Sukoa Bɛ Diedi

1. Buluku boni a yɛbazukoa wɔ Asafo Baebolo Ɛzukoalɛ bo wɔ October 19 dapɛne ne anu a?

¹ Yɛbabɔ ɔ bo yɛazukoa Sukoa Bɛ Diedi buluku ne wɔ Asafo Baebolo Ɛzukoalɛ bo wɔ October 19, 2015, dapɛne ne anu. Buluku ɛhye ka Baebolo ne anu mrenyia nee mraalɛ 14 mɔɔ ɛnee bɛlɛ diedi la anwo edwɛkɛ. Ɔka bɛ nwo edwɛkɛ ɔmaa ɔyɛ kɛ asɛɛ yɛ adwenle nu a, yɛ nee bɛ a de a, na ɔboa yɛ ɔmaa yɛnwu kɛ bɛle menli mɔɔ bɛdɛnlanle aze na bɛyiale ngyegyelɛ wɔ mekɛ mɔɔ bɛlɛsonle Gyihova la. Eza buluku ne maa yɛnwu ɛzukoalɛdeɛ mɔɔ wɔ zɔhane edwɛkɛ ne mɔ anu la na ɔboa yɛ ɔmaa yɛfa yɛdi gyima wɔ yɛ ɛbɛlabɔlɛ nu ɛnɛ.—Hib. 6:12.

2. Kɛzi bɛyɛ Sukoa Bɛ Diedi buluku ne ɛ?

² Kɛzi Bɛyɛ Buluku Ne La: Mekɛ mɔɔ menli ne dɛnlanle aze nee nwolɛ azɛkɛlata wɔ buluku ne anu mɔɔ baboa yɛ yeamaa yɛanwu ɛleka mɔɔ ko biala dɛnlanle a. Eza edwɛkɛ, “Dwenle Ɛhye Anwo . . . ,” wɔ tile biala awieleɛ mɔɔ baboa yɛ yeamaa yɛadwenle edwɛkɛ ne anwo na yɛava ɛzukoalɛdeɛ mɔɔ wɔ nu la yɛali gyima a. Nvoninli ngɛnlɛma mɔɔ nuhua la ɛkɛ mɔɔ bamaa yɛade edwɛkɛ ne abo kpalɛ la wɔ buluku ɛhye anu.

3. Nzɔne a yɛbahola yɛayɛ amaa buluku ɛhye mɔɔ yɛbazukoa la aboa yɛ a?

³ Kɛzi Ɔbaboa Wɔ La: Neazo Eku ne kɛlata ne mɔɔ bɔ buluku ne abo la ka kɛ: “Fa wɔ adwenle bu edwɛkɛ ne; maa ɔyɛ kɛ ɛwɔ ɛkɛ ne bie la. Bɔ mɔdenle kɛ ɛbade nganeɛ kɛ Baebolo nu menli ne, na wɔanwu mɔɔ bɛnwunle ye la. Fa kɛzi bɛyɛle bɛ nyɛleɛ wɔ gyinlabelɛ bie mɔ anu la to mɔɔ ɛdawɔ a anrɛɛ ɛbayɛ la anwo.” Nɔhalɛ nu, ɛhye ɛngile kɛ ɛfa wɔ adwenle wɔabu debie ɛzulolɛ bie, emomu ɛpɛ kɛlɛtokɛ ne anwo nvoninli wɔ wɔ adwenle nu na wɔade menli mɔɔ wɔ nu la nganeɛdelɛ bo. Ɔwɔ kɛ yɛnyia mekɛ yɛdwenledwenle nwo na yɛahola yɛayɛ ɛhye. (Nih. 8:8) Saa bɛsukoa tile bie bɛdwu avinli na bɛlɛtoa zo mekɛ fofolɛ a, ahenle mɔɔ ɔbanlea zo la bava kɛkɛ kɛyɛ 30 mɔɔ kɔdwu 60 la adi foa ne mɔɔ bɛzukoale la anu. Saa bɛsukoa tile bie bɛwie na “Dwenle Ɛhye Anwo . . . ” ne bie ɛnle nu a, neazovolɛ ne bahola abiza kpuya ko anzɛɛ nwiɔ adi debiezukoalɛ ne anu.

4. Nzɔne ati a ɔwɔ kɛ yɛsukoa Sukoa Bɛ Diedi buluku ne a?

⁴ Yɛde ewiade bie mɔɔ dahuu ɔbɔ mɔdenle kɛ ɔmaa yɛ diedi azɛkye anzɛɛ aha aze wɔ adenle biala azo la anu. Buluku ɛhye nee edwɛkɛ ne bie mɔ mɔɔ toɔdoa zo ba Ɛzinzalɛ Arane ne anu mɔɔ bɛgyinla zo bɛyɛ buluku ɛhye la le ahyɛlɛdeɛ mɔɔ vi Gyihova ɛkɛ mɔɔ baboa yɛ yeamaa yɛ diedi nu amia a. (Gye. 1:17) Bɛmaa yɛhɔ Asafo Baebolo Ɛzukoalɛ dahuu, na yɛmaa muala dodo biala mɔɔ yɛbahola la amaa yɛanyia ɔ muala azo nvasoɛ kpalɛ!