Edwɛkɛ Mɔɔ Yɛbaha La Neazo

Belemgbunlililɛ Edwɛkɛ 38 Ne

“Meboka menli mɔɔ ɛlɛbɔ nolo wɔ ewiade amuala ava edwɛkɛ ɛhye mɔɔ hyia amaa la anwo. Wɔ ɛdeɛ ɛne.”

Bɛyɛ ye nzonlɛ: Amaa wɔawie azɛlɛsinli ne anu gyima yɛ la, ka edwɛkɛ sikalɛ. Noko akee, bie a suamenle ne anye balie nwolɛ na yeahulo kɛ ɔ nee wɔ bali adwelie. Saa ɔba ye zɔ a, ɛbahola wɔabiza adwenle mɔɔ ɔlɛ wɔ kpuyia ne mɔɔ wɔ kɛlata ne azo la, kenga Baebolo ne mualɛ mɔɔ bɛhile wɔ nu la, saa mekɛ wɔ nu a bɛzuzu edwɛkɛ mɔɔ wɔ trate ne anu la foa bie anwo. Kolaa na wɔavi ɛkɛ la, fa “Dwenle Ɛhye Anwo” kpuyia ne mɔɔ wɔ ɔ nzi la kile ye na yɛ ngyehyɛleɛ sia kɔ na bɛzuzu nwolɛ.

Fa bɔ Baebolo ɛzukoalɛ bo wɔ Folɛ mɔɔ lumua wɔ November

“Ahye o. Menli dɔɔnwo mɔɔ yɛ nee bɛ ɛdendɛ la anye la kɛ bɛwu a bɛbahɔ anwuma. Ɛ nye die zɔhane edwɛkɛ ne anwo ɔ?” [Maa ɔbua.] Fa November 1 Ɛzinzalɛ Arane ne anzi kile ye, na bɛbɔ nu bɛzukoa edwɛkɛ mɔɔ lumua mɔɔ wɔ kpuyia mɔɔ lumua la abo yɛɛ ngɛlɛlera mɔɔ wɔ nu la ko. Fa magazine ne maa ye, na yɛ ngyehyɛleɛ sia kɔ na bɛzuzu kpuyia bieko mɔɔ doa zo la anwo.

Ɛzinzalɛ Arane November 1

“Ɛnea a, adalɛ kpole boni a bɛbɔ wɔ Nyamenle anwo a? [Maa ɔbua.] Baebolo ne kile kɛ Nyamenle kulo kɛ menli kulo ye na bɛdie ye bɛdi. [Kenga Ayezaya 41:13.] Magazine ɛhye maa yɛnwu adalɛ nsa mɔɔ ɛbu zo mɔɔ bɛbɔ wɔ Nyamenle anwo mɔɔ maa ɔyɛ se ɔmaa bie mɔ kɛ bɛbabikye ye la.”

Awake! November

“Yɛlɛkpɔla bɛ ɔluakɛ ɔgyegye menli dɔɔnwo kɛ ɛbɛla kpalɛ nwo ngyinlazo ɛlɛsɛkye la. Ɛdwenle kɛ menli ɛgyakyi ɛbɛlabɔlɛ kpalɛ nwo ngyinlazo nu ɔ? [Maa ɔbua.] Baebolo ne hanle dole ɛkɛ ne kɛ menli subane nee bɛ nyɛleɛ bahakyi. [Kenga 2 Temɔte 3:1-5.] Magazine ɛhye ka deɛmɔti yɛbahola yɛalie ɛbɛla kpalɛ nwo ngyinlazo mɔɔ wɔ Baebolo ne anu yɛali la anwo edwɛkɛ.”