Duzu A Ɛbayɛ Wɔ Ɛnwomenlelielɛ Mekɛ Nu A?

Kɛmɔ ɔdwu ɛzonlenlɛ nee maanle ɛnwomenlelielɛ kenle a menli dɔɔnwo wɔ sua nu la ati, ɔle mekɛ kpalɛ mɔɔ yɛbahola yɛava yɛahɔ daselɛlilɛ a. Bɛlɛmaa asafo ne mɔ anwosesebɛ kɛ bɛyɛ ngyehyɛleɛ titile bɛmaa ɛnwomenlelielɛ kenle daselɛlilɛ. Saa menli dɔɔnwo mɔɔ wɔ azɛlɛsinli ne anu la ɛnrɛla ndɛ a, ɔbayɛ kpalɛ kɛ bɛbayɛ nzenzaleɛ wɔ mekɛ mɔɔ bɛyia bɛkɔ daselɛlilɛ la anu. Bɛbahola bɛabɔ ɛnwomenlelielɛ kenle daselɛlilɛ nwo ngyehyɛleɛ titile mɔɔ bɛyɛ la anwo nolo wɔ Ɛzonlenlɛ Nyianu ne anu bɛahile asafo ne na bɛamaa awie biala mɔɔ kɛhola la anwosesebɛ kɛ ɔva ɔ nwo ɔwula nu. Nɔhalɛ nu, ɛnwomenlelielɛ noko maa yɛnyia mekɛ yɛdie yɛ menle na yɛyɛ yɛ ninyɛne bie mɔ. Noko duzu ati a yɛnva mekɛ ne bie yɛngɔ daselɛlilɛ a? Ɛyɛ zɔ a ɔbamaa ɛ nye alie kɛ ɛdawɔ noko wɔva ɛ nwo wɔwula ɛzonlenlɛ nwuanzanwuanza nu la.—Mat. 11:29, 30.