Ɔwɔ Kɛ Yɛfa Asɔneyɛlɛ Yɛdwenledwenle Edwɛkɛ Nwo
1. Duzu a boale Gyisɛse mɔɔ yeammaa bɛandwehwe ye adwenle bɛanvi ye gyima titile ne azo a?
1 Ɛnee Gyisɛse ɛva nɔsolɛ ne amuala ɛyɛ menli ayile na yedu mbɔnsam dɔɔnwo. Aleɛ hyenle mɔɔ ye ɛdoavolɛma ne nwunle ye la bɛhanle kɛ: “Bɛlɛkpondɛ wɔ kpole,” na bɛmanle ɔnwunle kɛ ɔwɔ kɛ ɔtoa ye nwanwane gyima ne azo. Noko akee, Gyisɛse ammaa bɛandwe ye adwenle bɛanvi ye gyima titile mɔɔ le edwɛkpa ne nolobɔlɛ la azo. Ɔbuale kɛ: “Bɛmaa yɛhɔ namunamu mɔɔ bikye ɛke la azo. Ɔwɔ kɛ mebɔ Edwɛkpa ne nolo wɔ ɛkɛ ne mɔ noko, ɔluakɛ ɛhye mɔ ati a membale a.” Duzu a boale Gyisɛse manle ye adwenle hɔle ye gyima ne azo a? Ɛnee ɔdwazo ndɛ ɔyɛ asɔne na ɔdwenledwenle edwɛkɛ nwo. (Mak. 1:32-39) Kɛzi asɔneyɛlɛ mɔɔ bɛfa bɛdwenledwenle edwɛkɛ nwo la baboa yɛdayɛ noko yeamaa yɛayɛ nolobɔlɛma mɔɔ bɔ mɔdenle ɛ?
2. Duzu a yɛbahola yɛadwenledwenle nwo na yeaboa yɛ yeamaa yɛava mɔdenlebɔlɛ yɛayɛ yɛ ɛzonlenlɛ gyima ne a?
2 Duzu A Yɛdwenledwenle Nwo A? Gyisɛse nwunle “menli kɛ bɛbɔ asande na bɛluolua nu mgbane mgbane kɛ mboane mɔɔ ɛnlɛ neavolɛ la.” (Mat. 9:36) Zɔhane ala a yɛbahola yɛazuzu kɛzi menli hyia edwɛkpa ne anwo la anwo a. Yɛbahola yɛadwenledwenle kɛzi mekɛ ne hyia ndɛndɛ la anwo. (1 Kɔl. 7:29) Yɛbahola yɛazuzu Gyihova gyima nee ye subane, nwolɛ adenle mɔɔ yɛnyia kɛ yɛle Gyihova Alasevolɛ nee sunsum nu ninyɛne mɔɔ sonle bolɛ mɔɔ yɛzukoa yɛvi Nyamenle Edwɛkɛ ne anu mɔɔ menli dɔɔnwo mɔɔ wɔ yɛ azɛlɛsinli ne anu ɛtɛnwunle ye la anwo.—Edw. 77:11-13; Aye. 43:10-12; Mat. 13:52.
3. Mekɛ boni a ɔwɔ kɛ yɛdwenledwenle edwɛkɛ nwo a?
3 Mekɛ Boni? Bie mɔ dwazo ndɛ na bɛdwenledwenle edwɛkɛ nwo kɛmɔ Gyisɛse yɛle la. Bie mɔ ɛnwu ye kɛ bɛyɛ zɔ nɔsolɛ nu kolaa na bɛala a ɔle kpalɛ. (Mɔl. 24:63) Saa yɛnlɛ alagye bɔbɔ a, yɛbahola yɛakpondɛ mekɛ yɛava yɛadwenledwenle edwɛkɛ nwo. Bie mɔ yɛ zɔ wɔ mekɛ mɔɔ bɛde kale nu la. Bie mɔ noko fa bɛ ewiazo ɛnwomenlelielɛ mekɛ yɛ zɔ amaa awie angyegye bɛ. Menli dɔɔnwo ɛnwu kɛ saa bɛdwenledwenle edwɛkɛ nwo kolaa na bɛahɔ daselɛlilɛ a, ɔboa bɛ ɔmaa bɛfa akɛnrasesebɛ nee mɔdenlebɔlɛ bɛdi daselɛ kpalɛ.
4. Kɛmɔti a ɔwɔ kɛ yɛdwenledwenle edwɛkɛ nwo ɛ?
4 Asɔneyɛlɛ mɔɔ yɛfa yɛdwenledwenle edwɛkɛ nwo la bamaa yɛava ɛhulolɛ kpole yɛazonle Gyihova, yɛabu yɛ ɛzonlenlɛ gyima ne kɛ debie mɔɔ nwolɛ hyia kpole wɔ yɛ ɛbɛlabɔlɛ nu, na yeamaa yɛabɔ kpɔkɛ kpundii kɛ yɛkɔ zo yɛali daselɛ. Nyamenle Sonvolɛ Kpanyinli Gyisɛse nyianle nvasoɛ vile edwɛkɛ mɔɔ bɛdwenledwenle nwolɛ la anu, na ɔbaboa yɛdayɛ noko.