Boa Anyenzinliravolɛma Maa Bɛzukoa Gyihova Anwo Debie
1. Kɛzi Gyisɛse lale ye ali kɛ ɔse anyenzinliravolɛma anwunvɔne ɛ?
1 Ɛnee ɔka ekyi na Gyisɛse awu. Mekɛ mɔɔ ɔlɛfi suakpole Gyɛleko azo la, anyenzinliravolɛma nwiɔ deanle nu kɛ: Awulae “nwu yɛ anwunvɔne!” Ɔwɔ nuhua kɛ ɛnee Gyisɛse ɛlɛdwenle sɔnea mɔɔ ɔlɛkɔ yeayia ye la anwo ɛsesebɛ ɛdeɛ, noko ɔgyinlanle, ɔvɛlɛle bɛ na ɔyɛle bɛ ayile. (Mat. 20:29-34) Kɛ ɔkɛyɛ na yɛazukoa kɛzi Gyisɛse nwunle anyezinliravolɛma ne anwunvɔne la ɛ?
2. Saa yɛyia anyenzinliravolɛ a, kɛ ɔkɛyɛ na yɛali ye daselɛ ɛ?
2 Boa Bɛ: Saa ɛyia anyezinliravolɛ wɔ bagua nu a, da ɛ nwo ali kile ye na ka kɛ ɛkulo kɛ ɛboa ye. Kɛmɔ bɛta bɛsisi menli ɛhye mɔ la ati, bie a mekɛ mɔɔ limoa la ɔnrɛlie wɔ ɔnrɛli. Noko bie a ɛyɛ agɔnwolɛ kpalɛ na ɛkile ɔ nwo anyelielɛ a, ɔbamaa ye ahonle adɔ ye azule nu. Eza kakye noko kɛ anyenzilira gua ye ngakyile na ɛhye bahile moalɛ holɛ ko mɔɔ ɔwɔ kɛ ɛfa ɛmaa biala la. Saa ɛboa ye ɛwie a, bie a ɛbahola wɔaha kɛ yɛ nee menli sukoa Baebolo ne. Ka kile ye kɛ ɛkpondɛ kɛ ɛkenga ngɛlɛlera le kɛ Edwɛndolɛ 146:8 anzɛɛ Ayezaya 35:5, 6 ɛkile ye. Saa ɔkola ɔkenga anyenzinlirama buluku (Braille) a, biza ye saa ɛva bie ɛrɛlɛ ye amaa yeazukoa Baebolo ne anwo ninyɛne dɔɔnwo a. Eza ɛbahola wɔaboa ye wɔamaa yeanyia ninyɛne mɔɔ bɛbɔ bɛtie la yeavi jw.org ne azo. Saa ɔlɛ kɔmpita mɔɔ kɔmpita mumua ne kola kenga debie biala mɔɔ bara zo la na ɛtwe yɛ mbuluku ne bie ɛgua zo ɛmaa ye a, ɔ nye balie nwo kpalɛ.—Nea ɛlɛka “Saa Ɛlɛboa Anyenzinliravolɛ A . . .”
3. Kɛ ɔkɛyɛ na yɛanwu anyenzinlirama mɔɔ bɛwɔ yɛ azɛlɛsinli ne anu la ɛ?
3 Kpondɛ Bɛ: Yɛnda yɛnyia anyenzinlirama wɔ azua nu daselɛlilɛ gyima ne anu ɔluakɛ bɛ nuhua dɔɔnwo anye ɛnlie nwolɛ kɛ bɛbamaa nyɛvolɛ ara bɛ ɛkɛ. Ɛhye ati ɔwɔ kɛ yɛbɔ mɔdenle kpalɛ ‘yɛbiza yɛnwu’ menli ɛhye mɔ na yɛdi bɛ daselɛ. (Mat. 10:11) Ɛlɛ ɛ gɔnwo mɔɔ ɛ nee ye yɛ gyima anzɛɛ ɛ nee ye kɔ sukulu mɔɔ ɔ nye ɛzi ɔ? Bɔ mɔdenle ɛ nee ye ɛdendɛ. Saa bɛlɛ anyenzinlirama sukulu wɔ bɛ azɛlɛsinli ne anu a, fa yɛ anyenzinlirama mbuluku ne bie kɔ bɛ mbulukuzielɛleka ne. Ɛze awie mɔɔ ɔlɛ anyenzinliravolɛ wɔ ye abusua ne anu ɔ? Bɛlɛ ahyehyɛdeɛ bie wɔ bɛ azɛlɛsinli ne anu mɔɔ bɛboa anyenzinlirama anzɛɛ bɛlɛ ɛleka mɔɔ anyenzinlirama de ɔ? Kilehile nuhua kile busuanli ne, ahenle mɔɔ die nyɛvolɛ wɔ anyenzinlirama ne ɛkɛ anzɛɛ ahenle mɔɔ gyi ahyehyɛdeɛ ne ati la kɛ Gyihova Alasevolɛ kulo kɛ bɛboa anyenzinlirama na fa bɛ mbuluku anzɛɛ ninyɛne mɔɔ bɛbɔ bɛtie la bie maa ye. Kenga Baebolo ne anu ɛwɔkɛ ne mɔɔ kile kɛ Nyamenle baye anyenzinlira avi ɛkɛ bɔkɔɔ kenlensa ye ala la kile ye. Eza ɛbahola wɔaye jw.org ne azo video ne mɔɔ ɔ ti ne se “Without It, I Would Feel Lost,” mɔɔ ka nrenyia anyenzinliravolɛ bie mɔɔ anyenzinlirama Baebolo ne mɔɔ bɛyɛ la ɛboa ye la anwubielɛ ne wɔahile ye. Saa ɛkilehile deɛmɔti wɔra ɛkɛ la anu ɛkile ye a, bie a ɔbabuke nwolɛ adenle yeamaa wɔali anyenzinlirama mɔɔ bɛwɔ ɛkɛ la daselɛ.
4. Nzɔne a yɛsukoa yɛfi Janet anwubielɛ ne anu a?
4 Adiema raalɛ Janet mɔɔ ɔ nye ɛzi la hɔle ɛleka bie mɔɔ anyenzinlirama a de ɛkɛ la. Ɔ nee bɛlɛra bie lile adwelie. Janet hanle hilele ye kɛ, “Gyisɛse yɛle anyenzinlirama ayile ɔvale ɔhilele mɔɔ ɔbayɛ yeamaa anyenzinlirama kɔsɔɔti la.” Bɛzuzule Yekile 21:3, 4 anwo. Janet hilehilele kɛzi Nyamenle Belemgbunlililɛ ne bamaa ɛhye ara nu la anu. Bɛlɛra ne yɛle koonwu na akee ɔhanle kɛ: “Metɛtele ye ɛlɛ kɛ anyenzinliravolɛ ɛlɛka edwɛkɛ ɛhye bie. Menli dɔɔnwo mɔɔ bɛnwu debie la die di kɛ menli nye si ɔlua ninyɛne bie mɔ mɔɔ bɛdabɛ anzɛɛ bɛ nla mɔ yɛle la ati.” Janet luale Intanɛte ne azo ɔhilele bɛlɛra ne ɛleka mɔɔ ɔbanwu Baebolo ne Kilehile buluku ne la. Kɛkala, bɛsukoa Baebolo ne fane nwiɔ dapɛne biala.
5. Yɛnrɛhola yɛnrɛyɛ anyenzinlirama ayile kɛ Gyisɛse la, noko saa yɛmaa yɛ nye die bɛ nwo a, nyilalɛ boni a yɛbanyia a?
5 Nɔhalɛ nu, yɛnrɛhola yɛnrɛyɛ anyenzinlirama ayile kɛ Gyisɛse la, noko yɛbahola yɛaboa menli mɔɔ ɛtane ewiade ɛhye nyamenle ne ɛzi bɛ adwenle ne anye mɔɔ anyenzinlirama kpalɛ boka nwo la yɛamaa bɛade nɔhalɛ mɔɔ wɔ Nyamenle Edwɛkɛ ne anu la abo. (2 Kɔl. 4:4) Gyisɛse yɛle anyenzinlirama nwiɔ ne ayile wɔ Gyɛleko afoa nu ɔluakɛ ‘ɔnwunle bɛ anwunvɔne.’ (Mat. 20:34) Saa yɛmaa yɛ nye die anyenzinlirama anwo a, yɛbahola yɛaboa bie mɔ yɛamaa bɛazukoa Gyihova mɔɔ baye anyenzinlira avi ɛkɛ ne bɔkɔɔ la anwo debie.