Kɛzi Gyihova Nwu Me Ɛ?
1. Kɛzi Baebolo ne le kɛ neanleɛ ɛ?
1 Fane nyɛ a ɛnea neanleɛ nu a? Yɛ nuhua dɔɔnwo nea nu dahuu ɔluakɛ ɛhye boa yɛ maa yɛnwu yɛ sonlabaka ne ɛleka mɔɔ hyia kɛ yɛsiezie ye boɛ la. Bɛva Baebolo ne bɛtoto neanleɛ nwo. Nyamenle Edwɛkɛ ne mɔɔ yɛkenga la boa yɛ maa yɛnwu kɛzi yɛdayɛ mumua ne yɛde la, mɔɔ Gyihova nwu ye la. (1 Sam. 16:7; Gye. 1:22-24) Nyamenle Edwɛkɛ ne kola ‘nwu adwenle nee ahonle nu nzuzulɛ.’ (Hib. 4:12) Kɛzi Baebolo ne mɔɔ yɛbagenga na yɛadwenledwenle nwolɛ dahuu la baboa yɛ yeamaa yɛanwu mɔɔ ɔwɔ kɛ yɛyɛ amaa yɛayɛ edwɛkpakavolɛma kpalɛ ɛ?—Edw. 1:1-3.
2. Kɛzi Baebolo ne bahola aboa yɛ yeamaa yɛanleɛnlea yɛ nu ɛ?
2 Fa Baebolo Ne Di Gyima Kɛ Neanleɛ: Gyihova azonvolɛ mɔɔ bɛdi nɔhalɛ la anwo edwɛkɛ mɔɔ wɔ Baebolo ne anu la maa yɛnwu subane mɔɔ ɔ nye die nwo la. Kɛ neazo la, Devidi hilele kɛ Nyamenle duma ne hyia ye kpalɛ. (1 Sam. 17:45, 46) Ayezaya vale akɛnrasesebɛ dule ɔ nwo manle hanle edwɛkɛ ne wɔ azɛlɛsinli mɔɔ nuhua menli le anyetele la anu. (Aye. 6:8, 9) Ɛlɔlɛ kpole mɔɔ ɛnee Gyisɛse lɛ maa ye anwuma Selɛ ne la manle ɔnwunle ɛzonlenlɛ gyima ne kɛ ɔmaa ɔ nwo tɔ ye na ɔ kunlu dwo ɔ nwo, na ɔnle adesoa. (Dwɔn 4:34) Ɛvoya mɔɔ lumua la anu Keleseɛnema bɔle mɔdenle hanle edwɛkɛ ne, bɛvale bɛ nwo bɛdole Gyihova anwo zo na bɛzile kpɔkɛ kɛ bɛnrɛgyakyi ye ɛlɛ. (Gyi. 5:41, 42; 2 Kɔl. 4:1; 2 Tem. 4:17) Yɛdwenledwenle neazo ɛhye mɔ anwo a ɔbaboa yɛ yeamaa yɛanleɛnlea yɛ nu na yɛazi kpɔkɛ kɛ yɛbanyia anyuhɔlɛ wɔ yɛ ɛzonlenlɛ nwuanzanwuanza ne anu.
3. Duzu ati a ɔnle kɛ yɛtu nzenzaleɛ mɔɔ hyia mɔɔ ɔwɔ kɛ yɛyɛ la yɛsie ɛ?
3 Di Sinlidɔlɛ Ne Mɔ Anwo Gyima: Nɔhalɛ nu, saa yɛnea neanleɛ nu na yɛnwu nvonleɛ bie wɔ yɛ nwo na yɛanyɛ nwolɛ ɛhwee a, ɔmboa yɛ. Yɛbahola yɛazɛlɛ Gyihova kɛ ɔboa yɛ ɔmaa yɛva adwenle mɔɔ anu la ɛkɛ la yɛnleɛnlea yɛ nu na ɔboa yɛ ɔmaa yɛyɛ nzenzaleɛ biala mɔɔ hyia la. (Edw. 139:23, 24; Luku 11:13) Ɔluakɛ mekɛ mɔɔ ɛha la le ekyi na awie mɔ ngoane la esiane nu la ati, ɔnle kɛ yɛtu nzenzaleɛ mɔɔ ɔhyia kɛ yɛyɛ la yɛsie.—1 Kɔl. 7:29; 1 Tem. 4:16.
4. Duzu a to sonla ne mɔɔ neɛnlea Nyamenle Edwɛkɛ ne anu na ɔfa ɔdi gyima la ɛ?
4 Kɛzi awie de amgba—debie mɔɔ Gyihova nwu ye la—hyia kpole tɛla mɔɔ menli nwu ye la. (1 Pita 3:3, 4) Duzu a to sonla ne mɔɔ neɛnlea Nyamenle Edwɛkɛ ne anu na ɔfa mɔɔ yenwu ye la ɔdi gyima la ɛ? “Ɔndie ye mgbane ala ɔmmaa ɔ rɛle ɛnvi, na ɔyɛ gyima mɔɔ ɔwɔ kɛ ɔyɛ la, yemɔ yɛɛ Nyamenle kɛyila ye wɔ ye ɛbɛlabɔlɛ nu a.” (Gye. 1:25) Amgba, yɛ nye balie na yɛayɛ azonvolɛ mɔɔ bɔ mɔdenle ɔluakɛ “yɛda Gyihova anyunlunyia ali kɛ neanleɛ la.”—2 Kɔl. 3:18, NW.