Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Tete Baebolo Sukoavoma Maa Bɛzukoa Debie

Deɛmɔti Ɔhyia La: Amaa Baebolo sukoavoma anyia sunsum nu anyuhɔlɛ la, ɔwɔ kɛ bɛfa Nyamenle Edwɛkɛ ne anu ninyɛne mɔɔ anu pi la bɛsie bɛ adwenle nee bɛ ahonle nu. (Hib. 5:12–6:1) Ɛzukoalɛ hyia mɔdenlebɔlɛ. Bie a le kɛ bɛbava ninyɛne fofolɛ mɔɔ bɛlɛsukoa la bɛatoto mɔɔ bɛze ye dɛba la anwo na bɛanwu nvasoɛ mɔɔ wɔ zo la. (Mrɛ. 2:1-6) Saa bɛsukoa kɛzi bɛyɛ bɛ ti anwo neɛnleanu la a, ɔbamaa bɛava yɛ mbuluku ne mɔ bɛabua Baebolo nwo kpuya. Saa bɛbɔ mɔdenle bɛfa mɔɔ bɛlɛsukoa la bɛdi gyima a, ɔbaboa bɛ yeamaa bɛagyinla sɔnea mɔɔ bɛbayia kɛ Kilisienema la anloa.—Luku 6:47, 48.

Kɛzi Bɛyɛ Ye La:

Maa ɔnwu ye kɛ, kolaa na bɛazukoa debie biala la, ɔwɔ kɛ bɛsɛlɛ Gyihova moalɛ.—Dwɔn 14:26; 1 Kɔl. 2:10.
Wɔ mɔlebɛbo ne ala, maa sukoavo ne anwosesebɛ kɛ anrɛɛ ɔzukoa ye buluku ne kolaa na wɔara. Fa wɔ buluku ɛdeɛ ne kile ye, na kile ye kɛzi ɔwɔ kɛ ɔpepɛ edwɛkɛ nee ɛdendɛmunli titili mɔɔ wɔ nu abo la.
Maa wɔ sukoavo ne ɛva ɔdaye mumua ne ye edwɛkɛ ɛmaa mualɛ. Mmamaa debiezukoalɛ ne yɛ kpuya nee mualɛ ala, mɔɔ sukoavo ne kenga mualɛ ne fɔɔnwo fi buluku ne anu a.
Maa wɔ sukoavo ne anwosesebɛ kɛ ɔgenga Nyamenle Edwɛkɛ ne foa bie dahuu. Fa Baebolo ɛgengalɛ nwo ngyehyɛleɛ mɔɔ wɔ jw.org ne azo mɔɔ ɔkile kɛzi ɔbahola yeayɛ ɛhye la kile ye. Saa ɛbahola wɔagenga Baebolo ne dahuu a ɔhyia mɔdenlebɔlɛ kpalɛ, noko ɛbanyia zolɛ nvasoɛ.—Edw. 1:2, 3.
Kile wɔ sukoavo ne kɛzi ɔbalua Watchtower Library anzɛɛ Ɛzinzalɛ Arane YINTANƐTE ZO MBULUKUZIELƐLEKA ne azo yeabua Baebolo nwo kpuya la. Boa ye maa ɔnwu yɛ mbuluku mɔɔ yɛfa yɛkɔ debiezukoalɛ la aluma ne mɔɔ bɛpepɛ bɛ sikalɛ la.

Sɔ Ɛhye Nea Wɔ Siane Ɛhye Anu:

Saa bɛsukoa tile ekyi ko anzɛɛ tile biala bɛwie a, maa wɔ Baebolo sukoavo ne ɛpɛ mɔɔ bɛzukoale le sikalɛ. Saa ɛnlɛ Baebolo sukoavo a, sukoa kɛ ɛbapɛ Baebolo ne anzɛɛ Ɛzinzalɛ Arane ne anu edwɛkɛ bie sikalɛ amaa yeaboa wɔ yeamaa wɔade mɔɔ ɛbagenga la abo kpalɛ.