The Wonders of Creation Reveal God’s Glory
Menli dɔɔnwo anye die abɔdeɛ nwo. Noko bɛ nuhua ekyi bie a ɛnwu kɛ abɔdeɛ da yɛ Bɔvolɛ Kpole ne nzuzulɛ nee ye nganeɛdelɛ ali a. (Wulo. 1:20) Mekɛ tendenle mɔɔ ɛze ɛhɔ la anu, Devidi luale Gyihova Edwɛkɛ ne mɔɔ vi sunsum nu la azo zukoale Ɔ nwo debie. Noko, eza ɔluale abɔdeɛ zo “ɔnwunle” na ɔbikyele Ye. (Edw. 8:3, 4) Video ne mɔɔ ati se, The Wonders of Creation Reveal God’s Glory la boa yɛ, yɛ mra, nee yɛ Baebolo sukoavoma maa yɛnwu Gyihova abɔdeɛ bie mɔ, yɛnwu yɛ Bɔvolɛ Kpole ne subane ngakyile nee sonla holɛ ko mɔɔ ɔde la kpalɛ, na ɔmaa yɛbikye ye kpalɛ. Saa ɛnea ɛwie a, bɔ mɔdenle bua kpuyia ɛhye mɔ mɔɔ doɔdoa zo la.
(1) Kɛzi ewiade ne kpole de nee kɛzi bɛhyehyɛ ye pɛpɛɛpɛ la maa ɛnyia anyezɔlɛ kpole ɛmaa Gyihova ɛ? (Aye. 40:26) (2) Saa yɛnea kɛzi nzule si de la a, duzu a yɛsukoa yɛfi Ahenle mɔɔ bɔle la anwo a? (Yek. 14:7) (3) Kɛzi azɛlɛ ye kpole nee ewia ne mɔɔ bikye ye la maa Gyihova nrɛlɛbɛ ne da ali ɛ? (4) Bodane boni ati a bɛyɛle siane ne a? (Edw. 89:37) (5) Kɛzi Gyihova ɛbɔ alesama kɛ bɛnyia anyelielɛ wɔ asetɛnla nu ɛ? (6) DNA a le duzu? (Edw. 139:16) (7) Kɛzi sonla le ngakyile fi Gyihova abɔdeɛ mɔɔ wɔ azɛlɛ ye azo amuala la anwo ɛ? (Mɔl. 1:26) (8) Duzu a ɛ nye la ye ade wɔ ewiade fofolɛ ne anu a?
Ninyɛne Fofolɛ: (9) Nienwu a kɔla ngakyile ne mɔ vi rale a? (10) Kɛzi nzule komo tumi mɔɔ twe ninyɛne ba aze la azo na ɔkɔ mbaka ti zo ɛ? (11) Duzu gyima a nzule di ye wɔ yɛ sonlabaka ne anu a? (12) Fa koyɛlɛ mɔɔ wɔ ninyɛne mɔɔ lɛ ngoane avinli la anwo neazo maa. (13) Kɛzi abɔdeɛ nu ninyɛne ze kɛ bɛkola bɛ nee bɛ gɔnwo mɔ tu ɛ? (14) Duzu a le “golden angle” ne, na kɛzi ɔda ali wɔ abɔdeɛ nu ɛ?
“Bɛnlea” Gyihova Abɔdeɛ: Gyisɛse ɛmaa yɛ anwosesebɛ kɛ, yɛnlea “nloma mɔɔ luolua anwomanyunlu la” nee “ɛhoayelɛ nu aloa.” (Mat. 6:26, 28) Saa yɛyɛ ye zɔ a, ɔbamaa yɛ diedi ayɛ kpole, yɛanyia anwodozo wɔ yɛ Bɔvolɛ ne anu, na yɛanyia anyezɔlɛ yɛamaa Gyihova nrɛlɛbɛ, ye ngoanelielɛ tumi nee ye ɛlɔlɛ ne. Kɛ anrɛɛ ɛbamaa ninyɛne mɔɔ wɔ ewiade ɛhye anu ahwehwe wɔ adwenle la, nyia mekɛ na bɔ mɔdenle kɛ ɛbanwu Gyihova abɔdeɛ mɔɔ yɛ nwanwane la, na suzu mɔɔ ɔmaa yɛnwu ye wɔ yɛ Nyamenle ne anwo la anwo.—Edw. 19:1.