Kpuyia Ɛleka

◼ Duzu a ɔwɔ kɛ ngakula sukoa na bɛanyi sunsum nu a?

Keleseɛne awovolɛ bɔ mɔdenle ‘tete bɛ mra kɛmɔ Gyihova kpondɛ la.’ (Ɛfɛ. 6:4) Kɛ neazo la, awovolɛ nwu kɛ saa bɛ nee bɛ mra suzu alehyenlɛ ne anu tɛkese ne anwo nwonlomɔ biala a ɔboa. Wɔ abusua ɛzonlenlɛ anzɛɛ mekɛ gyɛne nu, mbusua bahola anlea video na bɛazuzu nwolɛ, bɛazukoa Young People Ask ne anu edwɛkɛ fɔɔnwo bie, bɛazia bɛayɛ Baebolo edwɛkɛ bie anwo yɛkile anzɛɛ bɛazukoa debie na bɛayɛ bɛanlea. Noko, amaa ngakula ‘azukoa ayɛ mgbanyinli’ la, eza ɔwɔ kɛ bɛsukoa Baebolo nu nɔhalɛ ne mɔɔ ɔ bo ɛdelɛ yɛ se la.​—Hib. 6:1.

Suzu mɔɔ yɛkilehile menli wɔ azɛlɛsinli ne anu la anwo. Wɔ mekɛ mɔɔ lumua anzɛɛ yɛsia yɛkɔkpɔla bɛ a, yɛbɔ mɔdenle kɛ yɛbava Duzu A Baebolo ne Kilehile Amgba A? yɛabɔ Baebolo ɛzukoalɛ bo. Yɛsukoa zɔhane buluku ne yɛwie a, yɛ nee bɛ sukoa “Bɛzie Bɛ Nwo wɔ Nyamenle Ɛhulolɛ ne Anu.” Kɛmɔti ɛ? Baebolo ne Kilehile buluku ne maa sukoavoma nyia Ngɛlɛlera ne anwo ndelebɛbo titile. “Nyamenle Ɛhulolɛ” buluku ne kilehile bɛ kɛzi bɛfa Baebolo ngyinlazo bɛbɔ bɛ ɛbɛla alehyenlɛ biala la. Yɛsukoa buluku nwiɔ ne a ɔboa ɔmaa menli mɔɔ le fofolɛ la ‘sɔ ndinli’ wɔ Kelaese anu na ‘bɛgyinla kpundii wɔ diedi ne’ anu. (Kɔl. 2:6, 7) Asoo mbuluku ɛhye mɔ noko baboa yɛ mra ne mɔ? Ɔwɔ kɛ bɛdabɛ noko bɛsukoa ɛkpɔnedeɛ ne, Belemgbunlililɛ ne, nee gyinlabelɛ mɔɔ mɔwuamra wɔ nu la anwo debie. Ɔwɔ kɛ ngakula noko nwu deɛmɔti Nyamenle maa amaneɛnwunlɛ nwo adenle nee kɛzi bɛbanwu ewiade ɛtane ɛhye awieleɛ mekɛ ne la. Ɔwɔ kɛ bɛdie bɛdi bɔkɔɔ kɛ Gyihova Alasevolɛ a lɛ nɔhalɛ ne a. Eza ɔwɔ kɛ ngakula te Baebolo ngyinlazo ne abo na bɛkola “bɛnwu ngakyile mɔɔ wɔ kpalɛ nee ɛtane nu la.” (Hib. 5:14) Nɔhalɛ nu, ɔwɔ kɛ awovolɛ suzu ngakula ne mɔ ɛvolɛ nee kɛzi bɛte edwɛkɛ bo la anwo. Noko, ngakula dɔɔnwo kola sukoa Baebolo nu nɔhalɛ ne mɔɔ ɔ bo ɛdelɛ yɛ se wɔ mekɛ mɔɔ bɛle ngakula bɔbɔ la.​—Luku 2:42, 46, 47.