Duzu A Maa Ɛ Nye Die A?
1. Duzu a ɔwɔ kɛ maa yɛ nye die wɔ siane biala awieleɛ ɛ?
1 Saa siane biala dwu na bɛka kɛ awie biala ɛva ye daselɛlilɛ mgbondabulɛ ɛrɛla a, duzu a ɛfa ‘ɛtu ɛ nwo’ anzɛɛ maa ɛ nye die a? (Gal. 6:4) Saa yɛle adekpakyelɛma titile mɔɔ yɛfa dɔnehwele 130 a yɛbu daselɛlilɛ mgbonda o, saa yɛle nolobɔlɛma mɔɔ yɛfa mitini 15 mɔɔ kɔ la a yɛbu mgbonda o, ɔwɔ kɛ yɛ muala yɛdi fɛlɛko wɔ ɛkɛla muala nu mɔɔ yɛlɛfi yɛazonle Gyihova la anwo.—Edw. 100:2.
2. Duzu ati a ɔwɔ kɛ yɛyele yɛ nwo wɔ Gyihova ɛzonlenlɛ nu a?
2 Kɛmɔ Gyihova le aleɛabo Tumivolɛ Awulae la ati, ɔfɛta kɛ yɛfa debie kpalɛ biala mɔɔ yɛlɛ la yɛmaa ye. (Mal. 1:6) Kɛmɔ yɛlɛ ɔ nwo ɛhulolɛ la ati, yɛyila yɛ nwo zo yɛmaa ye kɛ yɛbayɛ ye ɛhulolɛdeɛ. Ɛhye ati, saa alehyenlɛ anzɛɛ siane biala awieleɛ, yɛdie yɛdi kɛ yɛva yɛ mekɛ, yɛ mɔdenlebɔlɛ nee yɛ anwosesebɛ yɛmaa kɛ debie “mɔɔ lumua la” wɔ Gyihova ɛzonlenlɛ nu a, ɛnee yɛlɛ debie mɔɔ ɔwɔ kɛ maa yɛ nye die a. (Mrɛ. 3:9) Noko akee, saa yɛ adwenle bua yɛ fɔlɛ a, ɛnee ɔwɔ kɛ yɛsuzu mɔɔ yɛbahola yɛayɛ na yɛanyia anyuhɔlɛ la anwo.—Wulo. 2:15.
3. Duzu ati a nrɛlɛbɛ ɛnle nu kɛ yɛbava yɛ nwo yɛado awie mɔ anwo ɛ?
3 ‘Mmafa Awie Ɛdeɛ Mɔɔ Yeyɛ La Ɛto Wɔ Ɛdeɛ Ne Anwo’: Nrɛlɛbɛ ɛnle nu kɛ yɛbava mekɛ mɔɔ ɛnee yɛ nwo yɛ se kpole la yɛado awie mɔ anzɛɛ yɛ nwo. Tɛnlabelɛ ne kakyi. Anwosesebɛ ne amuala ɛnzɛ. Yɛfa yɛ nwo yɛto awie mɔ anwo a ɔmaa yɛsu anzɛɛ yɛte nganeɛ kɛ yɛnfɛta. (Gal. 5:26; 6:4) Gyisɛse anva awie ando awie anwo. Emomu, ɔhanvole awie wɔ mɔɔ ɔholale ɔyɛle la anwo.—Mak. 14:6-9.
4. Debie mɔɔ hyia la boni a yɛsukoa yɛfi Gyisɛse ɛrɛlɛ ne anu a?
4 Wɔ ɛrɛlɛ bie mɔɔ Gyisɛse bule la anu, bɛmanle gyimayɛvolɛ ko biala ezukoa “kɛmɔ bɛ anwosesebɛ si de la.” (Mat. 25:15) Mekɛ mɔɔ bɛ menle ne rale na ɔhanle kɛ bɛbu mgbonda la, bɛdabɛ mɔɔ bɛbɔle mɔdenle bɛyɛle gyima kɛmɔ bɛkɛhola la nyianle nganvolɛ na bɛ nye liele wɔ bɛ menle ne anwo ɛkɛ. (Mat. 25:21, 23) Saa yɛdayɛ noko yɛyɛ dɔɔnwo wɔ Belemgbunlililɛ edwɛkɛhanlɛ ne anu a, yɛlɛ anwodozo kɛ yɛbanyia Nyamenle anyunlu ɛlolɛ na yeamaa yɛ nye alie!