“Mmasulo”
1. Ngyegyelɛ mɔɔ le kɛ Gyɛlɛmaya ɛdeɛ ne la boni a yɛbahola yɛayia a?
1 Mekɛ mɔɔ bɛkpale Gyɛlɛmaya kɛ ngapezonli la, ɔhanle kɛ ɔ nloa ɛtɛtele. Noko Gyihova hanle hilele ye kɛ, “mmasulo,” na ɔboale ye ɔmanle ɔyɛle ye gyima ne bɔkɔɔ. (Gyɛ. 1:6-10) Wɔ yɛ mekɛ ɛhye anu, nyianezelɛ anzɛɛ anwodozo mɔɔ yɛnlɛ la bahola aha kɛzi yɛyɛ yɛ ɛzonlenlɛ gyima ne la. Ɔdwu mekɛ ne bie a kɛzi menli bu yɛ anzɛɛ kɛzi bɛbadie edwɛkɛ ne la anwo ɛzulolɛ bahola amaa yɛakpo kɛ yɛkɛli daselɛ. Kɛzi yɛbahola yɛali ɛzulolɛ zɛhae azo ɛ, na nyilalɛ boni a bavi nu ara a?
2. Kɛzi anwoziezielɛ boa yɛ maa yɛye daselɛlilɛ nwo ɛzulolɛ yɛfi ɛkɛ ɛ?
2 Dumua Siezie Ɛ Nwo: Saa yɛsiezie yɛ nwo kpalɛ a ɔbahola yeaye ɛzulolɛ yeavi ɛkɛ. Kɛ neazo la, saa yɛdumua yɛsiezie yɛ nwo wɔ edwɛkɛ mɔɔ bɛfa bɛpɛ adawubɔlɛ zo la anwo a, ɔbaboa yɛ yeamaa yɛaye edwɛkɛ mɔɔ bɛta bɛfa bɛpɛ adawubɔlɛ zo la anloa. (Mrɛ. 15:28) Duzu ati a bɛnva bɛ Abusua Ɛzonlenlɛ ne anu mekɛ ekyi bɛnziezie bɛ nwo wɔ kɛzi bɛbali ngyegyelɛ ngakyile nwo gyima wɔ sukulu nee daselɛlilɛ nu la ɛ?—1 Pita 3:15.
3. Kɛzi yɛ rɛle mɔɔ yɛfa yɛwula Gyihova anu la boa maa yɛdi ɛzulolɛ zo ɛ?
3 Fa Ɛ Rɛle Wula Gyihova Anu: Debie titile mɔɔ baboa yɛ yeamaa yɛali ɛzulolɛ zo la a le kɛ yɛkɛva yɛ nwo yɛkɛdo yɛ Nyamenle ne anwo zo. Gyihova ɛbɔ yɛ ɛwɔkɛ kɛ ɔbaboa yɛ. (Aye. 41:10-13) Anwobanebɔlɛ kpole boni a tɛla ɛhye a? Bieko, Gyisɛse hanle hilele yɛ kɛ saa yɛkɔ tɛnlabelɛ mɔɔ yɛ nye ɛnla bɔbɔ la anu a, Nyamenle sunsum nwuanzanwuanza ne baboa yɛ yeamaa yɛali daselɛ wɔ adenle kɛnlɛma zo. (Mak. 13:11) Ɛhye ati, sɛlɛ Gyihova sunsum nwuanzanwuanza ne dahuu.—Luku 11:13.
4. Saa yɛmia yɛ nwo wɔ ɛzonlenlɛ gyima ne anu ɔnva nwolɛ ngyegyelɛ mɔɔ yɛbayia ye la a, nyilalɛ boni a bavi nu ara a?
4 Zolɛ Nyilalɛ: Saa yɛmia yɛ nwo wɔ ɛzonlenlɛ gyima ne anu ɔnva nwolɛ ngyegyelɛ mɔɔ yɛbayia ye la a, ɔbaboa yɛ yeamaa yɛagyinla sɔnea mɔɔ yɛbayia ye kenlebie la anloa kpalɛ. Ɔmaa yɛnyia akɛnrasesebɛ nee anwodozo, mɔɔ le subane mɔɔ sunsum nwuanzanwuanza ne maa menli nyia la bie. (Gyi. 4:31) Bieko, mekɛ mɔɔ yɛlɛdua Gyihova moalɛ zo yɛali ɛzulolɛ mɔɔ yɛlɛ azo la, ɔbamaa yɛ diedi ayɛ kpole na yɛanyia anwodozo kɛ ɔbalie yɛ. (Aye. 33:2) Eza yɛnyia anyelielɛ nee ahunlundwolɛ ɔluakɛ yɛze kɛ yɛlɛyɛ mɔɔ sɔ yɛ anwuma Selɛ ne anye la. (1 Pita 4:13, 14) Ɔrɛla ye kɛ yɛbava akɛnrasesebɛ yɛabɔ Belemgbunlililɛ edwɛkpa ne nolo, na yɛanyia anwodozo kɛ Gyihova gyi yɛ nzi dahuu!