Fa Ngapezoma Ne Yɛ Neazo—Dwowɛle
1. Kɛ ɔkɛyɛ na yɛazukoa Dwowɛle mɛlɛbɛnwoaze ne wɔ daselɛlilɛ nu ɛ?
1 Nwane a le ngapezonli Dwowɛle? Ɔka ɔ nwo edwɛkɛ ala kɛ ɔle “Pɛtuwɛle ara nrenya.” (Dww. 1:1) Ngapezonli ɛhye mɔɔ bɛlɛ ɔ nwo aze la zile Gyihova edwɛkɛ ne azo, na tɛ ye gyima mɔɔ ɔyɛle la. Zɔhane ala a yɛmkpondɛ ayɛlɛyelɛ anzɛɛ dumalielɛ wɔ yɛ ɛzonlenlɛ gyima ne anu a, emomu, yɛtwe adwenle yɛkɔ Gyihova nee Baebolo ne azo. (1 Kɔl. 9:16; 2 Kɔl. 3:5) Bieko, edwɛkɛ ne mɔɔ yɛbɔ ye nolo la maa yɛnyia anwosesebɛ. Dwowɛle ngapezo ne foa boni mɔ a bamaa yɛabɔ mɔdenle na yɛanyia anyelazo ɛnɛ a?
2. Duzu a ɔwɔ kɛ Gyihova kenle ne mɔɔ ɛbikye la ka yɛ maa yɛyɛ a?
2 Gyihova “Kenle Ne Ɛbikye.” (Dww. 1:15): Bɛhɛlɛle edwɛkɛ ɛhye ɛvolɛ mgbe dɔɔnwo mɔɔ ɛze ɛhɔ la ɛdeɛ, noko yɛde mekɛ mɔɔ ɔlɛba nu la anu. Ewiade ye anu tɛnlabelɛ mɔɔ ɛlɛsɛkye nee edwɛkɛ ne mɔɔ bɛndie na bɛgolo yɛ nwo wɔ azɛlɛsinli ne anu la le daselɛ fɔɔnwo mɔɔ kile kɛ yɛde ewiade ɛtane ɛhye awieleɛ mekɛ ne anu a. (2 Tem. 3:1-5; 2 Pita 3:3, 4) Saa yɛsuzu kɛzi awieleɛ ne ɛbikye la anwo a, ɔmaa yɛnwu kɛ ɔhyia kɛ yɛfa yɛ ɛzonlenlɛ gyima ne yɛdumua wɔ yɛ ɛbɛlabɔlɛ nu.—2 Pita 3:11, 12.
3. Kɛmɔti a ɛzonlenlɛ gyima ne anwo hyia titile wɔ mekɛ mɔɔ amaneɛnwunlɛ kpole ne ɛlɛbikye la ɛ?
3 ‘Gyihova Bayɛ Ye Menli Ne Ɛvealeka.’ (Dww. 3:16): Ɛkpusulɛ ne mɔɔ bɛha nwolɛ edwɛkɛ wɔ ɛke la bahola ahile kɛzi Gyihova babua ndɛne wɔ amaneɛnwunlɛ kpole ne anu la. Kɛmɔ yɛze kɛ Gyihova balie ye menli wɔ zɔhane mekɛ ne la ati ɔkyekye yɛ rɛle. (Yek. 7:9, 14) Saa yɛlɛyɛ edwɛkɛhanlɛ gyima ne na yɛnwu kɛzi Gyihova maa yɛ anwosesebɛ la a, ɔmaa yɛnyia diedi na yɛgyinla kpundii, na ɛhye noko baboa yɛ wɔ amaneɛnwunlɛ kpole ne mɔɔ ɛlɛba la anu.
4. Kɛmɔti a yɛbahola yɛali fɛlɛko na yɛava anwodozo yɛanlea kenlebie ade ɛ?
4 Bie mɔ ɛhile kɛ Dwowɛle edwɛkɛ ne nee munzule lua ɛdeɛ, noko ɔmaa Nyamenle menli nyia anyelazo kɛnlɛma kɛ bɛbalie bɛ. (Dww. 2:32) Yemɔti bɛmaa yɛva anwodozo yɛnlea kenlebie ade na yɛbɔ mɔdenle yɛbɔ Nyamenle Belemgbunlililɛ ne anwo edwɛkpa ne nolo wɔ mekɛ mɔɔ yɛlɛtie edwɛkɛ mɔɔ wɔ Dwowɛle 2:23 mɔɔ se: ‘Bɛli fɛlɛko, na bɛmaa bɛ nye ɛlie Gyihova bɛ Nyamenle ne anwo’ la.