ Ngilehilelɛ Aha Menli Ahonle La
1. Kɛzi Gyisɛse ngilehilelɛ ne hanle ye tievolɛma ahonle ɛ?
1 Gyisɛse Kelaese maanle ye ngilehilelɛ hanle ye tievolɛma ahonle. Yeanyɛ boɛ fee la, kenle ko bie mɔɔ ɔhilehilele Ngɛlɛlera ne anu wienyi ɔhilele ye ɛdoavolɛ ne mɔ la, ɔyɛle kɛ asɛɛ “bɛwuda senle” wɔ bɛ ahonle nu la. (Luku 24:32) Kɛmɔ ɔwɔ kɛ yɛfi yɛ ahonle nu yɛtie Nyamenle la ati, kɛ ɔkɛyɛ na yɛ edwɛkɛ ne aha menli mɔɔ yɛkilehile bɛ la ahonle yeamaa bɛayɛ nzenzaleɛ wɔ bɛ ɛbɛlabɔlɛ nu ɛ?—Wlo. 6:17.
2. Kɛzi nrɛlɛbɛ adenle mɔɔ yɛbalua zo nee nwunu maa yɛ edwɛkɛ ka awie ahonle ɛ?
2 Dua Nrɛlɛbɛ Adenle Zo Na Fa Nwunu Di Gyima: Wɔ menli dɔɔnwo afoa nu, saa ɛka mɔɔ le kpalɛ nee mɔɔ le ɛtane la ɛkile bɛ ala a, ɔnrɛha bɛ ahonle. Nɔhalɛ nu, saa ɛfa ngɛlɛlera dɔɔnwo ɛbɔ bɛ diedi ne ɛgua bɔbɔ a, ɔnrɛmaa bɛnrɛpili wɔ. Saa yɛboa awie a, ɔwɔ kɛ yɛdimoa yɛnwu deɛmɔti ɔdie debie bie ɔdi na ɔyɛ ye nyɛleɛ zɔhane la. Saa yɛdua nrɛlɛbɛ adenle zo yɛbiza ye kpuya kpalɛ mɔɔ maa bɛdwenle la a, ɔbamaa yeavi ye ahonle nu yeadendɛ. (Mrɛ. 20:5) Yemɔ bamaa yɛanwu Baebolo ne anu edwɛkɛ mɔɔ yɛka a ɔbaha ye ahonle la. Ɛhye ati, ɔwɔ kɛ yɛmaa yɛ nye die ɔ nwo na yɛsi abotane. (Mrɛ. 25:15) Kakye kɛ asolo kɛzi sonla ko biala nyia sunsum nu anyuhɔlɛ a. Nyia abotane maa Gyihova sunsum nwuanzanwuanza ne ɛyɛ gyima wɔ bɛ adwenle nee bɛ nyɛleɛ nu.—Maake 4:26-29.
3. Kɛ ɔkɛyɛ na yɛaboa menli mɔɔ yɛkilehile bɛ la yɛamaa bɛanyia subane kpalɛ ɛ?
3 Boa Bɛ Maa Bɛnyia Subane Kpalɛ: Baebolo nu edwɛkɛ mɔɔ ka Gyihova kpalɛyɛlɛ nee ye ɛlɔlɛ nwo edwɛkɛ la bahola aboa menli mɔɔ yɛkilehile bɛ la yeamaa bɛanyia subane kpalɛ. Yɛbahola yɛava ngɛlɛlera le kɛ Edwɛndolɛ 139:1-4 anzɛɛ Luku 12:6, 7 yɛali gyima yɛamaa bɛanwu kɛzi Nyamenle anye die yɛ nuhua ko biala anwo la. Saa bɛkile Gyihova ɛlolɛ ne anwo anyezɔlɛ a, bɛbanyia ɛlɔlɛ kpole na bɛazonle Nyamenle kpalɛ. (Wlo. 5:6-8; 1 Dwɔn 4:19) Eza saa bɛnwu ye kɛ bɛ nyɛleɛ ka Gyihova mumua ne a, bie a ɔbaboa bɛ yeamaa bɛabɔ bɛ ɛbɛla wɔ adenle mɔɔ sɔ ɔ nye na ɔwula ye anyunlunyia la azo.—Edw. 78:40, 41; Mrɛ. 23:15.
4. Saa yɛlɛkilehile awie mɔ wɔ daselɛlilɛ nu a, kɛ ɔkɛyɛ na yɛahile ɛbulɛ yɛamaa nwolɛ adenle mɔɔ bɛlɛ bɛsi bɛ ti anwo kpɔkɛ la ɛ?
4 Gyihova ɛntinlitinli awie biala kɛ ɔli ye mɛla ne mɔ azo. Emomu, ɔboa bɛ ɔmaa bɛnwu nrɛlɛbɛ mɔɔ wɔ nu kɛ bɛbali ye folɛdulɛ zo la. (Aye. 48:17, 18) Saa yɛkilehile awie mɔ yɛmaa bɛsi bɛ ti anwo kpɔkɛ a, ɛnee yɛlɛsukoa Gyihova. Saa bɛdabɛ mumua ne bɛnwu ye wienyi kɛ ɔwɔ kɛ bɛyɛ nzenzaleɛ wɔ bɛ ɛbɛlabɔlɛ nu na bɛyɛ ye zɔ a, ɔboa kpalɛ. (Wlo. 12:2) Eza ɔmaa bɛbikye Gyihova mɔɔ “sɔ ahonle kɔsɔɔti nea” la.—Mrɛ. 17:3.